Read Nyishi NYEGAM 13 Bible Online

NYEGAM 13 - Nyishi bible

NYEGAM 13

¹Hoo Israel nyiilungv hoggv almadwn ham At Swg kaagaho nyinum, hoqgab At Sw bulam vnyw campy go Palistan alaqho jinum.

²‍Danwg nyob hoqgv Jora nyi ak doonum, mwwg eminv Manoa. Hoo mwwg nywxwngv twrngumnum hoo ko doomanum.

³‍Hoo At Swg gumtwngv nyem akam daqlinv hoo mwnwn benum, “Kaato, no twrnguml hoo ko bwwmanum, hvbmabde no ko gvtayin hoo nyega ko ak bwwtayin.

⁴‍Hoqgab hengab to hoo opo twwmabv ho twwxum boam twwmabv, hoo dvrwq maan boam dvma looda bv,

⁵‍hoggab kaato, no ko gvtayin hoo nyega ko ak bwwtayin. Mwwg dummam yoqciq tvdaq maabv, hoggab ko ak ham annwg kepo hoqgv jaq Pwnbo gab Najirait akgob mvtayin, hoo mwv Israelam Palistan alaq hoqgv ywwlin tayin.”

⁶‍Ho nyem akv haanv hoo mwnwg nyolam betamnum, “Pwnbog nyi ak ngoqg dookub haanum, hoo mwwg gv tojv Pwnbog gumtw hvb nyide, ho luusaq looda de. Mwv hogloqkv ham ngo mwam tox kuma, hoo mwwg eminam mwv ngam betam ma,

⁷‍hvbmabde mwv ngam benum, ‘Kaato, no ko gvtayin hoo nyega ko ak bwwtayin. Hoqgab opo twwmabv ho twwxum boam twwmabv, hoo dvrwq maan boam dvma looda bv hvde nv, hoggab ko ak ham annwg kepo hoqgv mwwg sinam aal xaqb Pwnbo gab Najirait akgob mvtayin.’”

⁸‍Ho Manoa At Swn swgwl hoo benum, “At Swa, anya mwwpa gvdwl noqg kanam kunam Pwnbog nyi ak ham lokta kanam tvbv hoo ko ak bwwtanam mam ngulv hoggv nvkv nyiyin dvn ham ngulam tomswr tvbv.”

⁹‍Hoo Pwnbov Manoag swgwnam mam tanum, hoo Pwnbog gumtwngv lokta mwn rongo ho dooi yikho haanum. Hvbmabde Manoa mwnwg nyolv mwnwg lvgab doomanum.

¹⁰‍Hoqgab nyem ak hv nyebia jaqb xarbnv hoo mwnwg nyolam benum, “Kaato, kenlo loosaq aalho ngoqg dookub haanbo nyi ak hv ngoqg dookub haapa ku.”

¹¹‍Hoo Manoa gorab layil mwwg nywxw lvgab wnum hoo nyi ak ham haanv hoo mwam benum, “Nooiyam soq nyem sam agam goon bov?” Hoo mwv birwqnum, “Ngokv.”

¹²‍Hoo Manoa benum, “Hwdlo noqg gomcwr benam hv jvqtw kuba lo, ko hoqg swwj-giijv hoggub nyitayin, hoo hoggv mwwg tuugab nyidy sanamv?”

¹³‍Hoo At Sw gumtwngv Manoanvn benum, “Ngo nyem akam hoggv benum ham mwnwn hengab gvdwl nyim to.

¹⁴‍Mwn roo ter hoqgv lengn boam dvmabv, opo gokam ho twwxum boam twwmabv, ho dvrwq maan boam dvma looda bv. Mwnwn ngoqg gaml jinam mwlw ham mwnwn vrr rwmto.”

¹⁵‍Manoa At Swg gumtwngam benum, “Anya mwwpa gvdwl no wleq maabv hoo noqgab sibin bindo loq dorg mwx-mvaq jitayin.”

¹⁶‍Hoo At Swg gumtwngv Manoanvn benum, “No ngam doonu mvbnyiloqkam, ngo noqg dvsam dvdy ma. Hvbmabde no ham At Swn boyuqnam aky gob jibnyiloqkam jito.” (Hoggab Manoa mwam At Swg gumtw gob cengmanum.)

¹⁷‍Hoo Manoa At Swg gumtwngam benum, “Noqg eminv hoggv, hwdlo noqg gomcwr benam hv jvqtw kuba lo, ngulv nam modu dvb nyitayin?”

¹⁸‍Hoo At Swg gumtwngv mwam benum, “No ngam swrdorxeq dvb kaas tvl, hoggub no ngoqg eminam tox dvn?”

¹⁹‍Hoqgab Manoa sibin bindo lvgab dvs akiam naalayil hoo ham At Swg wlw yugw ho jinum, hiyv akv swrdorxeq nyis tulungam nyinum, hoo Manoa la mwwg nywxwngv kaaya yal doonum.

²⁰‍Hoo hwdlo yugw hoqgv moiliv doa yaab bioqca yukam, At Swg gumtwngv yugw moily lvgab caamin gvknum. Ho Manoa la mwwg nywxwngv koodul doonum, hoo bulv bulug nyuqm mam kedwb pvxwnum.

²¹‍At Swg gumtwngam Manoa la mwwg nywxwngv kaapa kumanum. Ho mwv At Swg gumtw goknyi hvl Manoa cengknum.

²²‍Hoo Manoa mwwg nywxwngam benum, “Ngulv hoggub nyijaqkam sita yuku, hoggab ngulv Pwnboam kaapa tukba.”

²³‍Hvbmabde mwwg nywxwngv mwam benum, “At Sw ngulam mengdy bov nyiloqkam, mwv boyuqnam akiam la dvs akiam ngulug alaq soqgv loorwq ram, ho ngulam soq pagoq tulu sam kaakin ram, ho soq pagoq tulu si nyitayin hvl ngulam pui baqkin ram.”

²⁴‍Hoo nyem ak hv nyega ko ak bwwnum hoo mwwg eminam Samson hvl goqnum. Hoo yaapa ak hv swwrab kunum, hoo At Sw mwam lvqcnum.

²⁵‍Hoo At Swg Yalv mwam Mahane-dan gvdag Jora gvla Estaol pengko ho dooi yikho ator jinum.