Read Nyishi NYEGAM 8 Bible Online

NYEGAM 8 - Nyishi bible

NYEGAM 8

¹Ho Iprayim nyi tulungv mwam benum, “Hoggub no ngulam soq sib nyipa kun, hwdlo Midian nyi tulungam nyob patab wiyikho ngulam goqmanum?” Hoo bulv mwam vcjaqb yolu benum.

²‍Hoo mwv bulam benum, “Nulv ngoqg lvgab bon nyiknam ham hoggv ngo twiyw-tvc taikun? Abiejerwg roo aaxiam noocumnam sam Iprayimg roo aaxiam punamv alyama dvn yv?

³‍Midianwg lvpw at ko tuup Oreb nvla Jeebnvn Pwnbov nulug alaqho jilwq pakun. Nulv ngoqg lvgab bon nyiknam ham hoggv ngo twiyw-tvc taikun?” Ho mwv soq tulu sam bulam betamyin bulv mwam haaxaq xvqngin kunum.

⁴‍Hoo Gideon Jordonb haanv hoqb rabnum hoo mwv la mwwg lvgab nyi 300 mv vigo ngaknum hvbsujaqkam ruqmin gvnum.

⁵‍Hoqgab mwv Sukkot nyi tulungam benum, “Anya mwwpa gvdwl ngam wmin gvnbo nyiilu sam wtw lo jito, hoggab bulv ngapa ku, hoo Midian lvpw at Jeba nvla Jalmunnanvn ngo ruqmin gvl ruqdu dvn.”

⁶‍Hoo Sukkot saab tulungv benum, “Ngulv noqg sipai tulungam wtw jidwb, nulug alaqho Jeba la Jalmunnangam nootu pak nvi yv?”

⁷‍Ho Gideon benum, “Hvb paloqkam alv, hwdlo At Sw Jeba nvla Jalmunnanvn ngoqg alaq so jilwq yukun, ngo nulug gv aiyaqkam deexa-rarag tonyum taa lvgab jwwmin tayin.”

⁸‍Hoo mwv hoqgv wnv Penuelwb caanum, hoo bulam agam akin ham benum, hoo Penuel nyi tulungv Sukkot nyi tulug benam hvb mwam birwqnum.

⁹‍Hoo mwv Penuel nyi tulungam benum, “Hwdlo ngo swrsob hookur yukun, ngo soq soja sam mvpia lotayin.”

¹⁰‍Jeba la Jalmunna bulug sipai lvgab Karkorho doonum, dou-caga sipai nyi tulungam apaq kunam sipaiyv 15,000 gob dootwq kunum, hvbmabde 120,000 nyi gob lyoqr orioq hoqgv mengknum.

¹¹‍Hoo Gideon dou-caga Noba la Jogbeha ho tombu doonbo nyi tulug lamtab caanum hoo bulv hog mwwmiq maab alv subo hvl mwwl dooi yikho, sipai tulungam nyob panum.

¹²‍Hoo Jeba la Jalmunna kenum, hoo mwv bulam ruqmin gvl hoo Midianwg lvpw at Jeba nvla Jalmunnanvn nootu kunum, hoo sipai mwlwngam hendar-kaapar maadwb mvnum.

¹³‍Ho Joas gv ko tuup Gideon nyob pak hoqgv Heres lamtab wkur kunv iknum.

¹⁴‍Hoo mwv Sukkot yaapa ak nootunum hoo mwam toxnum. Hoo mwv Sukkot saab tulu gvla nyi axa tulug eminam camkvn leq kvn gob mwam xiqj kunum.

¹⁵‍Hoo mwv Sukkot nyi tulug dookho haanum hoo benum, “Kaato Jeba la Jalmunna, hiyam nulv ngam bej-beparl begamv, ‘Ngulv noqg sipai nganbo tulungam wtw jidwb, nulug alaqho Jeba la Jalmunnangam nootu pak nvi yv?’”

¹⁶‍Hoo mwv bopamg nyi axa tulungam nookumnum, hoo mwv deexa-rarag tonyum taangam naanum hoo Sukkot nyi tulungam bulam tonyum taa lvgab laqm-baqmwl tomswrnum.

¹⁷‍Hoo mwv Penuel sojangam pageqnum hoo bopamg nyi tulungam mengnum.

¹⁸‍Ho mwv Jeba la Jalmunnanvn benum, “Tabor ho nulug nyi mengnamv hogloq lo?” Bulv birwqnum, “No hoggub nyidwn, bulv hvbkalam nyinum. Nyiicwr-cwrxiv lvpw atwg ko tuup ak hvb nyinum.”

¹⁹‍Hoo mwv benum, “Bulv ngoqg vbw-borv, ngoqg annwg ko tuup tulu ngv. At Sw swwl doody deedib, nulv bulam swwl doom dvnyiloqkam, ngo nulam mengdy ma.”

²⁰‍Ho mwv mwwg ko tuup vbw cociq Jeternvn benum, “Gorabto hoo bulam mengto!” Hvbmabde yaapa ak hv mwwg lyoqr orioqkam seqlin maanum, hoggab mwv himy yaapa ak gob nyixiq ko-gab bosnum.

²¹‍Ho Jeba la Jalmunna benum, “No atv gorab gvdwl ngulam mengt kubv, hoggab nyi ak gab bon nyij tanamv nyiingam mood naadwn.” Hoo Gideon gorab kunv Jeba nvla Jalmunnanvn mengnum, hoo bulug svjin tulug lwwpo hoqg tvswngam mwv naaknum.

²²‍Ho Israel nyi tulungv Gideonnvn benum, “No la noqg ko tuup tulungv hoo noqg ko hosiq tulu ngvkam, ngulam pvvb bwwl doog tvb, hoggab Midian nyi tulug alaq hoqgv no ngulam ywwlin paku.”

²³‍Gideon bulam benum, “Ngo nulug aoho pvvb bwwl doog ram, hoo ngoqg ko tuupv nulug aoho pvvb bwwl doog ram; hvbmabde At Sw nulug aoho pvvb bwwl doog tayin.”

²⁴‍Hoo Gideon bulam benum, “Ngo nulam hognvk lo ak kodwb mwwdo: nul nyiicwr-cwrxiv mwwg nyob pal naareqnam gagy tulu ham ngam jitbv.” (Hoggab bulv hun gagy tulungv doognum, hoggab bulv Ismaiyel nyi tulungv.)

²⁵‍Hoo bulv birwqnum, “Ngulv hoq tulu ham mwwr cikwl jitayin.” Hoo bulv vj rumg puuptvl, hoo nyiicwr-cwrxiv mwwg nyob pal naareqnam gagy tulungam hurkum jinum.

²⁶‍Hoo mwv bul galoqkv hun gagy kokum kunamv 1,700 sikil hun gob nyiknum, hoqg lvvgho Midianwg lvpw at tulug lwwpo hoqg muny-tvswngam hoo gaiyam hoo lwwsa-lwwma bo vj koonam tulu ham, hoo bulug svjin tulug lwwpo xiqlwqnam tulu ham jiknum.

²⁷‍Hoo Gideon hoq nookumnam hoqgv kamt vj rumg mvnum hoo ham Opra bopam ho apnum. Hoo Israel mwlwngv hoqham ya haal xumn-paqnum, hoo hoqhv Gideon gab la mwwg imiq gab pwd-poto gob nyiknum.

²⁸‍Hoqgab Midian nyi tulungv Israel nyiilug uraho dooknum, hoo bulug dumpongam bulv paarab kumanum. Hoo Gideonwg swwl dood aalho gvdangv vnyw campy gob swrsob doonu kunum.

²⁹‍Joas gv ko tuup Jerubbaal wknv mwwg atwg namho dooknum.

³⁰‍Gideon, mwwg atwg ko tuupv cam kvn go doonum, hoggab mwv naleqgo nywxwngv doonum.

³¹‍Hoo mwwg Sekem hoqgv xwwbaq nywxwngv mwam nyega ko ak bwwjnum, hoo mwwg eminam mwv Abimelek hvl goqnum.

³²‍Hoo Joas gv ko tuup Gideon vigo nyekam swwyu peekul siknum hoo Abiejer nyob tulug Opraho, mwwg ab Joas gv nyubu ho liiknum.

³³‍Gideon sileq kalam twqda, Israel nyiilungv Pwnbon apaq pel Baal tulug kokw yaab wmin gvnum hoo Baal-berit ngam bulug pwnbo gob mvknum.

³⁴‍Hoo Israel nyiilungv bulug Pwnbo At Swn, hiyv lwxiam bulug ceebio tulu hoqgv bulam ywwlin boam mwwpa kumanum,

³⁵‍hoo mwv Israel nyiilu gab albo bonam nyij sunum, hvbmabde bulv Jerubbaalwg imiq nyi tulungam aby kumanum (hoqhv Gideon).