Read Nyishi NYEGAM 18 Bible Online

NYEGAM 18 - Nyishi bible

NYEGAM 18

¹Hoq moodho Israel ho lvpw at doomanum. Hoo hoq moodho Danwg nyob nyiilungv doogw ko gvda meegaqnum, hoggab hoq mood namgub bulam Israelwg pengko hoqgv gvda otungam jima tanum.

²‍Hoqgab Danwg nyiilungv bulug nyob hoqgv nyi pwbw bo ang go Jora la Estaol hoqgv gvdangam mvqky-maqlam mvl hoo gvqyiql kaam dvb nyi kanamnum. Hoo bulv bulam benum, “Gvdangam wgdvl gvqyiql kaata.” Hoo bulv Iprayimg diisw gvdag Maikag namho haanum, hoo hoqho bulv doonum.

³‍Hwdlo bulv Maikag namho dooyikho, bulv yaapa Lebi nyi agam yalam tacinum. Hoo bulv mwwg dookub haanv hoo mwam benum, “Nam so hiyv boanum? No soq nyook so hoggv mudu dvn? Hoggv no so nyis nyidu dvn?”

⁴‍Hoo mwv bulam benum, “Soq sib Maika ngoqg lvgab nyiknum: mwv ngam ree goqpa ku, hoo ngo mwwg nyub gob nyipa kun.”

⁵‍Hoo bulv mwam benum, “Ngulug soq nyiody boonam si niqtuq lengyin dvn yaabdw, Pwnbog mwwlwqkam tox kvka tvb.”

⁶‍Hoo nyubv bulam benum, “Swrsob wn ka. Nulug nyiody boonam mam At Sw kaal doodo.”

⁷‍Ho nyi ang hv wknv hoo Laisho haaknum hoo hoqho doonbo nyiilungam kaanum, ho Sidon nyi tulungv cooikab doonam hvb, bulv bos haai maab doonum, hoo mwum dvb nyimanum, hog akkam swcw soqgv pvhwq maanum hoo naleqgo gumn-ran doognum, hoo bulv Sidon nyiilungam alyab doonum hoo nyi asaq lvgab hog akkam lvqry-laqso mvl doomanum.

⁸‍Hoo hwdlo bulv bulug vbw-bor tulu dook Jora la Estaol ho hookur yukho, bulug vbw-bor tulungv bulam benum, “Hoggv nulv pui baqtam tadwn?”

⁹‍Bulv benum, “Gorabto, hoo ngulv bulam ceeko taaj, hoggab ngulv gvdangam kaape kun, hoo kaato, gvdangv aljaq deen. Hoo nulv hog akkam nyiram yv? Gvdangam haal otu naadwb nyinyiaq bviyaqb nyidu maabv.

¹⁰‍Hwdlo nulv wda kalam, nulv nyi mwum maab nyinbo nyiilug dook ho haatayin. Gvdangv koi jaqden, hoggab Pwnbov ham nulug alaqho gvqlwq pakun, swcw soqg doonbo hog luucw-luutv nyook ho pvhwq maab doodwn.”

¹¹‍Hoqgab Danwg nyob hoqgv nyi 600 go nyob panbov nyob pananam mwx-mvaq layil Jora la Estaol hoqgv lengnum,

¹²‍hoo caanv Juda gvdag Kiriat-jearim ho svmcw mvl doonum. Hoqgab soolo godab hoq nyookam ham Mahane-dan hvl bedwn; kaato, hoqhv Kiriat-jearim dou-haaga ho doodwn.

¹³‍Hoo bulv wknv Iprayimg diisw gvdag Maika namho haanum.

¹⁴‍Ho Lais gvdangam mvqky-maqlam mvnbo nyi ang hv bulug vbw-bor tulungam benum, “Soq nam tulu so nyub lolup vjv, nam hoqg pwnbo tulungv, svvda ak la yoqdwr guss ak mvnamv doodwn hvl nulv cengs i? Hoqgab sija nulv ham mwwka to hoggv nyitayin.”

¹⁵‍Hoo bulv hoqb ajib wknv Maikag namho doonbo Lebi nyi yaapa dook nammwb haanum, hoo mwam mwwg al-korwb doonam mam toxnum.

¹⁶‍Ho Danwg nyob hoqgv nyi 600 go nyob panbov nyob pananam baqtwl haagag toggoqho daqnum.

¹⁷‍Hoo hwdlo nyub ak hv haagag toggoqho nyob patab haanbo nyi 600 ham agam goodu yin, mvqky-maqlam mvnbo nyi ang hv nam urab haanv hoo svvda guss sam, nyub lolup pam, nam hoqg pwnbo tulungam, hoo yoqdwr guss sam naanum.

¹⁸‍Hoo hwdlo soq nyi tulu si Maika nam urab haal hoo svvda guss sam, nyub lolup pam, nam hoqg pwnbo tulungam, hoo yoqdwr guss sam naaikam, nyub ak hv bulam benum, “Hoggv nulv nyidu dvn i?”

¹⁹‍Hoo bulv mwam benum, “Cooikab dooto; noqg alaqkv noqg agam mam momtum to hoo ngulug lvgab haat hoo ngulug ab bvla nyubwb nyito. Nyi akin namho nyub swwnamv alyad nvi yv, ma Israelwg nyob akwg pengko ho nyub swwnamv alyad nvi yv?”

²⁰‍Hoo nyub hoqg hangv hempnum. Mwv nyub lolup pam hoo nam hoqg pwnbo tulungam hoo svvda guss sam naanum hoo nyiilu lvgab wmin gvnum.

²¹‍Hoqgab bulv ko anyo tulungam la tuun-meengam hoo dupum-dvrab pam vlwq tvl bulug otuqb wco mvknum.

²²‍Hwdlo bulv Maikag nam hoqgv vigo aadob wikuk ho, Maikag namho doonbo nyi tulungam goqlayil, hoo bulv Danwg nyiilungam ruqtinum.

²³‍Hoo bulv Danwg nyiilungam sogoql benum, ho bulv tobkurnv Maikanvn benum, “Hognvk pagoq go, no soq nyi tulu sam boolayil so haai yin?”

²⁴‍Hoo mwv benum, “Nulv ngoqg mvnam pwnbo tulungam la nyub naapa, hoo wleq paku, hoo hoggv ngoqg lvgab dood ku? Hvnyiloqkam nulv ngam hoggub tox dvn, ‘Hognvk pagoq go?”

²⁵‍Hoo Danwg nyiilungv mwam benum, “Noqg agam yalam ngulam tapa mvmabv, hvbmaba loqkam hang lengn bo nyiv noqg aoho haata do, hoo noqg swwgam la ngoqg imiq dvparag swwgam yuupaq gvta do.”

²⁶‍Ho Danwg nyiilungv bulug lamtab wknum. Hoo hwdlo Maika mwam ator yaadwb bulam mwv kaapa yin, ho mwwg nammwb mwv tobkurl wkur kunum.

²⁷‍Hvbmabde Danwg nyiilungv Maika hognvkv mvnum ham bulv naal wg kunum, hoo mwwg nyubam kam bool wg kunum, hoo bulv cooikab la mwum maanbo nyiilug dook Lais ho haanum, hoo bulam lyoqr orioq hoqgv mengnum hoo bopam mam wmv tolwqnum.

²⁸‍Hoo bulam nyi akkam ywwlin bo doomanum hoggab Sidon hoqgv vigo aadonum, hoo bulv nyi asaqkam lvqry-laqso akkam doomanum. Hoqhv Bet-rehob lywpa ho nyinum. Ho bulv bopam mam mvdar tvl hoqho doonum.

²⁹‍Hoo bulv bopam mam Dan hvl emin kunum, Israelnvn ko bwwjnum, bulug ab Danwg eminho mingnum; hvbmabde bopam hoqg otuq eminv Lais hvl mingnum.

³⁰‍Hoo Danwg nyiilungv svvda guss sam bul atgab mvp kunum, hoo Mojesg ko tuup Gersomwg ko tuup Jonatan la mwwg ko tuup tulungv Danwg nyob tulug nyub gob nyiknum, ho gvdangam nyumwb boonam aal xaqb bulv doonum.

³¹‍Hoqgab hog hwdgo Pwnbog namlongv Silo ho doonum hwd kalam go, Maikag svvda guss mvnam mam bulv doom dvb mvl apnum.