Read Nyishi NYEGAM 11 Bible Online

NYEGAM 11 - Nyishi bible

NYEGAM 11

¹Jepta Gilead nyi tulu hoqgv atorb nyob pvxbo nyi akv, hvbmabde mwv meqjo bo akwg ko tuupv. Gilead Jeptag abv.

²‍Hoo Gileadwg nywxwngv mwam ko tuup tulu gota bwwjnum. Hoo hwdlo mwwg nywxwg ko tuupv swwrab yukun, bulv Jeptanvn ruqpaqnum hoo mwam benum, “No ngulug abwg imiq soqgv hog otu naanyi ram, hoggab no asaq nyem hoqg ko tuupv.”

³‍Ho Jepta mwwg vbw-bor tulu hoqgv keknum hoo Tob gvdaho doonum, hoo nyi dooxa-daqya bo ata go Jepta goqkuml yvgnum hoo bulv mwwg lvgab wbanum.

⁴‍Meeg kokw so Ammon nyi tulungv Israelam nyob panum.

⁵‍Hoo hwdlo Ammon nyi tulungv Israelam nyob paiyikho, Gileadwg nyi axa tulungv Jeptanvn Tob gvda hoqgv boa taab wnum.

⁶‍Hoo bulv Jeptanvn benum, “Haato, ngulam nyig bob nyito, ho ngulv Ammon nyi tulungam nyob pvrwq nyotayin.”

⁷‍Hvbmabde Jepta Gileadwg nyi axa tulungam benum, “Ngam nulv oyuml hoo ngoqg abwg nam hoqgv ruqlinl ruqpaq maad mvi yv? Sija nulv hentwr-kaasv dooi kam ngoqg dookub hog mvtab haai yin?”

⁸‍Hoo Gileadwg nyi axa tulungv Jeptanvn benum, “Hoqgab di sija ngulv noqg dookub mwwkurl haai kun, ho no ngulug lvgab wto hoo Ammon nyi tulungam nyob patuj hoo Gilead ho doonbo nyi mwlwg nyig bob nyito.”

⁹‍Jepta Gileadwg nyi axa tulungam benum, “Nulv ngam lokta nammwb bookurl Ammon nyi tulungam nyob pam baloqkam, hoo At Sw bulam ngam jibaloqkam, ngo nulug nyig bob nyitayin.”

¹⁰‍Hoo Gileadwg nyi axa tulungv Jeptanvn benum, “At Sw ngulug pengko so hvvkib swwtayin, ngulv noqg benam ham nyik mabaloqkam.”

¹¹‍Hoqgab Jepta Gileadwg nyi axa lvgab wmin gvnum, hoo nyiilungv mwam Israelam nyig bob mvnum. Hoo Jepta soq gomcwr tulu sam At Swg agaho Mijpa ho goonum.

¹²‍Ho Jepta Ammon nyi tulug lvpw atam pui benbo atag kanaml bilwqnum, “Hoggv no ngoqg lvgab yolu doodwn, ho no ngam haal ngoqg gvdangam ceekol nyob pata dvn i?”

¹³‍Hoo Ammon nyi tulug lvpw atv Jeptag pui baqn bo tulungam birwqnum, “Israel hwdlo Ijipt hoqgv hoodu dooi yikho ngoqg gvdangam Arnon hoqgv Jabbok hoo Jordon namgub naapa ku; hoqgab sija ham cooikab jikur tukbv.”

¹⁴‍Jepta lokta Ammon nyi tulug lvpw at dookub pui baqn bo atag kanamnum

¹⁵‍hoo mwam benum, “Soq sib Jepta bede hvta: Israelv Moab ho Ammon nyi tulug gvdangam naamanum,

¹⁶‍hvbmabde hwdlo bulv Ijipt hoqgv leng yikho, Israelv deexa-rarab wpeq Swlw Sa-svlob hoo Kades ho haanum.

¹⁷‍Israelv Idomg lvpw atam pui baqn bo atag kanaml begamv, ‘Anya mwwpa gvdwl noqg gvdab ngulam wpeq mvla bv,’ hvbmabde Idomg lvpw atv ham tamanum. Hoo bulv Moabg lvpw atam toxnum, hvbmabde mwv loorwq maanum. Hoqgab Israelv Kades ho doodunum.

¹⁸“Ho bulv deexa-rarab wknv Idom la Moab gvdangam wiyeq layil Arnon bviywrho doonum. Hvbmabde bulv Moab dwrbu-dwryab haamanum, hoggab Arnonv Moabg gvda vrrwb nyinum.

¹⁹‍Israelv Amor nyi tulug lvpw at Sihon nvla Hesbonwg lvpw atam pui baqn bo atag kanamnum, ‘Anya mwwpa gvdwl ngulam nulam gvdab wpeq mvtbv,’

²⁰‍hvbmabde Sihon Israelam mwwg dwrbu-dwryab wpeq mvmanum, ho Sihon mwwg nyiilu mwlwngam lvkin gob goqkum layil Jahaj ho svmcw doal hoo Israelam nyob panum.

²¹‍Hoo Israelwg Pwnbo At Sw, Sihon nvla mwwg nyiilu mwlwngam Israelwg alaqho jilwq kunum, hoo bulv bulam mviyanum. Ho Israelv Amor nyi tulug dook gvdangam otub naaknum.

²²‍Hoo bulv Amor dwrbu-dwrya mwlwngam naalayil Arnon hoqgv Jabbok hoo deexa-rara hoqgv Jordon namgub otu naaknum.

²³‍Hoqgab Israelwg Pwnbo At Sw Amor nyi tulungam mwwg Israel nyiilug aga hoqgv ruqlinl ruqpaqnum; hoo no hoq tulu ham otub naad bvi yv?

²⁴‍Noqg pwnbo Kemos nam otu jinam mam no gumn pvvram yv? Hoo ngulug Pwnbo At Sw ngulug aga hoqgv ruqlinl ruqpaqnam ham, ngulv otub naatayin.

²⁵‍Moabg lvpw at Jippor gv ko tuup Balaknvn no alyad nvi yv? Mwv Israelam ceekol ainam yv, ho mwv bulug lvgab nyob patab wn mvi yv?

²⁶‍Israel Hesbon gvla hoqg nampam tuluho, hoo Aroyer gvla hoqg nampam tuluho, hoo Arnonwg sugurg bopam tuluho vnyw 300 go dooi yikho, hoq moodho hoq tulu ham hog nyitwl naalin maanum?

²⁷‍Hoqgab nam ngo ceekol nyic nyij ma, hoo no ngam nyimurl nyob podul doodo. Soolo aal so At Sw, Israelwg nyiilu ngvla Ammon gv nyiilug pengko so hvvkib dootayin.”

²⁸‍Hvbmabde Ammon nyi tulug lvpw atv Jeptag gomcwr bilwqnam puiyam tamanum.

²⁹‍Ho At Swg Yalv Jeptag aoho doonum, hoo mwv Gilead hoqgv Manasseb wpeqnum hoo Gileadwg Mijpab wpeqnum, hoo Gileadwg Mijpa hoqgv Ammon nyi tulu dookub wpeqnum.

³⁰‍Hoo Jepta At Swn dingnam ak dingnv hoo benum, “No Ammon nyi tulungam ngoqg alaq so jibaloqkam,

³¹‍ho hwdlo ngo Ammon nyi tulungam nyob paiya peekul hookur yukun, hoggv lajaqkam ngam kvvrwqtab ngoqg nam hoqgv lingrwq bov At Swngv, hoo ngo ham boyuqnam aky akgob jitayin.”

³²‍Hoqgab Jepta pobungam rablayil Ammon nyi tulungam nyob panum, hoo At Sw bulam mwwg alaqho jiknum.

³³‍Hoo mwv bulam Aroyer hoqgv meng rablayil Minnit door-doopw namgub, bopam camnyi tulungam, hoo Abel-keramim namgub vc loodab mengnum. Hoqgab Ammon nyi tulungam Israel nyiilug niikum ho dooknum.

³⁴‍Ho Jepta mwwg nammwb Mijpa ho haaknum. Hoo kaato, mwwg nyem kov tamborin tulu lvgab noso sool mwam lingrwqnum. Mwn mwwg ko akin cwqnyingv; mwnwg lvvg ho mwv nyega ko gokam ho nyem ko gokam doomanum.

³⁵‍Hoo mwv mwnwn kaapa kalam twqda, mwv mwwg vjam pumwq sul benum, “Oa, ngoqg nyem ko nga! No ngoqg hangam pupwq gvn kuba, hoo no ngam vc loodab hvvdwq dwqm gvi ku. Hoggab ngoqg agam soqgv At Swn gombwq jiknam mam, hoo ngoqg dingr kunam mam ngo nookur nyokram.”

³⁶‍Hoo mwn mwam benum, “Ngoqg aba, noqg agamv At Swn gombwq kunam mam; hoggab noqg agam beknam hvb ngam mvtkubv, hoggab At Sw noqg ceebio tulu, Ammon nyi tulungam ree daqpa ku.”

³⁷‍Hoqgab mwn mwnwg abam benum, “Soq pagoq tulu sam ngoqgab nyim tvbv: ngam pool bvrnyi go vpwb apaq tvb, ho ngo la ngoqg ajin tulungv puutu tulu tolo gaqkar gvdwl mvvngam gob nyitwl xabgaq taden.”

³⁸‍Hoqgab mwv benum, “Wn.” Ho mwv mwnwn pool bvrnyi gab kanamnum, hoo mwn wknum, hoo mwn la mwnwg ajin tulungv mvvngam gob nyitwl puutu tuluho gaqkarl xabnum.

³⁹‍Hoo pool bvrnyiv wnya yukun, mwn mwnwg ab dookub hookur kunum, ho mwv mwnwn mwwg dingr kunam hvb nyin kunum. Mwn nywywngam nyega cengk maab mvvngamb nyinum, hoo hoqhv Israel ho nyicw ak gob nyiknum

⁴⁰‍ho Israelwg nyem ko tulungv vnyw-vnywngam Gilead nyi tulug Jeptag nyem ko-gab aal loopy go vnywngam nyix-riiknum.