Read Nyishi NYEGAM 17 Bible Online

NYEGAM 17 - Nyishi bible

NYEGAM 17

¹Iprayimg diisw gvdaho nyi ak doonum, hiyvg eminv Maika.

²‍Hoo mwwg annam mwv benum, “Hwdlo noqg hoqgv 1,100 rup vjwr ram naaiyikho, no hoq pagoq gab beenum, hoo ham ngoqg nyuru taga so benum, kaato, hoq rup hv ngoqg lvgab si doodo; ngo ham naanum.” Hoo mwwg annv benum, “At Swg ngoqg ko tuupam lvqc cignvka.”

³‍Hoo mwv 1,100 rup vjwr ram mwwg annam jikur kunum. Hoo mwwg annv benum, “Ngoqg ko tuup gab, ngoqg alaq soqgv ngo rup sam At Swn darxaqnum, svvda guss ak la yoqdwr guss ak mvn mvdwb. Hoqgab sija ngo nam sam jikur gvi kun.”

⁴‍Hoqgab hwdlo mwv twngkam mwwg annam jikur yukun, mwwg annv 200 go rup vjwr ram naanum hoqham rup yip pwnboam jinum, ho ham hiyv svvda guss ak la yoqdwr guss ak mvnum. Hoo hoqhv Maikag namho doonum.

⁵‍Hoo soq nyi Maika si yugw ak doonum, hoo mwv nyub gab kamt vjam la nam gab pwnbo tulungam mvnum, hoo mwwg ko tuup tulu hoqgv akwn nyub swwm dvb xuqlin kunum.

⁶‍Hoq moodho Israelho lvpw at doomanum. Nyiicwr-cwrxiv atwg vnyiq kvvlwq kob nyinum.

⁷‍Juda gvdag Betleham ho doonbo Judag imiq hoqgv nyi yaapa ak doonum, mwv Lebi nyi akv, hoo mwv hoqho nyiogy giabov.

⁸‍Hoo nyi ak hv Juda gvdag Betleham hoqgv nyiogy wnv nyook meegaqnum. Hoo mwv nyiogy wnv Iprayimg diisw gvda Maikag namho haanum.

⁹‍Hoo Maika mwam benum, “No hogloqkv haai yin?” Hoo mwv mwam birwqnum, “Ngo Juda gvdag Betlehamg Lebi nyiingv, hoo ngo nyook meegaql nyiogy wdu dvn.”

¹⁰‍Hoo Maika mwam benum, “Ngoqg lvgab dooba to, hoo ngoqg ab bvla nyubwb nyitbv, hoo ngo nam vnywngam rup vjwr camg la vj koosam hoo noqg dvs-twwsam jitayin.” Hoo Lebi nyi akv hoqb haanum.

¹¹‍Hoo nyi lvgab dooba dvb Lebi nyi akv xumt kunum, hoo yaapa ak hv mwwg ko tuup akgon hvb nyinum.

¹²‍Hoo Maika Lebi nyi ham darxaql xuqlinum, hoo yaapa ak hv mwwg nyubwb nyiknum, hoo Maikag namho doonum.

¹³‍Ho Maika benum, “Ngo sija cengdo At Sw ngam swwm-geem dvb jitayin, hoggab Lebi nyi akv ngoqg nyub gob nyipa kun.”