Read Nyishi NYEGAM 10 Bible Online

NYEGAM 10 - Nyishi bible

NYEGAM 10

¹Abimelek kokw so Issakarwg nyob hoqg Dodog ko tuup Pua, ho Puag ko tuup Tola Israelam ywwlin taab daqlinum, hoo mwv Iprayimg diisw gvda Samirho doonum.

²‍Hoo mwv Israelam vnyw camnyi leq nywum gob nyegam pal doognum. Ho mwv siknum hoo Samirho liiknum.

³‍Mwwg sixo kokw so Gilead hoqgv Jair daqlinum, hiyv Israelam vnyw camnyi leq nywnyi gob nyegam pal doognum.

⁴‍Hoo mwv cammum svdam mam xarnbo ko tuup cammum go doonum, hoo bulv cammum bopam go doognum, soolo godab hoq bopam tulu ham Habbot-jair hvl bedwn, hoqhv Gileadwg gvdaho doodwn.

⁵‍Hoo Jair siknum hoo Kamonho liiknum.

⁶‍Israel nyiilungv lokta hoggv almadwn ham At Swg kaagaho nyinum hoo Baal tulungam la Astarotam, Siriyag pwnbo tulungam, Sidonwg pwnbo tulungam, Moabg pwnbo tulungam, Ammon nyi tulug pwnbo tulungam, hoo Palistanwg pwnbo tulungam bon nyijil xumnum. Hoo bulv At Swn ludumnum hoo mwam bon nyil xumk maanum.

⁷‍Hoqgab At Sw Israel nyiilungam haaxaqnum, hoo mwv bulam Palistan gvla Ammon nyi tulug alaqho puqlwq kunum,

⁸‍hoo hoq vnyw ho bulv Israel nyiilungam dub-dub nyiab-nyiab dvb nyijab-nyiyiqnum. Hoggab vnyw camleq piin go Jordon lvvgwg Amor nyi tulug gvda, Gilead ho Israel nyiilungam bulv nyijab-nyiyiql nyil doognum.

⁹‍Hoo Ammon nyi tulungv Jordon bvkam rablayil Iprayimg nyob dvpar Judangam la Benjaminam ceekol nyob panum, hoqgab Israelv vcjaqb hentwr-kaasnum.

¹⁰‍Hoo Israel nyiilungv At Swn xabl begamv, “Ngulv nam ceekol nyic nyipa ku, hoggab ngulug Pwnbon ngulv ludum tukba hoo Baal tulungam bon nyijil xuml doot kuba.”

¹¹‍Hoo At Sw Israel nyiilungam benum, “Ngo nulam Ijipt nyi tulu hoqgv hoo Amor nyi tulu hoqgv, Ammon nyi tulu hoqgv hoo Palistan nyi tulu hoqgv ywwlin maan mvi yv?

¹²‍Sidon nyi tulu ngvkam, hoo Amalek nyi tulu hoo Maon nyi tulungv nulam nyijab-nyiyiqnum, hoo nulv ngam xabnum, hoo bulug alaq hoqgv ngo nulam ywwlinum.

¹³‍Hvbsujaqkam nulv ngam ludum pel asaq pwnbo tulungam bon nyijil xumnum; hoqgab ngo nulam ywwlin kuram.

¹⁴‍Hiyam nulv pwnbo gob daalin pakun hoqb wgdvl xabto; nulug hentwr-kaas moodam bulam nulv ywwlin koto.”

¹⁵‍Hoo Israel nyiilungv At Swn benum, “Ngulv nyic nyit kuba; no hoggv al mwwpa dvn ham ngulug aoso nyitku. Soolo gab ngulam anya mwwpa gvdwl naalin tvb.”

¹⁶‍Hoqgab bulv nyoodo pwnbo tulungam bulug pengko hoqgv apaqnum hoo At Swn bon nyijil xumnum, hoo mwv Israel nyi tulug hentwr-kaasam cwql doola kumanum.

¹⁷‍Ho Ammon nyi tulungam nyob padwb goqnum, hoo bulv Gilead ho svmcw mvl doonum. Hoo Israel nyiilungv lvkin gob hookumnum, hoo bulv Mijpa ho svmcw mvl doonum.

¹⁸‍Hoo Gileadwg nyi tulungam nyigbo la nyiilungv akwn-akwn bemin sunum, “Hiyv nyiip jaqkv Ammon nyi tulungam nyob parab gvco tayin? Mwv Gilead so doonbo nyi mwlwg aoho nyigbo gob nyitayin.”