Read Nyishi NYEGAM 7 Bible Online

NYEGAM 7 - Nyishi bible

NYEGAM 7

¹Ho Jerubbaal (hoqhv Gideon) la nyiilu mwlwngv mwwg lvgab ar komc gorab layil Harod iss buqlin ko bviywrho svmcw mvnum. Hoo Midian nyi tulug svmcwngv nyoodum daiyag More diiswg lywpa ho doonum.

²‍At Sw Gideonnvn benum, “Midian nyi tulungam bulug alaqho jilwq dvb, noqg lvgab wmin gvnbov nyiv ngoqgab vijaqpa, hvbmab lo Israelv larl hvl betayin, ‘Ngoqg alaqkv ngam ywwlin pakun.’

³‍Hoqgab sija nyiilug nyuru taga ho pui beto, ‘Hiyv xeq bosil hoo tvmdwr dvn, mwam nammwb wkur mvtku hoo Gilead Puutub nyebia jaqb xarm tuku.’” Ho 22,000 gob nyiilungv wkur kunum, hoo 10,000 gob doonum.

⁴‍Hoo At Sw Gideonnvn benum, “Nyiilungv hvraqb naleq pa. Bulam iss dookub bool to, hoo ngo bulam alo noqgab pooka tayin, hoo hiyam lajaqkam ngo nam betayin, ‘Soq ak si noqg lvgab wba tayin hvnam,’ ak hv noqg lvgab wba tayin, hoo hiyam lajaqkam ngo nam betayin, ‘Soq ak si noqg lvgab wba ram hvnam,’ akhv nam wba ram.”

⁵‍Ho mwv nyiilungam iss dookub boolwl ignum. Hoo At Sw Gideonnvn benum, “Nyiicwr-cwrxiam hiyv issam cumrabl mwwg lyol lvgab iky lyaqnam hvb lyaql twwn boam, no bulam vpwb mwbwqto. Hoqhvb kalam nyiicwr-cwrxiv hiyv lwbw kumbwl twwn boam vpwb mwbwqto.”

⁶‍Hoo bulug alaqho iss cumrabl twwn bov nyiv 300 gob nyinum, hvbmabde hoqg lvvgwg nyiilungv issam lwbw kumbwl twwnum.

⁷‍Hoo At Sw Gideonnvn benum, “Cumrabl twwn bo nyi 300 lvgab ngo nam ywwlin tayin hoo nulug alaqho Midian nyi tulungam jitayin, hoo asaq nyi tulu ham mwwg at nammwb wwm tuku.”

⁸‍Ho nyiilungv bulug dvs-twwsam la tuuliam naaknum. Hoo mwv lvvt ya nyi tulu ham at-atwg tombub wwm dukub kanam kunum, hvbmabde nyi 300 ham doom twqnum. Hoo Midian nyi tulug svmcwngv mwwg ako daiyag lywpa ho doonum.

⁹‍Hoq ai yubkin ho At Sw mwam benum, “Gorabto, svmcwngam paiyaq taab ito, hoggab ngo hoqham noqg alaqho jilwq pakun.

¹⁰‍Hvbmabde no svmcwb idwb bos dvnyiloqkam, noqg nyera Pura lvgab svmcwb imin gvto.

¹¹‍Hoo no tatayin bulv hoggv bedwn, hoo kokwngam no svmcwngam il ceeko dvb haakam tayin.” Ho mwv mwwg nyera Pura lvgab svmcw lvvgwg sipai dook namgub innum.

¹²‍Hoo Midian nyi tulu ngvla Amalek nyi tulungv hoo Dou-cagag nyiilu mwlwg lywpa bviywrho takam pumdu kunam hvb naleqgo doonum, hoo bulug svjinam, sa-svlo sugur xuqxiam xinya lamanam hvb xinya nyoma dvb naleqgo doonum.

¹³‍Hwdlo Gideon haanum, kaato, nyi ak mwwg ajinam yuma xwwtam tomdul doonum. Hoo mwv benum, “Kaato, ngo yuma ak yuma maanum, hoo kaato, tanyeq hoqgv wtw cwwnam ak Midian nyi tulug svmcwngam ngurjabnum hoo hv tombu urab haanum hoo tombungam tabto dvb ngurtabnum hoo ham likub-lexeq dvb mvnum, hoqgab tombungv ajab kunum.”

¹⁴‍Hoo mwwg ajinv birwqnum, “Soq si asaq deema, hvbmabde Joas gv ko tuup Gideonwg lyoqr orioq kvnpv, Israelwg nyi akv nvpv; Pwnbov Midian nyiam la svmcw mwlwngam mwwg alaqho jipa ku.”

¹⁵‍Hwdlo Gideon yuma xwwtamnam mam la yuma niqtuqkam tapa twqda kalam, mwv xumnum. Hoo mwv Israelwg svmcwb wkur kunum hoo benum, “Gorabto, hoggab At Sw jaqt bo Midian nyi tulungam nulug alaqho jilwq paku.”

¹⁶‍Hoo mwv nyi 300 ham dvpar oum gob mvnum hoo vxy cwrwg alaqho tuuly ak la asarbo uppum uraho mur rwgab tvl gvqlwq jinum.

¹⁷‍Hoo mwv bulam benum, “Ngam tuugabto, hoo ngoqg nyinam hvb nyito. Hwdlo ngo svmcw lvvgho haal nyitayin, ngoqg nyinam hvb nyito.

¹⁸‍Hwdlo ngo tuuliam miqyikam, ngo la ngoqg lvgab haabo mwlwngv miqtayin, ho nulv svmcw taqg-taqsaq hoqgv miqtayin, ‘At Sw gab la Gideon gab.’”

¹⁹‍Ho Gideon la lwwg nyiv mwwg lvgab svmcwg bviywrho haaknum, ho ai nywyw ra moodam bulv xil apnum, bulug mood xik jaqho, bulv tuuliam miqnum hoo uppum asaram bulug alaqkv xidinum.

²⁰‍Ho dvpar oum gon hvvkam tuuliam miqnum hoo uppum tulungam xidubnum. Bulug laqc alaqkv muram bwwtwl hoo lvqbwq alaqkv tuuliam miqnum. Hoo bulv vcjaqb sogoq goqrabnum, “Lyoqr orioq daag At Sw gab la Gideon gab!”

²¹‍Nyiicwr-cwrxiv svmcwngam doqyum tvl mwwg daqkho daqnum, hoo sipai mwlwngv xarnum. Bulv sogoq goql hoo kenum.

²²‍Hwdlo 300 nyiingv bulug tuuliam miqnum, At Sw nyiicwr-cwrxiam atwg ajinam hoo sipai mwlwngam lyoqr orioq hoqgv mengmin sumnum. Hoo sipai tulungv Jerera daiyag Bet-sitta, Abel-mehola doorwg Tabbat namgub kenum.

²³‍Hoo Israel nyiilungv Naptali hoqgv hoo Aser hoqgv hoo Manasse hoqgv nyi goqlin layil, hoo bulv Midian nyiam ruqmin gvnum.

²⁴‍Gideon Iprayim diisw gvdab nyi kanam tvl pui bilwql begamv, “Midian nyiam nyob patab soqb ito hoo Bet-bara iss pobu tulu hoola Jordon pobu hookam ceekol doqtum yaato.” Hoqgab Iprayim hoqg nyega mwlwngam goqlinum, hoo bulv iss pobungam Bet-bara hoqgv naalayil Jordon namgub naareq kunum.

²⁵‍Hoo bulv Midianwg lvpw at ko tuup Oreb nvla Jeebnvn nootu kunum. Bulv Orebnvn Orebg wlw ho mengnum, hoo Jeebnvn bulv Jeebwg ala raxor ko lwkw ho mengnum. Ho bulv Midian nyiam ruqmin gvnum, hoo bulv Oreb gvla Jeebwg peelo bo tulungam Gideonnvn Jordon kvtin gonho boolwq jiknum.