Read Nyishi NYEGAM 19 Bible Online

NYEGAM 19 - Nyishi bible

NYEGAM 19

¹Hoq moodho Israel ho lvpw at doomanum, ho Lebi nyi ak Iprayimg diisw gvda nampam ura jaq hoqgv mwwg atgab xwwbaq nywxw ak Judag Betleham hoqgv naanum.

²‍Hoo mwwg xwwbaq nywxw hv mwam dengkib nyijmanum, hoo mwn mwwg hoqgv mwnwg ab nam Judag Betlehamg wkur kunum, hoo hoqho pool bvrpy gob doonum.

³‍Ho mwnwg nyolv mwnwn maanyoql nammwb bookur dukub mwnwg kokwb wmin gvnum. Mwwg nyera ngvla svdam ata go mwwg lvgab wba kunum. Hoo mwn mwam mwnwg ab namho boolwq kunum. Hoo hwdlo nyem hoqg abv mwam kaapa yin, ho mwv hempwl mwam kvvrwqtab haanum.

⁴‍Hoo nyem hoqg ab, mwwg at akv mwam doonu dvb jinum, hoo mwwg lvgab mwv aal loum go doonum. Ho bulv dvl-twwl hoo aiyam ho yubnum.

⁵‍Hoo loopy deen aalho bulv ar komc gorabnv hoo mwv wdkub mwx-mvaqnum, hvbmabde nyem hoqg abv mwwg maqb akam benum, “Dwjwl ator dvb dvs-twwsam dvpe-twwpe kul, hoq kokwb no wt ku.”

⁶‍Hoqgab vnyiv dootwl lvkin gob dvl-twwl doonum. Hoo nyem abv mwam benum, “Anya mwwpa gvdwl soi yupe, hoo noqg hangam hwnyir-hvmar mvto.”

⁷‍Hoo hwdlo nyi akv wdkub nyiyin, ho ai yubg ta yupek hvl, mwwg at akv mwam hvraqb benum.

⁸‍Hoo loong deen aalho ar komc gorab layil wdkub nyinum. Hoo nyem hoqg abv benum, “Dwjwl ator dvb dvs-twwsam dvpe-twwpe, hoo meeg aal namgub kaaya to.” Ho bunyiv lvkin gob dvl doonum.

⁹‍Hoo hwdlo mwv la mwwg xwwbaq nywxwngv hoo mwwg nyera tulungv wrab dvb nyiyi kam, mwwg at, nyem hoqg abv, mwam benum, “Kaato, aalv wiyuml ariyum tadku. Hoqgab anya mwwpa gvdwl soi ta doope hvl benum. Kaato, aalv wiyum paku. So doonu pe hoo noqg hangam hwnyir-hvmar mvto, hoo aaram mam komcib gorab gvdkul no nyiody bool noqg nammwb wnku.”

¹⁰‍Hvbmabde nyi ak hv hoq aiho doonu kumanum. Hoqgab mwv gorab kunv hoqgv wrab kunum hoo Jebus (hoqhv, Jerusalem) taqcgon ho hvvc kunum. Dupum-dvrab baqnbo svdam tulu ngvla mwwg xwwbaq nywxwngv mwwg lvgab wnum.

¹¹‍Hwdlo bulv Jebus ogum ho haaikun, aalv wnya svtwqb nyiknum, hoo nyerangv mwwg atam benum, “Kuj ngulv Jebus nyi tulug bopam taqcib haagdvl soi alo yubtaj.”

¹²‍Hoo mwwg at mwam benum, “Ngulv nyoodo nyi tulug bopam taqcib wma buju, hoqgab bulv Israelwg nyiilu ma, hvbmabde ngulv Gibea yaab wnuj.”

¹³‍Hoo mwv mwwg yaapa nyi ham benum, “Kuj ngulv Gibea maalo Rama nyook ak gon yaab soi doonu taab wnuj.”

¹⁴‍Hoqgab bulv wtw-kwlwl hoo bulam lamtab wknum. Hoo Benjamin gvdag Gibea ogum ho doonyiv bulam hoop kunum,

¹⁵‍hoo bulv Gibea lamtab haanbob haamin gvnv hoq aiho Gibea ho yubtab haanum. Hoo mwv pamda urab haanv bopamg deela ho doonunum, hoqho bulam nyi akkam mwwg nam urab aiho haal dootwk hvl boomanum.

¹⁶‍Hoo kaato, ariyum nyekam ak mwwg rongo hoqgv bon nyipe kul hoodul doonum. Nyi ak hv Iprayimg diisw gvda hoqg nyiv, hoo mwv Gibea ho nyiogy haal dook bov. Hoq nyook hv Benjamin nyi tulug gvdangv.

¹⁷‍Hoo mwwg vnyiqkv piorabl kaanamv nyoyw wnbo tulungv bopamg deela ho doonam mam mwv kaapanum. Hoo nyekam akv benum, “Nulv hogloqb wdu dvn? hoo hogloqkv nulv haai yin?”

¹⁸‍Hoo mwv mwam benum, “Ngulv Judag Betleham ham wpeq layil Iprayimg diisw gvdag nampam ura jaq hoqgv ngo haai yin. Ngo Judag Betlehamb wnum, hoo ngo At Swg nammwb wdu dvn, hvbmabde nyi akkam ngam mwwg nam urab haatwk hvl boomanum.

¹⁹‍Ngulug svdam tulu gab ngulv am piil dvsam baqs pan, noqg nyera akwg lvgab wtw dvsam la ala twwsam ngoqg paqn gab hoo yaapa nyiilu gab baqs pan. Ngulug lvgab hog akkam pwwmab nyima.”

²⁰‍Hoo nyekam akv benum, “No swrso nvka; ngo noqg hog mwlwngam koocum tayin. Deela jaqho soi doomabv.”

²¹‍Hoqgab mwam mwwg nam urab mwv boolwqnum hoo svdam tulungam dvs jinum. Hoo bulug all-alaqkam bulv hurs tvl, hoo dvk-twwknum.

²²‍Bulv hwnyir-hvmarl soodu-nyirdu yikho, kaato, bopamg dooxa bo nyi tulungv nammam gooyum tvl viyap pam jwwdinl benum. Hoo bulv nam at nyekam mam benum, “Noqg namho haanbo nyega akam soq boolin to, ho mwv hiyv ngulv cengyin do.”

²³‍Hoo nam at nyekamv lvvgwb lengnv hoo bulam benum, “Ma, ngoqg vbw-bor tulu, nyic-nyia nyimabv; soq nyi ak si ngoqg nam so nyiinwb haapa ku, soq almab nyinam sam nyimabv.

²⁴‍Kaato, soq si ngoqg mvvngam nyem la mwwg xwwbaq nywxwngv doodo. Ngo sija bulam boolin jitayin. Bulam hoggv nulv almab nyinw dvn hoo hoqgv nulv al mwwpa dvn ham bulug lvgab nyito, hvbmabde soq nyi lvgab soq nyic-nyia pagoq sam nyimabv.”

²⁵‍Hvbmabde nyi tulungv mwam tamanum. Hoqgab nyi ak hv mwwg xwwbaq nywxwngam nootu layil mwnwn bulug alaqho gvqlwqnum. Hoo bulv mwnwn tublil nyinum hoo ai hoqgv ar namgub mwnwn bej-beparl benum. Hoo ar dooko koar-komar yukho, bulv mwnwn wwm kunum.

²⁶‍Hoo ar yukho nyem akv haaknum hoo mwnwg at akwg dook, nyi akwg nam viyap ho geqp tvl huto namgub doonum.

²⁷‍Hoo mwnwg atv ar komc gorabnum, hoo hwdlo mwv nam hoqg viyap pam ciqkonum hoo mwwg lamtab wta kunum, hvbmabde kaato, hoqho mwwg xwwbaq nywxw hv, mwnwg alaqkam viyap yiigwngam giigab tvl karl doonum.

²⁸‍Mwv mwnwn benum, “Gorabto, kuj wn kuj.” Hvbmabde hog birwq kumanum. Ho mwv mwnwn svvda aoho jooca kunum, hoo nyi ak hv cao kunv hoo mwwg nammwb wknum.

²⁹‍Hoo hwdlo mwv mwwg namho hvvc yukun, mwv orioq daag naanum hoo mwwg xwwbaq nywxwg svmangam gvbw tvl camleq cinyi gob twqmwqnum, hoo mwnwg vdinam Israelwg dwrbu-dwrya mwlwb kanam kunum.

³⁰‍Hoo ham kaanbo mwlwngv benum, “Soq sib nywywngam nyika ma ho kaaka kama Israel nyiilungv Ijipt gvda hoqgv lengyik aal hoqgv soolo godab; sam mwwka to, tomswr-hony koto, hoo agam gooto.”