Read Nyishi NYEGAM 4 Bible Online

NYEGAM 4 - Nyishi bible

NYEGAM 4

¹Hoo Ehud sixo kokw so lokta Israel nyiilungv hoggv almadwn ham At Swg kaagaho nyinum.

²‍Hoo At Sw bulam Hajorho pvvb bwwl doogbo Kanaanwg lvpw at Jabinwg alaqho puqlwqnum. Sisera mwwg sipai saab koibo akv, hiyv Haroset-hagoyim ho doonum.

³‍Ho Israel nyiilungv At Swn svka gab xabnum, hoggab mwv 900 yoqdwr ceriot doognum hoo Israel nyiilungam vnyw camnyi gob vcjaqb nyijab-nyiyiql hentwr hemnum.

⁴‍Hoq moodho Israelam Lappidotwg nywxw nyiqry benbo nyem Debora nyegamb nyil doognum.

⁵‍Mwn Iprayim diisw gvdag Rama gvla Betel pengkog pvng svvn niikumho Debora doonum, hoo Israel nyiilungv mwnwn pvvb mwbwq mvdwb hoqho svmcw mvcal doonum.

⁶‍Mwn Kedes-naptali hoqg doonbo Abinoamwg ko tuup Baraknvn nyi kanam tvl goqa mvnum hoo mwam benum, “Israel Pwnbo At Sw nam wnwk hvl gaml jil kanam maai yv, ‘Wno, Naptalig nyiilu ngamla Jebulunwg nyiilungam 10,000 gob Tabor Puutu ho goqkum ta.

⁷‍Hoo ngo Jabinwg sipai saab koibo Siseranvn mwwg ceriot la dvpar lvgab Kison pobu ho nam wrwql nyob pam dvb jitayin, hoo ngo mwam noqg alaqho jilwq tayin’?”

⁸‍Barak mwnwn benum, “No ngoqg lvgab wmin gvb nyiloqkam, ngo wtayin, hvbmabde no ngoqg lvgab wma baloqkam, ngo wram.”

⁹‍Hoo mwn benum, “Ngo hoggub nyijaqkam noqg lvgab wmin gvtayin. Hvbmabde noqg lamta wlinam niqtuq kam no naadwb nyiram, hoggab At Sw Siseranvn dvn akwg alaqhv puqlwq tayin.” Ho Debora Barak lvgab Kedes hoqgv wrab mingnum.

¹⁰‍Hoo Barak Jebulun la Naptali nyob tulungam Kedes ho goqlinum. Hoo nyi 10,000 gob mwwg lvgab wbanum, hoo Debora mwwg lvgab wmin gvnum.

¹¹‍Mojesg at Hobab hotam hoqgv Kenait nyi Heber Kenait nyi tulug hotam hoqgv vpwb doonum, hoo mwwg tombungam Kedes bviywrg Jaanannim kora svvn dook gvdaho doonum.

¹²‍Hwdlo Sisera Abinoamwg ko tuup Barak Tabor Puutub cao nvba hvl betamnam mam tapanum,

¹³‍ho Sisera mwwg ceriot mwlwngam la 900 yoqdwr ceriotam goqlinum, hoo Haroset-hagoyim hoqgv Kison pobub wm dvb, mwwg lvgab nyi doonbo nyi mwlwngam goqnum.

¹⁴‍Hoo Debora Baraknvn benum, “Gorabto! Soolo aal so At Sw Siseranvn noqg alaqho jilwq pakun. At Sw noqg otuqb wco maad nvi yv?” Ho Barak Tabor Puutu hoqgv innum hoo 10,000 nyiingv mwwg lvgab wmin gvnum.

¹⁵‍Hoo At Sw Siseranvn la mwwg ceriot tulungam Barak agaho hendar-kaapar maadwb mvnum hoo Barak lyoqr orioq hoqgv bulam mengnum. Hoo Sisera mwwg ceriot hoqgv ipoq layil hoo lvpiab kenum.

¹⁶‍Hoo Barak ceriot tulungam la sipai tulungam Haroset-hagoyim namgub ruqmin gvnum, hoo Siserag sipai mwlwngam lyoqr orioq hoqgv mingtwrnum; nyi akkam apaq maanum.

¹⁷‍Hvbmabde Sisera lvpiab kelayil Jayel tombu ho kilwqnum, Kenait nyi Heberwg nywxwngv benum, Hajorwg lvpw at Jabinwg gvla Kenait nyi Heberwg dvparg pengko ho swrsob doonum.

¹⁸‍Hoo Jayel Siseranvn kvvrwqtab lvvgwb lengnum hoo mwam benum, “Soqb haat, ngoqg bir at; ngoqg dookub haat; bos maabv.” Hoqgab mwv mwnwg tombu urab kilwqnum, hoo mwn mwam xoangv kulubl apnum.

¹⁹‍Hoo mwv mwnwn benum, “Ngam anya mwwpa gvdwl iss loq miceqgo jila bv, hoggab ngo hvngwr jaqdo.” Ho mwn gwwi yooxaqkam puko tvl mwam twwmnum hoo mwam kulubl apnum.

²⁰‍Hoo mwv mwnwn benum, “Tombu viyap alo daqta, ‘So nyi haama i hvl, nyiv nam haal tox baloqkam?’ beta, ‘Ma, so nyi haama.’”

²¹‍Hvbmabde Heberwg nywxw Jayel puqnyw soiyw gola kvnyi pwg mwnwg alaqho naanum. Ho hwdlo mwv nyelin kunv yubngaql dooi yikho, mwn cooikab mwwg dookub haabnv dumpongam puqnywngv kedho taqpeq maady deedib tvqlwqnum. Ho mwv siknum.

²²‍Hoo kaato, Barak Siseranvn ruqmin gvl ruqdunam, Jayel mwam kvvrwqtab lvvgwb lengrwqnum hoo mwam benum, “Soqb haat, noqg meegaqnam nyi ham ngo nam kaakin tayin.” Ho mwv mwnwg tombu urab haanum, hoo Siserag dumpo ho puqnyw soiyw go tvqlwq tvl sitkul dooknum.

²³‍Hoq aalho Pwnbov Kanaanwg lvpw at Jabinnvn Israel nyiilug alaq uraho jilwq kunum.

²⁴‍Hoo Israel nyiilungv Kanaanwg lvpw at Jabinnvn vc looda ceekol bulv Kanaanwg lvpw at Jabinnvn twryum maady deedib nyob paknum.