Read Nyishi NYEGAM 6 Bible Online

NYEGAM 6 - Nyishi bible

NYEGAM 6

¹Israel nyiilungv hoggv almadwn ham At Swg kaagaho nyinum hoo At Sw bulam Midian nyi tulug alaqho vnyw kvn gob jilwqnum.

²‍Hoo Midian nyi tulungv Israelam bulug uraho doognum, hoo Midian nyi tulug hvb nyigam gab Israel nyiilungv bul atgab puutu tuluho lwwpwq mvnum hoo diisw nyookho lwwpwq cwwgw ko tulungam mvnum.

³‍Hoggab Israel nyiilungv hoglo jaqkam vly liiyikam, Midian nvla Amalek nyi tulungv hoo Dou-cagag nyiilungv bulam ceekol nyob pakynum.

⁴‍Bulam ceekol dvb bulv svmcw mvl doonum hoo gvdag vly-axeqkam Gaja namgub mvpaqnum, hoo dupum-dvrab pam, sviyangam, ho hvvbam ho svdam mam, Israelwg nyiilu gab hog akkam apaq jik maanum.

⁵‍Hoggab bulv bulug tuun-mee lvgab la bulug tombu tulu lvgab haado; bulv kaiya poogub takam jaranam hvb haado—bulv la bulug svdam tulungam xila maadwn—hoqgab hwdlo bulv haaikam gvdangam bulv mucu-mviya kunum.

⁶‍Hoo Midian nyi tulungv hvb nyigam gab Israel nyiilungv vigo anyo kunum. Hoo Israel nyiilungv At Swn svka gab xabnum.

⁷‍Midian nyi tulungv hvb nyiyi kam, Israel nyiilungv At Swn sogoql xabnum,

⁸‍At Sw Israelwg nyiilu gab nyiqry benbo ak kanamnum. Hoo mwv bulam benum, “Soq sib Israelwg Pwnbo, At Sw bedo: Ngo nulam Ijipt hoqgv wgnum hoo nyera-paqn namlog ura hoqgv nulam boolinum.

⁹‍Hoo ngo nulam Ijipt nyi tulug alaq hoqgv naalinum hoo nulam nyijab-nyiyiqbo nyi tulug alaq hoqgv naalinum, hoo bulam nulug aga hoqgv ruqlinl ruqpaqnum hoo bulug gvdangam nulam jinum.

¹⁰‍Hoo ngo nulam benum, ‘Ngo nulug Pwnbo At Swv; nulv nulug doogw ko gvdag Amor nyi tulug pwnbo tulungam bos maabv.’ Hvbmabde nulv ngoqg yalam tvjwl swwma.”

¹¹‍Sija At Swg gumtwngv Oprag terebin niikum ho doonum, hoqhv Abiejerwg nyob Joas nyiilungv, ho mwwg ko tuup Gideon Midian nyi tulu hoqgv kvsil cooikab ala raxorl ralinko ho wtw am mam jurpy mvl doonum.

¹²‍Hoo At Swg gumtwngv mwam daqlin banv hoo mwam benum, “Ator bvla haakam bo nyi aka, At Sw noqg lvgab dooba dvn.”

¹³‍Hoo Gideon mwam benum, “Kvlv tomswrbo, At Sw ngulug lvgab dooba dvloqkam, hoggub soq mwlw sam ngulam nyim pakun? Hoo ngulug ab tulungv ngulam mwwg swrdorxeq bon nyinam mam xikin kun mwlw si hogloqb wnkun, ‘At Sw ngulam Ijipt hoqgv boolin kumanam yv?’ Hvbmabde sija At Sw ngulam apaq paku hoo ngulam Midian nyi tulug alaqho jilwq paku.”

¹⁴‍Hoo At Sw mwwg dookub tobkur banv benum, “Noqg soq ator lvgab wno hoo Israel nyi tulungam Midian nyi tulug alaq hoqgv ywwlin ta; ngo nam kanam nama pan yv?”

¹⁵‍Hoo mwv mwam benum, “Kvlv, At Sw, hvb bemabv, hoggub ngo Israel nyiam ywwlin nyotayin? Kaato, ngoqg nyob si Manasse hoqgv mwlwngam laanyi yaama bov, hoo ngoqg abwg imiq hoqgv ngo mwlwngam ximanam akv.”

¹⁶‍Hoo At Sw mwam benum, “Hvbmabde ngo noqg lvgab dooba tayin, hoo no Midian nyi tulungam nyi akin gon jwwnam hvb jwwtayin.”

¹⁷‍Hoo mwv mwam benum, “Ngo noqg vnyiqho mwwsw dvb kvvlwq paloqkam, no ngoqg lvgab agam goojaq dvloqkam, ngam kaacin dvb hogloq ak kaakin to.

¹⁸‍Ngoqg hookur namgub anya mwwpa gvdwl soqgv wleq maab dooi ya hoo ngo aky bwal hoo noqg agaho ap jitayin.” Hoo mwv benum, “Noqg hookur namgub, ngo so dooi ya tayin.”

¹⁹‍Ho Gideon mwwg nammwb wknv sibin bindongam la opap kiilwq maab wtwngam mwx-mvaql mununum. Vdinam huc ho vlwqnum, hoo alangam pwcwho toolwq tvl, hoo ham baqalayil jinum.

²⁰‍Hoo Pwnbog gumtwngv mwam benum, “Vdinam la opap kiilwq maanam wtwngam naato, hoo hoq tulu ham soq wlw so vlwqto, hoo alangam hoq aoho toolwq to.” Hoo mwv hvb nyinum.

²¹‍Ho At Swg gumtwngv mwwg alaqho benya bwwnamv vdinam la opap kiilwq maanam wtwngam nwqdaqnum. Hoo wlw hoqgv wmv bioqlin banv vdinam la opap kiilwq maanam wtwngam guiyumnum. Hoo At Swg gumtwngv mwwg kaaga hoqgv niileq kunum.

²²‍Ho hoqhv At Swg gumtw goknyi hvl Gideon cengknum. Hoo Gideon benum, “Mwwdwqnam go, Pwnbo At Swa! Hoggab ngo At Swg gumtw nyuqm mam kaapa tukba.”

²³‍Hvbmabde At Sw mwam benum, “Swrsongv noqg lvgab doon ka. Bos maabv; no siram.”

²⁴‍Ho Gideon hoqho At Sw gab yugw ak mvnum hoo ham goqnum, At Sw Swrso bov. Abiejer nyob tulug pengko ho soolo godab hoqhv daqdwn.

²⁵‍Hoq aiho At Sw mwam benum, “Noqg abwg hvvbam naato, hoo dornyi dvb vnyw kvn bo hvvb ham naato, hoo noqg abwg Baal yugw ham seetab to, hoo hoq bviywrho doonbo Asera ham pageq loto

²⁶‍hoo noqg Pwnbo At Sw gab hoq aoho wlw paacal hwngkw dvb yugw loq ak mvto. Ho hvvb dornyi deen ham Aserangam noqg pageqnam hoqgv wsw naag dvl boyuqnam akiam parg dvl jito.”

²⁷‍Ho Gideon mwwg nyera wyw go boolayil At Sw mwam hoggub benum, hvb mwv nyiknum. Hvbmabde mwv mwwg imiq dvparam la pamdag nyi tulungam vcjaqb bos ko-gab, mwv ham aiho nyinum.

²⁸‍Hwdlo pamda nyi tulungv ar gorabl kaanamv, kaato, Baalwg yugwngam mvpia paku, hoo hoq bviywrho doonbo Aserangam patab paku, hoo hvvb dornyi deen ham hoqg yugw mvpko aoho pwr jipa ku.

²⁹‍Hoo bulv akwn-akwn bemin sunum, “Hiyv yu sam nyipa kun?” Hoo kokw so bulv meegaql hoo hwwgaqnum, bulv benum, Joas gv ko tuup Gideon soq sam nyipa ku.”

³⁰‍Ho pamdag nyi tulungv Joasnvn benum, “Noqg ko tuupam boolin to, hoo mwv sidwb nyita yi, hoggab mwv Baalwg yugwngam mvpia paku hoo hoq bviywrho doonbo Aserangam patab paku.”

³¹‍Hvbmabde hiyv xeq mwam ceeko bo tulungam Joas benum, “Nulv Baal gab ai dvn yv? Ma mwam nulv ywwtayin? Hiyv xeq mwam aibo tulungam aaram sidwb mvtayin. Mwv pwnbo jaqkv nyiloqkam, mwam atam ai yeem suto, hoggab mwwg yugwngam mvpia paku.”

³²‍Hoqgab hoq aalho Gideon Jerubbaalnvn hvl bedwb goqnum, “Baalam ngam ceekol ai mvto,” hoggab mwv mwwg yugwngam mvpia pakun.

³³‍Midian nyi tulu ngvla Amalek nyi tulungv hoo dou-cagag nyiilungv lvkin gob hookumnum, hoo bulv Jordon pobungam rablayil Jejreelwg Lywpa ho svmcw mvl doonum.

³⁴‍Hvbmabde At Swg Yalv Gideon aoho haanum, hoo mwv tuuly miqnum, hoo Abiejer nyi tulungv mwwg kokwb wmin gvnum.

³⁵‍Hoo mwv Manasse gvda mwlwho pui baqn boam kanamnum, hoo bulam kam mwam wmin gvm dvb goqnum. Hoo mwv Aserb, Jebulunwb, hoo Naptalib pui baqn boam kanamnum, hoo bulv bulug lvgab wmin gvnum.

³⁶‍Ho Gideon Pwnbon benum, “Noqg benam hvb, Israelam ngoqg alaq soqgv ywwlin mvta yin nyiloqkam,

³⁷‍kaato, ngo pwbwb cengdwb jurpy deela so svcaq tan soog aptayin. Ho tan aroho gumsiam doom to, hoo ked deela mwlwngam pwtw mvto, ho ngo cengtayin, noqg benam hvb Israelam ngoqg alaq soqgv ywwlin tayin.”

³⁸‍Hoo hoqhv hvb nyinum. Hwdlo mwv ar komc gorab layil tanam heqxabnum, ho mwv tan hoqg gums issam pukaqho naleqgo heqlinum.

³⁹‍Ho Gideon Pwnbon benum, “No ngam haaxaq yaamabv; ngo lokta agam goonw do. Ngam anya mwwpa yaatwb, ngo lokta sam pwbwb hindy nwwdo. Anya mwwpa gvdwl tan aro sam pwtw mvto, hoo ked deela mwlwngam gums doom to.”

⁴⁰‍Hoo Pwnbov ai ham nyiknum; hoo tanv aro pwtw tvl doonum, hoo ked deela mwlwngv gums tvl dooknum.