Read Nyishi NYEGAM 5 Bible Online

NYEGAM 5 - Nyishi bible

NYEGAM 5

¹Hoq aalho Debora la Abinoamwg ko tuup Barak bemin benum:

²“Ho nyigbo tulungv Israelam nyil wgnum, ho nyiilungv at jaq nyidwb mwwr kunum, ho At Sw lvqcnum!

³“Tato, Lvpw at tulunga; lvpw atwg ko tuup tulungv, ruucw kwrgab to; At Swn ngo bemin betayin; Israelwg Pwnbo At Swn, ngo guuly anyangam liij tayin.

⁴“At Sw, hwdlo no Seir hoqgv wknum, hwdlo no Idom swsw-saab sool wi yikho, swcwngv tvmdwrnum hoo doa hoqgv nyodongv holnum, vv, doomwq hoqgv issam hool mvnum.

⁵At Sw agaho puutungv hwqdinum, Sinai puutu ngvkam Israelwg Pwnbo At Swg agaho hwqdinum.

⁶“Anatwg ko tuup Samgar aalho, Jayelwg swwca yik aalho, lamta paadangam apaq kunum, hoo nyiody boon bo tulungv lamta poosub koob wnum.

⁷Israel ho nampam nyi dook maanum; ngoqg swwrab namgub bulv nampam nyi dook maanum; Debora ngo, Israelwg ann gob swwrab pakun.

⁸Hwdlo nitib pwnbo tulungam xuqbwq yukho, ho nyob panamv toggoqho doonum. Israelwg lwwyw campy nyi pengko ho nulv setam maalo nwwxo go bwwnam mam kaapa nvm yv?

⁹Ngoqg hvvjwngv Israelwg sipai tulungam gaml jil wgbo lvgab wmin gvnum, ho hiyv nyiilug pengko ho at jaqkv nyidwb mwwr kunum. At Swn paqto.

¹⁰“Nulv hiyv pulu bo svdam tulu ham xarg bo tulungam, nulv hiyv xinam upiq tulu ham dootam bo tulungam hoo nulv hiyv lamtab wnbo tulu ham betam mvto.

¹¹Ho iss kucw tuluho rwwxw-gungga dunam mam, hoqho At Swg jvqtw tuuliam bulv miqtin-miqtinl miqdo, Israelv mwwg nampam ho jvqtw tuuliam miqdo. “Ho toggoq tuluho At Swg nyiilungv daacamb sool wnum.

¹²“Huurabto, huurabto, Debora! Huurabto, huurabto, beminam berab to! Gorabto, Barak, noqg nyumwb tulungam bool wgto, Abinoamwg ko tuupa.

¹³Ho boumnam xinam tuluhv daacamb soolnum; At Swg nyiilungv ngoqg lvgab koibo nyi tulu ham ceeko taab sool mingnum.

¹⁴Bulug soorab kov Iprayim hoqgv bulv lywpab sool kunum, noqg imiq lwkw vbw-bor Benjaminnvn no wmin gvnum; sipai tulungam gaml jil nyig bov Makir hoqgv innum, hoo dvqsin bo saab tulungv Jebulun hoqgv haanum;

¹⁵Issakarwg lvpw atwg ko tuup tulungv Debora lvgab haamin gvnum, hoo Issakar Barak lvgab hingky jaqb haamin gvnum; bulv mwwg lvgab lywpab wmin gvnum. Reubenwg nyob tulungv pengko ho bulv vcjaq hangv mwwkanum.

¹⁶Sviya rvky bo tulug sviya yaacam mam koxiol goqnam mam yalam tadwb, hoggub no sviya pvtw ho hvraqb doodwn? Reubenwg nyob tulug pengko ho bulv vcjaq hangv mwwkanum.

¹⁷Gilead hv Jordon kvtin gonho doonum; hoo Dan nyobv hoggub mwv jaaj tulu lvgab doodu dvn? Aserv sa-svlo soiyoq ho hvraqb doodwn, mwwg sugur gvdaho doodu do.

¹⁸Jebulunwg nyiilungv bulug swwgab ludum tvl sidwb mwwnum; Naptali ngvkam diisw rongo rwqtaqho nyob panum.

¹⁹“Lvpw atv haanum, bulv nyob panum, ho Taanak gvdag, Megiddog pobu ho Kanaanwg lvpw at tulungam nyob panum, bulv rup gumn nyob pal naareqnam mam naamanum.

²⁰Doa toloq takar tulungv nyob panum, bulug dook hoqgv bulv Siseranvn ceekol nyob panum.

²¹Kisonwg diidwr issiv bulam baqpaq gvnkun, kolwg Kisonwg diidwr issiv, diidwrb dwrpaq gvnkun. Ngoqg yvjv, koijaqb daacamb soolnum!

²²“Ho svpur tulungv cumal xaranum, mwwg lvpy lvgab cumal haanum.

²³“Merojnvn beeto hvl At Swg gumtwngv bedo, hoqho doonbo mwlwngam beeto, hoggab bulv At Swn svka taab haamanum, koibo tulungam ceeko dvb At Swn svka maanum.

²⁴“Kenait nyi Heberwg nywxw, Jayel dvn xinam jaqkv, dvn xinam jaqkv tombu ho doonbo akv.

²⁵Mwv iss konum hoo mwn mwam gwwi jinum; mwn gwwi hoqgv doxi mvnam mam mwam xinam pukaqho bwa jinum.

²⁶Mwn mwnwg alaqho puqnyw soiyw bwwnum hoo mwnwg lvqbwq alaqho kvnyi pwg bwwnum; mwn Siseranvn jwwtabnum; mwn mwwg dumpongam xidubnum; mwn vmwq yumgub mvtwl hoo mwwg dumpo ho puqnyw tvqlwqnum.

²⁷Mwnwg lvpia pengko ho mwv yoqlwqnum, mwv yoqlnum, mwv hvraqb karl doonum; mwnwg lvpia pengko ho mwv yoqlwqnum, mwv yoqlnum; mwv hogloq ho yoqlwqnum, hoqho mwv yoqlnum—siknum.

²⁸“Siserag annv cwqc uko hoqgv kaal nyix-riinum Pupum hoqgv mwn nywcoql kaanum: ‘Hoggub mwwg ceriotv hookur kumab oyu nukun? Hoggub mwwg ceriot tulug cumal haanamv oyu nukun?’

²⁹Mwlwngam cengbin yaan bo lvpw atwg nyem ko tulungv mwnwn betamnam, jvqtw jaqb, mwn atam birwq sunam,

³⁰‘Bulv nyob paiyal gumn nyob pal naareqnam mam mvpin-mvra mata dvn yu?— nyega ak gab nyem ak-vnyi gob meegaql miidu dvn yu; Sisera gab nyob paiyanam dengky bo vjam xuqdul dood kun yu, alaq hamnam vj tulungam xuqdul dood kun yu, lwwpo ho kangam dvb alaq hvmlwqnam vj rumnyi go xuqdul dood kun yu?’

³¹“Hoqgab At Swa, noqg ceebio mwlwngam yuupaq mvto! Hvbmabde noqg ajinam doonyi caalinam hvb mwam koiyib caalin mvto.” Hoo gvdangv nyob pakmab vnyw campy gob doonu kunum.