Read Nyishi NYEGAM 21 Bible Online

NYEGAM 21 - Nyishi bible

NYEGAM 21

¹Sija Israel nyi tulungv Mijpa ho dingr kunum, “Ngulv akin gokam ngulug ko nyem mam Benjamin nyobam nyem jikram.”

²‍Hoo nyiilungv Betel ho haanum hoo ariyum namgub Pwnbog agaho doonum, hoo bulv vcjaqb mwwdwql hoo sogoql xabnum.

³‍Hoo bulv benum, “Israelwg Pwnbo At Swa, hoggub soq si Israel so nyipa kun, ho soolo Israel ho nyob akwn dook ma?”

⁴‍Hoo aal loogwn so nyiilungv ar komcib gorab layil hoqho yugw ak mvnum hoo boyuqnam akiam la swrso aky tulungam jinum.

⁵‍Hoo Israel nyiilungv benum, “Israelwg nyob tulu hoqgv hogloq nyobv At Swg dookumko ho caamanum?” Hoggab hiyv At Swg dookub Mijpa ho caama bo gab bulv mwwg pagoq gab vc loodab dingl begamv, “Mwv hoggub nyijaqkam sidwb nyitayin.”

⁶‍Hoo Israel nyiilungv bulug vbw-bor Benjamin gab hang biil aya mwwpal hoo benum, “Soq aal soqgv Israel nyob hoolu hoqgv nyob akwn dookram.

⁷‍Mengro nam nyi tulug nywxw tulu sam, ngulv hoggub mvk buiyu, hoggab bulam ngulug nyem ko tulungam bulug nywxwb jima dvb hvl ngulv At Swn dingr peekun?”

⁸‍Hoo bulv benum, “At Sw dookub Mijpa ho caaiyikho Israelwg nyob hoqgv hiyvg nyobv caamanum?” Hoo kaato, Jabes-gilead svmcw hoqgv nyi akkam hoq dookumko ho haamanum.

⁹‍Hoggab hwdlo nyiilungam emin goqka yukho, kaato, Jabes-gilead ho doonbo nyi akkam hoqho doomanum.

¹⁰‍Hoqgab dookum ho haakam kvmtwrbo nyi dvparv 12,000 go gaml jil kanamnum, “Wgdvl Jabes-gilead ho doonbo nyi tulungam lyoqr orioq hoqgv mengta; nyem dvnam kam hoo ko anyongam kam mengta.

¹¹‍Soq sib nulv nyitayin: nyega vxiam hoo nyem mvvngam maanbo vxiam nulv mingtwr tayin.”

¹²‍Hoo bulv Jabes-gilead hoqgv nyem mvvngam mam 400 go nyega doog maadanam mam kaapanum, hoo bulv bulam Kanaan gvdag Silo ho boanum.

¹³‍Ho nyi dvparv Rimmonwg lwwtaqho doonbo Benjaminwg nyi tulungam swrso puiyam benum.

¹⁴‍Hoo Benjamin hoq moodho wkur kunum. Hoo bulam bulv Jabes-gilead hoqgv nyiitwr boolinam nyem tulungam nywxw jiknum, hvbmabde hoqg tuluhv bul gab pwwmanum.

¹⁵‍Hoo nyiilungv Benjamin nyiam hang biil aya mwwpanum hoggab At Sw Israelwg nyob tulungam yaqpia mvknum.

¹⁶‍Ho nyi dvpar hoqg nyi axa tulungv benum, “Nywxw mengronam tulu gab hoggub ngulv mvka kub yu, hoggab Benjaminwg nyem tulungam twryum paku?”

¹⁷‍Hoo bulv benum, “Benjamin hoqgv mengonam nyi hoqgv hoggub nyijaqkam hosiq swwlin dvb nyipa, ho Israel nyob hoqgv nyob akwn twryum mvma buj.

¹⁸‍Hvbsujaqkam ngulv bulug nywxwb ngulug ko nyem mam jinyi ram.” Hoggab Israel nyiilungv dingr kunum, “Benjamin nyiam nyem jinbov beenam gob nyitayin.”

¹⁹‍Hoqgab bulv benum, “Kaato, vnywngam At Swg xilo soonamv Silo ho doodwn, hoqhv Betelwg nyoodum daiyaho nyidwn, ho hv dou-cagag lamta paadag Betel hoqgv Sekem, hoo Lebonag nyooko daiya namgub nyidwn.”

²⁰‍Hoo bulv Benjaminwg nyiilungam gaml jil begamv, “Wgdvl roo boolu tol toosil doog dvl

²¹‍hoo kaaya ta. Silog nyem ko tulungv noso sook ho soolinl lengyi nyiloqkam, ho roo boolu hoqgv nulv lengdvl nyiicwr-cwrxiv mwwg nywxwb Silog ko nyem tulungam selayil hoo Benjaminwg gvdab wto.

²²‍Hoo hwdlo bulug ab tulungv ho bulug vbw-bor tulungv ngulam sora baloqkam, ngulv bulam betayin, ‘Bulam anya jaqb jito, hoggab ngulv nyob pak hoqgv bul gab nywxw nvvj kuma, ho nulv kam bulam bul gab jima, hvb jinyi loqkam nulv sija nyimur bob nyid nvpv.’”

²³‍Hoo Benjaminwg nyiilungv bulam bilwqkob jaq, nyiicwr-cwrxiv noso soon bo nyem tulu hoqgv bulug nywxwb naaknum. Ho bulug otu dookub bulv wkur kunum hoo pamda tulungam mvdar tukul hoqho bulv dooknum.

²⁴‍Hoo Israel nyiilungv hoq moodho hoq hoqgv wleq kunum, nyiicwr-cwrxiv mwwg nyob bvla imiq dvparb wknum, hoo bulv hoq hoqgv at-atwg otu naak gvdab wkur kunum.

²⁵‍Hoq moodho Israel ho lvpw at doomanum. Nyiicwr-cwrxiv atwg vnyiq kvvlwq koob nyinum.