Read Nyishi NYEGAM 15 Bible Online

NYEGAM 15 - Nyishi bible

NYEGAM 15

¹Meeg aal kokwg wtw am nvvdy moodho Samson sibin bindo dorg boolayil mwwg nywxwngam kaatab haanum. Hoo mwv benum, “Ngoqg nywxw dook pwqlw urab ngo haatayin.” Hvbmabde mwnwg abv mwam urab wwm mvmanum.

²‍Hoo mwnwg abv benum, “Ngo mwwgamv no mwnwn vcjaqb oyum paku mwwnum, hoqgab ngo mwnwn noqg jimbw paadangam nyem jitkun. Mwnwg bwrm ak si mwnwn kangam yaama yv? Mwnwg kwlib bwrm sam naato.”

³‍Hoo Samson bulam benum, “Soq mood so ngo Palistan tulungam hentwr hem dvb jitanam tulu ham ngo hog akam gorgy naaram.”

⁴‍Hoqgab Samson wnv siyal 300 go nootunum hoo mur ata go naanum. Hoo mwv bulug ami-amiam hiqsiq tvl hoo vnyig ami pengko ho wm tolwqnum.

⁵‍Hoo mwv wm mam tolwq tvl hoo siyal tulungam Palistan tulungam rongo rwqtaqb tolwql topaqnum hoo bulug wmv am paal apnam mam la am doqdu boam la olib svvnam wm guiyum kunum.

⁶‍Ho Palistan tulungv benum, “Hiyv soq sam nyipa kun?” Hoo bulv benum, “Timnag maqb Samson, hoggab mwwg nywxwngam mwv mwwg jimbw paada yaangam jikub jinum.” Palistan tulungv haanv mwnwn la mwnwg abam wm lvgab gux mvnum.

⁷‍Hoo Samson bulam benum, “Nulv soq sib nyid nyiloqkam, ngo dingr gvi yin, ngo nulam kwly naatayin, hoo ngo bulam apaq xiqtayin.”

⁸‍Hoo mwv bulam gvvs hoola xarpongam jwwl naleqgo mengnum, hoo mwv akob innv hoo Etamwg wlw lwwraq bwdwho doonum.

⁹‍Ho Palistan tulungv caabnv Judangam hwwiyumnum hoo Lehi ho nyob panum.

¹⁰‍Hoo Juda nyi tulungv benum, “Hoggab nulv ngulam ceeko taab caaiyin?” Bulv benum, “Ngulug soq caanam si Samsonnvn leetab caaiyin, ho mwv ngulam hoggub nyinum hvbkalam ngulv mwam nyitayin.”

¹¹‍Ho nyi 3,000 go Juda hoqgv Etamwg wlw lwwraq bwdwb innum, hoo Samsonnvn bulv benum, “Palistan tulungv ngulam pvvb bwwl doogdvn hvl no cengma dvn yv? Hoggv soq sib no ngulam nyipup pakun?” Hoo mwv bulam benum, “Bulv ngam hoggub nyinum, hvbkalam ngo bulam nyinum.”

¹²‍Hoo bulv mwam benum, “Ngulug soq inam si nam leetab, ho ngulv nam Palistan tulug alaqho jilwqtayin.” Hoo Samson bulam benum, “Nulv ngam mengram hvl nulv atv dingr to.”

¹³‍Bulv mwam benum, “Ma, ngulv nam leetwq tayin hoo bulug alaqho jilwqtayin. Ngulv hoggub nyijaqkam nam mengram.” Ho bulv mwam nitbo sooxw soonyi go leetwl wlw lwwraq bwdw hoqgv mwam boocanum.

¹⁴‍Hwdlo mwv Lehi ho haai kun, Palistan tulungv goqr rol mwam wrwqnum. Ho At Swg Huqlwngv mwwg aoho haanum, hoo mwwg alaqkam raqnan sooxw tuluhv takinam wm gugab yin jiqnam hvb, mwwg alaq hoqgv jiqpaq lengnum.

¹⁵‍Hoo mwv nit kusuqbo svdam coqklo alo ak kaapanum, hoo ham mwwg alaqkv naanum, hoo mwv hoq lvgab nyi 1,000 go mengnum.

¹⁶‍Hoo Samson benum, “Svdam coqklo alo lvgab pvvsiq-pvvsiq paaca dvb, svdamg coqklo alo lvgab ngo nyi lwwyw go mengpa kun.”

¹⁷‍Hwdlo mwv hoqg agam mam benya kalam twqda, mwv coqklo alongam mwwg alaq hoqgv hurpaq kunum. Hoo hoq nyookam Ramat-lehi hvl benum.

¹⁸‍Hoo mwv vcjaqb hvngwrnum, hoo mwv At Swn goql hoo benum, “No ngam soq koibo ywwlinam sam noqg nyera alaq hoqgv nyim paku, hoo ngam sija hvngwr gab sim tan yv hoo pepaql-mux mvmanam nyi tulug alaqho haam kub yv?”

¹⁹‍Hoo Lehi ho Pwnbov deela nyookam deegoq goqmnum, hoo hoq hoqgv issiv tolinum. Hoo hwdlo mwv ham twwi kun, mwwg yalv hookur kunum, hoo mwv ator tordar kunum. Hoqgab hoqham En-hakkore hvl eminum; hoqhv soolo godab Lehi ho doodwn.

²⁰‍Hoo Palistan tulug moodho mwv Israelam vnyw camnyi gob nyegam pal doognum.