Read Nyishi NYEGAM 20 Bible Online

NYEGAM 20 - Nyishi bible

NYEGAM 20

¹Ho Israel nyiilungv lvvgwb lengnum, Dan hoqgv Beerseba namgub, Gilead gvda ngvkam haataqnum, hoo nyi mwlwngv Mijpa ho nyi akin hookum pan hvb At Swg dookho haanum.

²‍Hoo Israelwg nyob nyiilu mwlwg peelo bo mwlwngv Pwnbog nyiilug hookumko ho bulv atv hookumnum, hoqho 400,000 go lyoqr orioq bwwtwl nyiingv lvpiab haanum.

³(Israel nyiilungv Mijpa xaqb haanam Benjaminwg nyiilungv tapanum.) Hoo Israel nyiilungv benum, “Ngulam betam tvb, hoggub soq almab nyinam si nyinum?”

⁴‍Hoo nyem mam mengn bo Lebi nyi nyol ak hv birwql hoo benum, “Ngo Benjamin gvdag Gibea ho hvvcnum, ngo la ngoqg xwwbaq nywxwngv ai hoqho dootab haanum.

⁵‍Hoo Gibea nyigbo tulungv ngam ceekonum hoo aiho ngoqg nam yubgwngam ceekol gooyumnum. Bulv ngam mengtanum, hoo bulv ngoqg xwwbaq nywxwngam tublil nyinum, hoo mwn siknum.

⁶‍Hoqgab ngo ngoqg xwwbaq nywxw svmangam naaknum hoo mwnwg gv apongam twqmwqnum hoo Israelwg otu naaknum gvda mwlwb hort kun, hoggab bulv bulum-kac dvb nyic nyiknum hoo Israel uraho vc loodab haaxaq dvb nyinum.

⁷‍Kaato, Israel nyiilu nul, nul mwlwngv, nulug mwwnam mam tomswrto hoo so tomswr-hony to.”

⁸‍Hoo nyiilu mwlwngv lvkin hvb daqrabnv begamv, “Ngulv akin gokam mwwg tombub wkram, hoo ngulv akin gokam mwwg nammwb wkur kuram.

⁹‍Hvbmabde sija soq sib ngulv Gibeangam mvtayin: ngulv tak cingdvl hoqham ceeko tayin,

¹⁰‍hoo lwwg hoqgv nyi wyw go Israelwg nyob mwlw hoqgv naatayin, hoo lwwyw hoqgv lwwg, hoo lwwyw camg hoqgv lwwyw nyiilug dvs-twws gab naatayin, ho hwdlo bulv haaikam bulv Benjaminwg Gibeangam kwly daqtayin, hoggab bulv Israel uraho nyic loodangam nyipa ku.”

¹¹‍Hoqgab Israelwg nyi mwlwngv nyi akin hvb hookuml bopam mam ceekonum.

¹²‍Hoo Israelwg nyob hoq nyi mwlwngv nyi kanaml Benjaminwg nyobam pui bemwl begamv, Hognvk almanv jaq soq sib nulug pengko ho nyipa kun?

¹³‍Hoqgab sija Gibea ura hoqg dooxa bo nyi tulu ham jilin to, ho ngulv bulam sidwb meng tayin hoo almanam Israel soqgv mvpaq tayin.” Hvbmabde Benjamin nyi tulungv bulug vbw-bor tulu, Israel nyiilug benam mam tamanum.

¹⁴‍Ho Benjaminwg nyiilungv lvkin gob bopam hoqgv Gibeab hookumnv Israel nyiilungam ceekol nyob patab lengnum.

¹⁵‍Hoo Benjaminwg nyiilungv hoq aalho bulug bopam hoqgv lyoqr orioq bwwn bov 26,000 go goqlinum, hoq lvgab Gibea hoqgv nyiv 700 go daalin kunum.

¹⁶‍Mwlwg pengko hoqgv laqcib nyinbo nyiv 700 go daalin kunum; nyiicwr-cwrxiv dum sookin namkam abxaq maab swwxw-lvqmin ablaq bov.

¹⁷‍Hoo Benjaminnvn apaqtvl Israel nyiingv 400,000 gob lyoqr orioq bwwn bov nyiknum; soq mwlw nyi tulu si nyob paky kunbov.

¹⁸‍Israel nyiilungv gorabnum hoo Betelwb caanum hoo Pwnbon toxnum, “Hiyv ngul gab otuqcob Benjaminwg nyiilungam caal nyob paco tayin?” Hoo At Sw benum, Judangv otuqb wco tayin.”

¹⁹‍Ho Israel nyiilungv ar gorab layil wnv Gibeangam ceekol svmcw mvl doonum.

²⁰‍Hoo Israel nyiilungv Benjaminnvn ceekol nyob patab lengnum, hoo Israel nyiilungv bulam ceeko kolol nyob patab Gibea ho haanum.

²¹‍Benjaminwg nyiilungv Gibea ho lingrwqnv hoq aalho Israel nyi tulungam 22,000 go mengnum.

²²‍Hvbmabde Israel nyiilungv haakamnum, hoo otuq aalho nyob pak nyook ho lokta daqal nyob padwb mvnum.

²³‍Hoo Israel nyiilungv caanv At Swg agaho ariyum namgub bulv xabnum. Hoo bulv At Swn toxnum, “Ngulug vbw-bor, Benjaminwg nyiilu sam ngulv lokta wgdvl nyob paiyin dvi yv?” Hoo At Sw benum, “Wgdvl bulam nyob pata.”

²⁴‍Hoqgab aal loonyi deen so Israel nyiilungv Benjaminwg nyiilu ogum ceeko taab haanum.

²⁵‍Hoo aal loonyi deen so Gibea hoqgv Benjamin nyiingv bulam nyob pvrwqnum, hoo Israel nyi tulungam 18,000 go mengnum. Soq nyi mengnam mwlw si lyoqr orioq bwwn bov.

²⁶‍Ho Israel nyiilu mwlw ngvla sipai mwlwngv Betelwb caabnv xabnum. Bulv At Swg agaho dvma-twwmab vrr rwl ariyum namgub doonum, hoo bulv boyuqnam akiam la swrso akiam At Swg agaho jinum.

²⁷‍Hoo Israel nyiilungv At Swn toxnum (hoggab hoq moodho Pwnbog pvvb uddumv hoqho doonum,

²⁸‍hoo Aaron gv ko tuup Eleajar, ho Eleajarwg ko tuup Pinehas hoq moodho pvvb uddum agaho bon nyil doonum), begamv, “Ngulug vbw-bor tulu, Benjaminwg nyi tulungam ngulv lokta wgdvl nyob pat yv, ma ngulv apaq tai nvi yv?” Hoo At Sw benum, “Caan, hoggab aaram mam ngo bulam nulug alaqho jilwq tayin.”

²⁹‍Hoqgab Israel nyiilungv Gibeangam tooiyuml doonum.

³⁰‍Hoo aal loum deen ho Israel nyiilungv Benjaminwg nyiilungam otuqho hoggub nyob panam hvb hvraqb nyob patab caanum.

³¹‍Hoo Benjaminwg nyiilungv nyiilungam ceekol nyob pvrwq taab bopam hoqgv lengnum. Hoo otuq mood hoq nyinam hvb bulv nyiilungam mengnum hoo nyi tuugin lamta paada tuluho mengnum, ho dvpar gon hv Betelwb wnum hoo dvpar asaq gon hv Gibeab wnum, hoo Israel nyi cammumv deela ho kaadar pvla dvb wnum.

³²‍Hoo Benjaminwg nyiilungv benum, “Otuq moodho hoggub bulv ngulam hwwiyumnam hvbkalam nyipa ku.” Hvbmabde Israel nyiilungv benum, “Kuj i ngulv ketuj hoo bulam bopam hoqgv lamta paada tulug aadob booxartuj.”

³³‍Hoo Israel nyi mwlwngv bulug dook nyook hoqgv kedwn hvb nyinv wkurnum hoo bulv Baal-tamarho lokta hookumnum, hoo Israel nyi tulungv Maare-geba ho tooiyal doon bov nyebia jaqb bulug dook hoqgv xarlinum.

³⁴‍Hoo Israel mwlw hoqgv daalin kunam nyi 10,000 go Gibea ho nyob pvrwqnum, hoo nyobv vc loodab pvgwq minsnum, hvbmabde Benjamin nyi tulungv bulam ciqcaq-bviyaq dvb gooyum pakbo hvl cengmanum.

³⁵‍Hoo At Sw Benjaminnvn Israel agaho mviyanum, hoo Israel nyiilungv bulam hoq aalho 25,100 go Benjaminwg nyiingam mengnum. Soq mengnam nyi mwlw si lyoqr orioq bwwn bov.

³⁶‍Hoqgab Benjaminwg nyiilungv bulam mviya pakbo hvl kaaknum. Israel nyi tulungv Benjaminnvn pagoq ak jinum, hoggab Israel nyiilungv Gibeangam ceekol nyob pam dvb tooiya bo tulungam mwwgwnum.

³⁷‍Ho tooiya bo nyi tuluhv nyebia jaqb Gibeangam nyob patab xarnum; tooiya bo nyi tuluhv bopam urab haanv nyi mwlwngam lyoqr orioq hoqgv mengnum.

³⁸‍Sija tooiya bo Israel nyi tulu ngvla mvqlw yaan Israel nyi tulug pengko ho kaacin dvb hog ak muxnum, hv hvbaloqkam hwdlo bopam hoqgv wm mwkv muqya apob juuca yukun

³⁹‍ho Israelwg mvqlw yaan nyi tulungv tobkurl nyobam pvrwq tayin. Hoq moodho Benjaminv Israelwg nyi cammum gob meng rabnum. Bulv benum, “Otuq nyob panam hvb bulam ngulv hoggub nyijaqkam mviya tayin.”

⁴⁰‍Hvbmabde hwdlo bopam hoqgv wm mwkv piuar tiqnam hvb kaacin dvb juuca yukun, Benjamin nyi tulungv langkwb kookurl kaapanum, hoo kaato, bopam bumpw hoqgv wm mwk doa aob juuca kunum.

⁴¹‍Ho Israel nyiilungv tobkurl kunum, hoo Benjaminwg nyi tulungv hang hoxanum, hoggab bulug ciqcaq-bviyaqkv hvvnwq pakbo hvl bulv cengknum.

⁴²‍Hoqgab bulv Israel nyi tulug aga hoqgv tobkurl deexa-rara gvda daiyab kenum, hvbmabde bulam nyob panbov ruqtin kunum. Hoo bopam tulu hoqgv haakbo tulungv bulam bulug pengko ho twryumnum.

⁴³‍Diis-paapho doonbo Benjamin nyiilungam bulv bulam ruqmin gvl hoo bulam Noha hoqgv menglayil Gibeag dou-caga taqc namgub mengnum.

⁴⁴‍Benjaminwg nyiingam camleq piin lwwyw go mengknum, hoq nyi tuluhv nyob pvxbo nyiv.

⁴⁵‍Hoo bulv tobkurnv deexa-rarab Rimmonwg lwwtaqb kenum. Lamta paada tuluho lwwyw ang go nyiingam mengknum. Hoo bulv bulam ruqtin jin-jinl ruqknv Gidom namgub ruqnum, hoo 2,000 vnyi go nyiingam mengknum.

⁴⁶‍Hoqgab lyoqr orioq bwwn bo Benjamin nyiingam hoq aalho 25,000 go mengnum, hoq mengnam nyi tuluhv nyob pvx bo nyiv.

⁴⁷‍Hvbmabde nyi 600 go kikur banv deexa-rara Rimmonwg lwwtaqb kenum hoo pool bvrpy go Rimmon lwwtaqho doonum.

⁴⁸‍Hoo Israel nyiilungv Benjaminwg nyiilungam ceekol hoo bulam lyoqr orioq hoqgv bopam mam, nyi tulungam hoo tuun-mee kaapanam mwlwngam mengnum. Hoo bulug kaapanam bopam mwlwngam bulv wm tolwqnum.