Read Nyishi NYEGAM 2 Bible Online

NYEGAM 2 - Nyishi bible

NYEGAM 2

¹Sija At Swg gumtwngv Gilgal hoqgv Bokim namgub caanum. Hoo mwv benum, “Ngo nulam Ijipt hoqgv boolinum hoo nulug ab tulungam jidwb dingr kunam gvdaho nulam boolwq pakun. Ngo benum, ngo nywywngam nulug lvgab birnam pvvbam ngo mvpia ram,

²‍hoo nulv soq gvda so doonbo nyi tulu lvgab birnam pvvb mvmabv; nulv bulug yugw tulungam mvpaq tayin.’ Hvbmabde nulv ngoqg gomcwram tvjwl swwk ma. Hoggub nulv soq sib nyipa kun?

³‍Hoqgab ngo sija bedwn, ngo bulam nulug aga hoqgv ruqlinl ruqpaq kuram, hvbmabde bulv nulug bviywrho taa tulu gob nyitayin, hoo bulug pwnbo tulungv nulam pwd-poto gob nyitayin.”

⁴‍At Swg gumtwngv soq gomcwr tulu sam Israelwg nyiilu mwlwngam beda kalam nyiilungv bulv lvkin gob sogoql xabnum.

⁵‍Hoo bulv hoqg nyookam Bokim hvl eminum. Hoo bulv At Swn hoqho pwr jinum.

⁶‍Hwdlo Josua nyiilungam wpin-wra mvdwb jiknum, ho Israel nyiilungv nyiicwr-cwrxiv mwwg atwg otu naak gvdab wknum.

⁷‍Hoo hiyv At Swg koib swrdorxeqb Israel gab bonam nyinam mam kaanbo, Josuag la nyi axa tulungv swwl dooi yikho nyiilungv At Swn xuml doonum.

⁸‍Hoo Nunwg ko tuup Josua, At Swg nyerangv vnyw 110 gob swwpe kul siknum.

⁹‍Hoo bulv mwam mwwg gumn naanum Gaasag puutu nyoodum daiya Iprayim diisw gvdag Timnat-heres uraho liiknum.

¹⁰‍Hoo bulug hoqg hotam ab tulungv siyum kunum. Hoo bulug kokw ho At Swn ho mwwg Israel gab koibo bonam nyinam mam cengma bo hotamv swsiql swwlinum.

¹¹‍Hoo Israel nyiilungv hoggv almadwn ham At Swg kaagaho nyinum hoo Baal tulungam xumnum.

¹²‍Hoo bulug ab tulug Pwnbo At Swn, hiyv bulam Ijipt gvda hoqgv boolin boam bulv apaqnum. Bulug diis-paapho doonbo nyiilug pengko hoqg asaq pwnboam dumpo pvxwl xumnum, bulv asaq pwnbo kokwb wmin gvnum. Hoo bulv At Swn hang lengdwb nyiluqnum.

¹³‍Bulv At Sw apaqnum hoo Baal tulungam la Astarot pwnboam xumnum.

¹⁴‍Hoqgab At Swg haaxaqnamv Israelwg aoho wm bioqnam hvb bioqanum, hoo mwv bulam naareqbo nyi tulug alaqho jilwqnum, hoo bulam naareq kunum. Hoo mwv bulam bulug door-doopwg ceebio tulug pengko ho puqlwq kunum, hoqgab bulug ceebio tulungam bulv dvqrwq nyok maanum.

¹⁵‍Hwdlo jaqkam bulv nyob patab soolin yin, At Sw mwwg beo-belamnam hvb, hoo At Sw bulam dingrnam hvb, At Swg alaqkv bulam ceekol laqm-baqmnum. Hoo bulv vc loodab hentwr henum.

¹⁶‍Ho At Sw nyegam tulungam swwrab mvnum, hiyv bulam naareqbo nyi tulug alaq hoqgv bulam ywwlinum.

¹⁷‍Hvbsujaqkam bulug nyegam tulungam bulv bidu-bel tamanum, hoggab bulv yocu-yabio nyinam hvb asaq pwnbo tulungam xuml paql doonum. Bulv nyebia jaqb bulug ab tulug lamta wkwb wmab asaq lamta yaab wknum, bulug ab tulungv At Swg gamlam tvjwnum, hvbmabde bulv hvb nyimanum.

¹⁸‍Hwdlo jaqkam At Sw nyegam tulungam swwrab mvikam, At Sw nyegam lvgab doobanum, hoo nyegam tulug swwl doog yik aalho, bulug ceebio tulug alaq hoqgv bulam mwv ywwlinum. Bulam hiyv hentwr hemwl hoo nyijab-nyiyiq yukam, ho At Sw bulug siginam mam aya mwwpanum.

¹⁹‍Hvbmabde hwdlo nyegamv sileq yin, bulv luusaq yaab nyinum hoo bulug ab tulungam koi yaab bulv alman boam nyinum, asaq pwnbo kokwb wmin gvnum, ho bulam bon nyijil hoo dumpo pvxwl xumnum. Bulv bulug almab nyinam tulu ham akam apaq maanum ho bulug tamynam hang baqnam apaq maanum.

²⁰‍Hoqgab At Swg haaxaqnamv Israelwg aoho wm bioqnam hvb bioqanum, hoo mwv benum, “Hoggab soq nyiilu si ngoqg birnam pvvbam bulug ab tulungam gaml jiknam ham bulv ngoqg yalam tvjw kumab nyipa ku,

²¹‍Hogloq ham Josua apaq pel sileq kunam ham, ngo bulug kaaga hoqgv asaq nyob tulu ham ruqlinl ruqpaq kuram,

²²‍Israelam pookal kaaka tayin, bulug ab tulug nyinam hvb bulv At Swg lamtab wi bwdwq, ma wma ywbdwq.”

²³‍Hoqgab At Sw hoq nyob tulu ham nyebia jaqb ruqlinl ruqpaq maab doomnum, hoo mwv bulam Josuag alaqho jilwq maanum.