Read Nyishi NYEGAM 16 Bible Online

NYEGAM 16 - Nyishi bible

NYEGAM 16

¹Samson Gajab wnum, hoo mwv meqjo bo nyem ak kaapanum hoo mwv mwnwg dookub wnum.

²‍Gaja nyi tulungam betamnum, “Samson si haapa.” Hoo bulv nyookam gooyumnum hoo bopamg toggoqho ai yupw mwam tooiya yaal doonum. Bulv ai yupw ody maab cooikab doonv begamv, “Aaram huto namgub ngulv tooiya tuj; ho ngulv mwam mengtuj.”

³‍Hvbmabde Samson ai nywyw ra namgub dootwqnum, hoo ai nywyw ra gorab kunv bopam toggoq viyap pam la swwrw dvvnyiam gvbwnum, hoo ham cuqlinum, yoqdwram la hog mwlwngam, hoo ham mwwg gorbw ho joolayil yorn aob jooca nv Hebronwg agaho joopnum.

⁴‍Hoq kokw so mwv Sorek Lywpa ho nyem ak abynum, hoqg eminv Delila.

⁵‍Hoo Palistan tulug bir abv mwnwg dookub haabnv hoo mwnwn benum, “Mwam soi puuto, hoo mwwg koibo atorv hogloq ho doodwb ham cengto, hoo ngulv hoggub nyiba lo mwam mutu tayin, ho ngulv mwam raql yan dvb mviyin dvn. Hoo ngulv nyiicwr-cwrxiv nam 1,100 rup vjwr loq jitayin.”

⁶‍Hoqgab Delila Samsonnvn benum, “Noqg koibo atorv hogloq ho doodwn ngam anya mwwpa gvdwl betam tvb, hoo nam nyi akkam mutu nyoma do, ho hoggub nyibo lo nam nyiv raqnyi tayin.”

⁷‍Samson mwnwn benum, “Bulv ngam lexa leelaqbo hoqgv kvn go raqb nyiloqkam, ho ngo laanyi maab hoo nyi nyiisam hvb nyitayin.”

⁸‍Ho Palistan tulug bir atv mwnwn lexa leelaqbo hoqgv kvn go bwa jinum, hoo mwn mwam hoq lvgab raqnum.

⁹‍Sija mwn asaq pwqlw ho nyega ata go toosil dooiya mvnum. Hoo mwn mwam benum, “Samson, Palistan tulungv hoodu do!” Hvbmabde mwv lexangam jiqkum-jiqlum dvb mvnum, tanam wm lo mvdaq yin jiqkum-jiqlum nam hvb nyinum. Ho mwwg kvsil ator doognam mam cengmanum.

¹⁰‍Ho Delila Samsonnvn benum, “Kaato, no ngam vm mvvl hoo paca dvb mvpa ku. Nam hoggub jaq roqtu nyotayin anya mwwpa gvdwl ngam betam tvb.”

¹¹‍Hoo mwv mwnwn benum, “Bulv ngam nitbo svxa ata go raqb nyiloqkam, ho ngo laanyi maab hoo nyi nyiisam hvb nyitayin.”

¹²‍Hoqgab Delila nitbo svxa ata go naalayil hoq lvgab mwam raqnum hoo mwam benum, “Samson, Palistan tulungv hoodu do!” Hoo asaq pwqlw ho nyega ata go toosil dooiya mvnum. Hvbmabde mwv svxangam tan hvb mwwg alaqkv puriqnum.

¹³‍Ho Delila Samsonnvn benum, “Sija godab no ngam vm mvvl hoo paca dvb mvpa ku. Betam tvb nam hoggub nyil roqtu nyotayin.” Hoo mwv mwnwn benum, No ngoqg dumpo dum sam kvn go kwqg dvl wswq lvgab hiqtu tvl hoo ham vcjaqb rubtinl silo lvgab xubtin baloqkam, ho ngo laanyi maab hoo nyi nyiisam hvb nyitayin.”

¹⁴‍Ho hwdlo mwv yubngaq yikho, Delila mwwg dumpo dum mam pvvkwq kvn go kwqtwl hoo ham wsw lvgab rwwtul apnum. Hoo mwn hoq tulu ham vcjaqb silo lvgab taqtinl apnum hoo mwam benum, “Samson, Palistan tulungv hoodu do!” Hvbmabde mwwg yubnam hoqgv mwv gorabnum hoo silongam la rubtinl apnanam, hoo wswqkam pusuql wgnum.

¹⁵‍Hoo mwn mwam benum, “Hoggub no bela dvn, ‘ngo nam aby dvn,’ hwdlo noqg hangv ngoqg lvgab dooma tvl? No ngam loum go pacab mvpa ku, hoo no ngam noqg koibo ator doognam mam bekin kuma.”

¹⁶‍Hoo hwdlo mwn mwam aal-aiyib beteq tiqtwl mwam beikun, mwwg yvjv mwwdwq sita kunum.

¹⁷‍Hoo mwv mwnwn mwwg hvvjw hoqgv betaml hoo mwnwn benum, “Ngoqg dumpo dum mam nywywngam yoqciq reqka maapwn, hoggab ngoqg annwg kepo hoqgv Pwnbo gab Najiraitwb nyinum. Ngoqg dum mam reqk baloqkam, ho ngoqg atorv ngam wleq tayin, hoo ngo laanyi maab hoo nyi nyiisam hvb nyitayin.”

¹⁸‍Hwdlo mwwg hvvjw hoqgv betamnam mam Delila tapa yukun, mwn Palistan tulug bir atam pui bilwql goql begamv, “Lokta haato, hoggab mwwg hvvjw hoqgv mwv ngam betam paku.” Ho Palistan tulug bir atv mwnwg dookub haanum hoo bulug alaqho twngkam bwwlwq jinum.

¹⁹‍Mwn mwam mwnwg xarpo ho yubdub mvnum. Hoo mwn nyi ak goqanum hoo mwwg dumpo dum mam pvvbw kvn go hiqnam mam reqxa mvnum. Ho mwn mwam hentwr hemin mvnum, hoo mwwg atorv mwam wleq kunum.

²⁰‍Hoo mwn benum, “Samson, Palistan tulungv hoodu do!” Hoo mwwg yubk hoqgv mwv huurabnum hoo benum, “Otuq moodho nyinam hvb ngo hoggub wnam hvb wtayin hoo ngo atv mwpy sutayin.” Hvbmabde At Sw mwam wleq kunam mam mwv cengk maanum.

²¹‍Hoo Palistan tulungv mwam nootu kunum hoo mwwg vnyiqkam harlin xaatwl hoo mwam Gaja ho boolnum hoo mwam tama gai lvgab roqtunum. Hoo pvtwq uraho mwam dux hunam bonam nyim kunum.

²²‍Hvbmabde dum mam reqxo kokw so, mwwg dumpo dumv meeg hwrlin kunum.

²³‍Palistan tulug bir at tulungv hookuml bulug pwnbo Dagonnvn koibo pwr aky jil hoo hwnyir-hvmarl, hoo bulv benum, “Ngulug pwnbov ngulug ceebio Samsonnvn ngulug alaq si jilwq paku.”

²⁴‍Hoo hwdlo nyiilungv mwam kaapa yin, bulug pwnboam bulv paqnum. Hoggab bulv benum, “Ngulug pwnbov ngulug ceebiongam ngulug alaq si jilwq paku, ngulug gvdangam mucu-mviya boam, ho hiyv ngulug nyiam naleqgo mengnum.”

²⁵‍Hoo hwdlo bulug hangv hemp yin, bulv benum, “Samsonnvn goqlin to, ho mwv ngulam nyinyir-nyimar jitayin.” Ho bulv Samsonnvn pvtwq hoqgv goqlinum, hoo mwv bulam nyinyir-nyimar jinum. Bulv mwam swwrw dvvnyig pengko ho daqnum.

²⁶‍Hoo Samson mwam nootu bo yaapangam benum, “Ngam nam swwrw nootu mvdwb jitbv, ho ngo hoqho yiigw tvl daqta yin.”

²⁷‍Ho namho nyega ngvla nyemv bwrtvl doonum. Palistan tulug bir at mwlwngv hoqho doonum, hoo nam aoho nyem-nyegab nyiingv 3,000 go Samsonwg nyinyir-nyimarnam mam kaal doonum.

²⁸‍Ho Samson At Swn dvgoql benum, “Pwnbo At Swa, ngam anya mwwpa tvb hoo ngam anya mwwpal soq lvkin arro so ator jitwbv, Pwnboa, ho ngoqg vnyiq nyiqnyi gab Palistan tulu sam kwly naape kun pv.”

²⁹‍Hoo Samson nammam dvqgw bo lvpa raag swwrw dvvnyiam vcjaqb gvbwnum, hoo mwwg gv viyam mwv hoqho yiigwnum, mwwg lvqbwq alaqkv swwrw daagwn hoo laqc alaqkv swwrw daagwn gvbwnum.

³⁰‍Hoo Samson benum, “Palistan tulungam ngo sig mvt kubv.” Ho mwwg ator mwlw hoqgv mwv pvxwnum, hoo nammv gaml kunv bir at tulungam la nam uraho doonbo nyiilu mwlwngam gamtin kunum. Ho mwwg sid moodho nyi sig kunamv mwwg swwl dooi yikho mengnam mam koi yaaknum.

³¹‍Ho mwwg vbw-borv la mwwg imiq nyi mwlwngv iknv hoo mwwg svmangam naala yukul hoo mwam baqca kunum hoo Jora gvla Estaol pengkog mwwg ab Manoag nyubuho mwam liiknum. Mwv Israelam vnyw camnyi gob nyegam pal doognum.