Read Nyishi NYEGAM 3 Bible Online

NYEGAM 3 - Nyishi bible

NYEGAM 3

¹Sija Israelv Kanaan gvdaho nyob panam mam cengka maanbo mwlw gab, At Sw soq nyob tulu sam, Israelam bulug lvgab hengka mvdwb gvda hoqgv ruqlinl ruqpaq maanum.

²‍Soq nyob tulu sam ruqlin maab apaqnam si hvbnyiloqkam Israel nyiilug hosiqkam nyob panam mam cengm dvb, nyob panam mam cengma boam tomswr nadwb ruqpaq maab doomnum.

³‍Soq nyob tulu sam ruqpaq maanum: Palistanwg bir at ang ngam hoo Kanaan nyi mwlwngam hoo Sidon nyi tulungam hoo Hibait nyi tulungam, hiyv Lebanon, Baal-hermon ho Lebo-hamat Puutu aoho doonbo tulungam.

⁴‍Bulug ab tulungam Mojes alaqho mwv gaml jiknam ham, Israel nyiilungv At Swg gaml jinam mam tvjwl swwnam swwmangam, soq tulu si Israel nyiilungam pooka tayin.

⁵‍Hoqgab Israel nyiilungv Kanaan nyi tulug, Hittait nyi tulug, Amor nyi tulug, Perijj nyi tulug, Hibitait nyi tulug, hoo Jebus nyi tulug pengko ho doonum.

⁶‍Hoo bulug nyem ko tulungam bulug nywxwb naanum, hoo bulug at nyem kongam bulug nyega koam nyem jinum, hoo bulv bulug pwnbo tulungam xumnum.

⁷‍Hoo Israel nyiilungv hoggv almadwn ham At Swg kaagaho nyinum. Bulug Pwnbo At Swn bulv mwwpa kumanum hoo Baal tulungam la Aserot pwnboam xumnum.

⁸‍Hoqgab At Swg haaxaqnamv Israelwg aoho wm bioqnam hvb bioqanum, hoo mwv bulam Mesopotamiyag lvpw at Kusan-risataim alaqho puqlwqnum. Hoo Israel nyiilungv Kusan-risataim mam vnyw piin gob bon nyij kunum.

⁹‍Hvbmabde hwdlo Israel nyiilungv At Sw xabnum, At Sw Israel nyiilungam naalin boam xuqlinum, hv bulam ywwlin kunum, Kalebg bor Kenaj ko tuup Otniyelnvn ywwlin bo nyegam gob xuqnum

¹⁰‍At Swg Yalv mwwg aoho doonum, hoo mwv Israelam nyegam gob swwl doognum. Mwv nyob patab wnum, hoo At Sw Mesopotamiyag lvpw at Kusan-risataimnvn mwwg alaqho jiknum. Hoo mwwg alaqkv Kusan-risataim aoho mviya kunum.

¹¹‍Hoqgab gvdangv vnyw campy gob nyob pamab doonu kunum. Ho Kenaj ko tuup Otniyel siknum.

¹²‍Hoo Israel nyiilungv lokta hoggv almadwn ham At Swg kaagaho nyinum, hoo At Sw Moabg lvpw at Eglonnvn ator jitwl Israelam ceeko mvnum, hoggab bulv At Swg kaagaho alman boam nyinum.

¹³‍Mwv atv Ammon nyi tulungam la Amalek nyi tulungam lvkin gob hookum mvlayil, hoo bulv Israelam nyob paiyanum. Hoo bulv pvng bopam mam otu naaknum.

¹⁴‍Hoo Israel nyiilungv Moabg lvpw at Eglonnvn vnyw camleq piin gob bon nyij kunum.

¹⁵‍Ho Israel nyiilungv At Sw xabnum, hoo At Sw bulam naalin boam, Benjamin dvparwg, laqc kvlv nyinbo, Gerag ko tuup Ehudnvn xuqlinum. Israel nyiilungv Moabg lvpw at Eglon gab aky jilwq tvl mwam kanamnum.

¹⁶‍Hoo Ehud mw atgab lyoqgw lyoqar pwreqnam lyoqr orioq kiubit ak aaso bo dvb mvnum, hoo mwv ham mwwg lvqbwq taqcig vj laqyap ho buqnum.

¹⁷‍Hoo mwv Moabg lvpw at Eglonnvn akiam jinum. Eglon vc loodab jwwtwnam.

¹⁸‍Hoo hwdlo akiam jinya yukun, akiam baqya bo nyi tulungam mwv wm kunum.

¹⁹‍Hvbmabde mwv atv Gilgal murty tulug ogumb tobkur banv benum, “Lvpw ata, ngo noqgab kvsil betam sanam pui ak baqayin.” Hoo mwv gaml jinum, “Ody maabv.” Hoo mwam kvvyw-tada kaaya bo mwlwngv mwwg dook hoqgv wleqnum.

²⁰‍Hoo mwv mwwg hviyiqbo pwqlwho vpwb doodu yin Ehud mwwg dookub haanum. Hoo Ehud benum, “Pwnbo hoqgv ngo noqgab pui ak baqayin.” Hoo mwv mwwg dook hoqgv gorabnum.

²¹‍Hoo Ehud mwwg laqc alaqkv mwwg lvqbwq taqc ho lyoqr orioq buqnam mam seqlin banv, hoo mwwg kepongam nwqlwqnum.

²²‍Hoo orioq dvvpwngam kepo urab nwqlwqnum, hoo oxv orioqkam pulup kunum, hoggab mwv orioqkam mwwg kepo hoqgv pulin nyok maanum; hoo ee ngv lvvgwb lengnum.

²³‍Ho Ehud baag lvvgwb lengleq kunum hoo pwqlw viyap pam ciqtuml hoo xwrtuml apnum.

²⁴‍Hwdlo mwv wleq yukho, nyera tulungv haanum, hoo hwdlo bulv pwqlw viyap pam xwrtuml apnam mam kaatwl, bulv mwwnum, “Jvqtw jaqb mwv atv hviyiqbo pwqlw uraho vpwb doodu dvn mwwnum.”

²⁵‍Hoo bulug kaaya yaag namgub bulv kaayanum. Hvbmabde hwdlo mwv hvraqb pwqlw viyap pam mvko kuma yin, bulv viyap yeqko nan sabingam naanum hoo bulv mvkonum, hoo bulug bir atv deela ho sit kul dooknum.

²⁶‍Bulv kaaya yodul dooi yikho Ehud keleq kunum, hoo mwv murty tulug lvvgwb kenum hoo Seira gvdab kenum.

²⁷‍Hwdlo mwv haaikun, mwv Iprayim diisw gvdaho tuuly miqnum. Ho Israel nyiilungv mwwg lvgab diisw gvda hoqgv ibanum, hoo mwv bulug nyig bob nyiknum.

²⁸‍Hoo mwv bulam benum, “Ngoqg kokwb wmin gvto, hoggab At Sw nulug ceebio tulu Moab nyi tulungam nulug alaqho jilwq pakun.” Ho bulv mwwg lvgab imin gvknv Moab nyi tulug Jordon pobungam rvbyi-rabca ko saam mam naareq kunum hoo nyi akkam hoqb wpeq mvk maanum.

²⁹‍Hoo bulv Moab nyi tulungam 10,000 gob mengknum, atorl lengleqbo nyi tulungam, nyilaq-nyipaqbo nyi tulungam akkam kelin mvmab mengnum.

³⁰‍Hoqgab hoq aalho Moab nyi tulungam Israelwg alaq uraho jilwq kunum. Hoo gvdangv nyob pakmab vnyw cam piin gob doonu kunum.

³¹‍Mwwg kokwb Anatwg ko tuup Samgar hvvsiqnum, hiyv svv hvvb coqlo hoqgv Palistan nyiam 600 gob mengnum, hoo mwv kam Israelam ywwlinum.