Read Nyishi NYEGAM 14 Bible Online

NYEGAM 14 - Nyishi bible

NYEGAM 14

¹Samson Timna ho innum, hoo Timna ho Palistanwg nyem ko tulug pengko ho nyijwr ak kaapanum.

²‍Ho mwwg ab-annam mwv cookur layil betamnum, “Ngo Timna ho Palistan nyem ko tulug pengko ho nyijwr ak kaalwq pen. Mwnwn ngoqg nywxwb ngam nvvj tvb.”

³‍Hvbmabde mwwg ab-annv mwam benum, “Noqg nyiin-orum pengko lo, ho ngulug nyiilu mwlwg pengko lo nyem nyijwr kvvlwqnam akkam dooma dvn yv, ho no pepaql-mux mvmanam Palistan nyi tulu hoqgv noqgab nywxw naata dvn?” Hvbmabde Samson mwwg abam benum, “Mwnwn ngoqgab naatbv, hoggab ngoqg vnyiqkv mwnwn kvvlwq pa.”

⁴‍Mwwg ab-annv At Swg hoqgv nyigdvn bo hvl cengmanum, hoggab mwv Palistan nyiam ceeko dvb albo moodam meegaqnum. Hoq moodho Palistanv Israelam pvvb bwwl doognum.

⁵‍Ho Samson la mwwg ab-annv Timnho innum, hoo bulv Timna roo boolu ho haanum. Hoo kaato, sony nyot nyopa dorg dugum guml mwwg dookub haanum.

⁶‍Ho At Swg Huqlwngv mwwg aoho haanum, hoo mwwg alaqho mwv hog gokam bwwma sunam, mwv sony nyotam sibin bindongam puc-pui mvnam hvb mvnum. Hvbmabde mwwg ab-annam mwv hoggv nyinum ham mwv betam maanum.

⁷‍Ho mwv hoqb innv nyem lvgab agam goonum, hoo mwn Samsonwg vnyiqho kvvlwqnum.

⁸‍Mee aal kokw so mwv mwnwn boota kub wkurnum. Hoo mwwg sony nyot mengnum svmangam mwv kaatab ajib wnum, hoo kaato, sony nyot svma ho tongngv haal aiyap mvl pumbuml doonum, hoo vtiv doonum.

⁹‍Mwwg alaqho hoqg tongngam pulin layil hoo mwv dvjol wnum. Hoo mwwg ab-annam mwv meeg bulam jinum, hoo bulv dvnum. Hvbmabde tongngam sony nyot svma hoqgv hoqlin panvk hvl mwv bulam betam maanum.

¹⁰‍Mwwg abv nyem dookub innum, hoo Samson hoqho dvmaq ak dvgnum, hoggab hoqhv yaapa tulug nyicwngv.

¹¹‍Mwam hwdlo nyiilungv kaapa twqda kalam bulv yaapa cammum go mwwg lvgab doomin gvm dvb boanum.

¹²‍Hoo Samson bulam benum, “Ngo nulam nwwtam-bvlam loq ak tox tayin. Hoqg niqtuqkam ngam nulv aal kvnwg dvmaq dvde so betam baloqkam, ngo nulam pud vj cammum go hoo albo vjam cammum go jitayin,

¹³‍hvbmabde nulv ngam hoqg niqtuqkam betam nyoma baloqkam, nulv ngam pud vj cammum go hoo albo vjam cammum go jidwb nyitayin.” Hoo bulv mwam benum, “Noqg nwwtam-bvlam ham xwwka to, ho ngulv ham taka tayin.”

¹⁴‍Hoo mwv bulam benum, “Dvn-twwnbo hoqgv hoqg dvs ak lengdo hoggv. Ator jaqn bo hoqgv tiiswrv lengdo hoggv.” Hoo aal loum gob nyis paku bulv nwwtam-bvlam niqtuqkam belin nyomanum.

¹⁵‍Aal loopy deenho bulv Samsonwg nywxwngam benum, “Noqg nyolam maanyoq gvdwl nwwtam-bvlam hoqg niqtuqkam toxto, hvbmab nyiloqkam ngulv nam la noqg abwg imiq dvparam wm toloq tayin. No ngulam so goqanam si jwwgw mvpa dvb goqanam yv?”

¹⁶‍Hoo Samsonwg nywxwngv xabl benum, “No ngam oyum twqdo; no ngam aby maado. No ngoqg nyiilungam nwwtam-bvlam ak tox paku, hoo hoqg niqtuqkam no ngam bekin ma.” Hoo mwv mwnwn benum, “Kaato, ngoqg abam kam hoo annam kam ngo betam ma, hoo ngo nam betam yin do i?”

¹⁷‍Dvmaq dvnamv aal kvn gob nyil doonam xaqb, mwwg agaho mwn xabl doonum, hoo kvn aalho mwv mwnwn betam kunum, hoggab mwn mwam beteq tiqtwnum. Ho mwn mwnwg nyiilungam nwwtam-bvlam niqtuqkam bekin kunum.

¹⁸‍Hoo kvn aalwg doonyi haama taab bopamg nyiilungv mwam nwwtam-bvlam niqtuqkam betamnum, “Hoggv tong vtiam tiibin yaadwn? Hoggv sony nyot akam ator yaadwn?” Hoo mwv bulam benum, “Nulv ngoqg svv lvgab hal beemin gvma nyiloqkam, nulv ngoqg nwwtam-bvlam niqtuqkam ceng ram.”

¹⁹‍Hoo At Swg Huqlwngv mwwg aoho haanum, hoo mwv Askelonwb innv bopam hoqg nyi cammum go mengnum hoo bulug vjam naalayil hiyv nwwtam-bvlam niqtuqkam belinbo ham jinum. Mwv vcjaqb haaxaq kunv mwwg abwg nammwb wkur kunum.

²⁰‍Hoo Samsonwg nywxwngam mwwg jimbw paadangam ya jikub kunum.