Read Nyishi NYEGAM 12 Bible Online

NYEGAM 12 - Nyishi bible

NYEGAM 12

¹Iprayim nyi tulungv nyob padwb goqnum, hoo bulv Japon pobungam rablayil hoo Jeptanvn benum, “Hoggab no so rablayil Ammon nyi tulungam nyob panum hoo ngulam bepa tvl noqg lvgab nyob paba mvmanum? Ngulv noqg nam mam noqg aoho wm toloq tayin.”

²‍Hoo Jepta bulam benum, “Ngo la ngoqg nyiilu ngvla Ammon nyi tulungv vc loodab yolu dumin sunum, hoo hwdlo ngo nulam goqnum, nulv ngam bulug alaq hoqgv ywwlin maanum.

³‍Hoo hwdlo ngo kaaknamv nulv ngam ywwlin kuma yin, ngoqg swwgam ngo ludum peekul Ammon nyi tulungam nyob patab soq kvtinb rabnum, hoo At Sw bulam ngoqg alaq so jilwq kunum. Hvbnyiloqkam hoggab soolo nulv ngam ceekol nyob patab soqb caai yin i?”

⁴‍Ho Jepta Gileadwg nyi tulungam goqkumnum hoo Iprayim lvgab nyob panum. Hoo Gilead nyi tulungv Iprayim mengnum, hoggab bulv benum, “Gilead nyi tulu, nulv Iprayim gvla Manasseg pengko soqgv kelin bov.”

⁵‍Hoo Gilead nyi tulungv Iprayim nyi tulungv Jordon pobungam rabdv ko nyookam naareq kunum. Hoo hwdlo kelinbo Iprayim tulungv benum, “Ngam kvtinb ram labv,” Gilead nyi tulungv mwam benum, “No Iprayim nyi ngv i?” Hwdlo mwv benum, “Ngo Iprayim ma,”

⁶‍bulv mwam benum, “Hvnyiloqkam, Shibbolet hvl beka to,” hoo mwv benum, “Sibbolet,” hoggab mwv ham kvtaq jaqb goolaq maanum. Ho bulv mwam nootul hoo Jordon pobu ho mengnum. Hvb nyiknv hoq moodho Iprayim nyiam 42,000 go mengnum.

⁷‍Jepta Israelam vnyw nywx go nyegam pal swwgnum. Ho Gileadwg nyi Jepta siknum hoo mwwg Gilead bopamho mwam liiknum.

⁸‍Mwwg kokwb Betlehamg Ibjan Israelam nyegam pal swwgnum.

⁹‍Mwv ko tuup cammum go doonum, hoo nyem kov cammum go doonum, mwwg nyob maanbo nyiam mwv nyem jinum, hoo nyeexw cammum go asaq nyob hoqgv mwwg ko tuup tulu gab boanum. Hoo mwv Israelam vnyw kvn go nyegam pal swwgnum.

¹⁰‍Ho Ibjan siknum hoo Betleham ho liiknum.

¹¹‍Mwwg kokwb Jebulunwg nyi Elon Israelam nyegam pal swwgnum, hoo mwv Israelam vnyw nywyw go swwgnum.

¹²‍Jebulunwg nyi Elon siknum hoo Jebulun gvdag Aijalon ho mwam liiknum.

¹³‍Mwwg kokwb Piratonwg nyi Hillelwg ko tuup Abdon Israelam nyegam pal swwgnum.

¹⁴‍Mwv ko tuup campy go hoo ko siqdag ko tuupv cammum go doonum, bulv svdam cam kvn aoho xarl wnum, hoo mwv Israelam vnyw piin go nyegam pal swwgnum.

¹⁵‍Piratonwg nyi Hillelwg ko tuup Abdon siknum hoo Amalek nyi tulug diisw gvda urag, Iprayim gvdag Piraton ho mwam liiknum.