Read Nyishi NYEGAM 9 Bible Online

NYEGAM 9 - Nyishi bible

NYEGAM 9

¹Jerubbaalwg ko tuup Abimelek mwwg annwg imiq lwkw nyi tulu dookub Sekemb wnum hoo mwwg annwg imiq nyob dvparam bulam benum,

²“Sekemg nyigbo mwlwg nyuru tagaho beta, ‘Jerubbaalwg ko tuup cam kvn mwlw hv nulam pvvb bwwl doognamv al dvi yv ma akin gon nulam pvvb bwwl doognamv al dvi yv, hogloq akv nulgab aldo?’ Ho sam kam mwwgab to ngo nulug loobu looyaq hoqgv lengn bov.”

³‍Hoo mwwg annwg imiq nyi tulungv mwwg bid gab soq gomcwr tulu sam Sekemg nyigbo mwlwg nyuru ho betamnum, hoo bulug hangv Abimeleknvn nyimin-wmin gvdwb bulug hangv mwwxamnum, hoggab bulv benum, “Mwv ngulug vbw-borv.”

⁴‍Hoo mwam rup vjwr cam kvn go Baal-berit nam hoqgv bulv jinum, hoqg twngk hoqgv Abimelek nyi almanbo ata mwv goqnum, ho bulam mwam wmin gvmnum.

⁵‍Hoo mwwg abwg nam dook Opraho mwv wnum hoo Jerubbaalwg ko tuup cam kvn mwwg vbw-boram wlw pwkin aoho mengnum. Hvbmabde Jotam, Jerubbaalwg ko tuup anya hv dootwqnum, hoggab mwv atv kvsil doonum.

⁶‍Hoo Sekemg nyigbo mwlw ngvla Bet-millo nyi mwlwngv lvkin gob hookumnv, hoo bulv Sekem kora svvn niikum ho Abimeleknvn lvpw at gob mvknum.

⁷‍Hwdlo hoqham Jotamnvn betam yin, mwv Gerijim Puutu aob caonum hoo vcjaqb sogoql bulam benum, “Ngam tagabto, Sekemg nyigbo tulunga, Pwnbov nulam tapa kamyi nvpv.

⁸‍Lok golo svvn tulungv lvpw atam xuqlinl kuty neetab wnum, hoo bulv olib svvnam benum, ‘Ngulam pvvb bwwl doogto.’

⁹‍Hvbmabde olib svvnv bulam benum, ‘Ngo svvn tulug aoho lvpw at gob swwk baloqkam, pwnbo tulungam la xinam nyi tulungam kuty neen mvdwb ngoqg kuty jinam mam apaq dvb nyitayin?’

¹⁰‍Hoo svvn tulungv taoq svvnam benum, ‘No haag dvl ngulam pvvb bwwl doog tvbv.’

¹¹‍Hvbmabde taoq svvnv bulam benum, ‘Ngo svvn tulug aoho lvpw at gob swwk baloqkam, ngoqg tiiswr dvb la aldvb aaxy xeeknam sam apaq dvb nyitayin?’

¹²‍Hoo svvn tulungv roo annam benum, ‘No haag dvl ngulam pvvb bwwl doog tvbv.’

¹³‍Hvbmabde roo annv bulam benum, ‘Ngo svvn tulug aoho lvpw at gob swwk baloqkam, ngoqg alangam Pwnbov la nyi tulungv twwtwl hwrcw dvb mvnam mam apaq dvb nyitayin?’

¹⁴‍Ho svvn mwlwngv taa nwmwngam benum, ‘No haag dvl ngulam pvvb bwwl doog tvbv.’

¹⁵‍Hoo taa nwmwngv svvn tulungam benum, ‘Nulv ngam mwwjwl nulug aoho lvpw at gob xuqlinl mvp nyiloqkam, ngoqg dookub haato hoo ngoqg doonyium so cwwgw to, hvb mabaloqkam, taa haataq soqgv wm gulin layil Lebanonwg sidar mwlw sam guiyum tayin.’

¹⁶“Hoqgab sija, nulv jvqtw jaqb hang mwwjwl hoo al mwwpanam mam hwdlo nulv Abimeleknvn lvpw at gob mvi yikho, hoo Jerubbaal mwv nulam bon nyij kunam mam, nulv mwam la mwwg imiq dvparam alwb hognvkv nyij sanamv doonam ham nyijnam yv—

¹⁷‍hoggab ngoqg ab nulgab nyob panum hoo mwwg atwg swwgam ludum tvl nulam Midian nyi tulug alaq hoqgv naalinum,

¹⁸‍hoo soolo nulv ngoqg abwg imiq dvparam ceekol hoo mwwg ko cam kvnnam wlw pwkin aoho mengp paku, hoo mwwg paqn ko tuup Abimeleknvn Sekemg nyigbo tulug aoho lvpw at gob mvpa ku, hoggab mwv nulug imiq lwkw nyiib nyijpa—

¹⁹‍nulv al mwwpal hoo mwwjwl layil Jerubbaal la mwwg imiq dvparam soolo soq nyinam si al paloqkam, Abimeleknvn hwnyir-hvmar mvto, hoo nulv kam mwwg lvgab hwnyir-hvmar to.

²⁰‍Hvb madnyiloqkam, Abimelek hoqgv wm gulin gvdwl Sekemg nyigbo tulungam la Bet-millo nyi tulungam gux mvto; hoo Sekemg nyigbo tulu hoqgv la Bet-millo hoqgv wm gulin gvdwl Abimeleknvn gux mvto.”

²¹‍Hoo Jotam ham bepe kul xal kenv Beerwb wnum hoo hoqho mwv doonum, mwwg vbw Abimeleknvn bos ko-gab.

²²‍Abimelek Israelam vnyw nywum go pvvb bwwl doognum.

²³‍Hoo Pwnbov almanbo yalam Abimelek gvla Sekemg nyigbo tulug pengko ho kanam nvmlwqnum, hoo Sekemg nyigbo tulungv Abimeleknvn vc loodab ceekol xima-paqmab nyinum,

²⁴‍ho Jerubbaalwg ko tuup cam kvnnam almab nyinam hv haakam yin pv, hoo bulug hijumv bulug vbw-bor Abimelek aoho haanum, hoggab bulam mwv mengnum, hoo Sekemg nyi tulug aoho haanum, hoggab bulv mwam haakam dvb ator jitwl mwwg vbw-boram mengmnum.

²⁵‍Hoo Sekemg nyigbo nyi tulungv mwam ceeko nv puutu aoho nyiingam tooiyal doomnum, hoo hoq lamta ho bulv wpeq bo tulungam naalil naareqnum. Hoo hoqham Abimeleknvn betamnum.

²⁶‍Hoo Ebedwg ko tuup Gaal mwwg imiq dvparam boolayil Sekem urab haanum, hoo Sekemg nyigbo tulungv mwam svqgwnum.

²⁷‍Hoo bulv rongob wnv roo aaxy pukum layil hoo ham twws alab mvtwl hoo xilo soonam mam soonum; hoo bulug pwnbo tulug nammwb bulv wnum hoo dvt-twwt tvl hoo Abimeleknvn bej-beparl oyumnum.

²⁸‍Hoo Ebedwg ko tuup Gaal benum, “Hiyv Abimelek, hoo Sekem nyi tulu ngulv hoggub mwam xuml-paql bon nyij dvn? Mwv Jerubbaalwg ko tuup maai yv, hoo Jebul mwwg saab maai yv? Sekemg ab Hamorwg nyi tulungam xuml-paql bon nyij to; hvbmabde hoggub ngulv mwam xuml-paql bon nyij sutayin?

²⁹‍Soq nyiilu si ngoqg alaq so doonyi loqkam, ngo Abimeleknvn mvpaq pan pv. Ngo Abimeleknvn hvl bed nvpv, ‘Noqg sipaiyam vigo mvqlw mvtwl hoo agab lengto.’”

³⁰‍Hwdlo bopam hoqg pvvb bwwl doogbo Jebul Ebedwg ko tuup Gaalwg gomcwr tulungam tapa tvl, mwv vc loodab hang lengnum.

³¹‍Hoo mwv pui baqnbo tulungam Abimelek dookub kanam nvms lwql begamv, “Kaato, Ebedwg ko tuup Gaal la mwwg imiq nyi dvparv Sekemg ho haapa ku, hoo bulv nam ceekol bopam mam hur-marab dvb nyig gvdo.

³²‍Hoqgab sija, no la noqg lvgab dooba bo nyiilungv soi wgdvl rongo ho tooiyal dooto.

³³‍Ho aaram ar komc doonyiv caalin kalam twqda nyebia jaqb bopamb xara to. Hoo hwdlo mwv la mwwg lvgab doomin gvnbo nyiilungv nam ceekol lengyi kam, noqg alaq ipanam gotwq bolo bulam mvnam mvto.”

³⁴‍Hoqgab Abimelek la mwwg lvgab dooba bo nyi tulungv ai wrab banv dvpar vpy gob mvtwl Sekem mam ceeko dvb tooiyanum.

³⁵‍Hoo Ebedwg ko tuup Gaal wnv bopamg haagag toggoqho daqyanum, hoo Abimelek la mwwg lvgab dooba bo nyiilungv tooiyal dook hoqgv gorabnum.

³⁶‍Hoo hwdlo Gaal nyiilungam kaapa yin, mwv Jebulnvn benum, “Kaato, puutu ao tolo doonbo nyiilungv hoodul doodo!” Hoo Jebul mwam benum, “No puutu yal bobongam nyi gob koomur maas i.”

³⁷‍Gaal lokta benum, “Kaato, gvda lvpa ra aloqkv nyiilungv hoodul doodo, hoo dvpar akwn Nyiqry kaak Kora daiya hoqgv hoodu do.”

³⁸‍Ho Jebul mwam benum, “Sija noqg agamv hoglo, hiyam no benum, ‘Abimelek hiyv, ngulv mwam bon nyij dvb?’ Aloq nyiilu vv hiyam no haqpaqnam hvvma i? Sija lvvgwb lengdvl bulam nyob pata.”

³⁹‍Hoo Gaal Sekemg nyigbo nyi tulungam boolayil bulam nyob pvrwqnum.

⁴⁰‍Hoo Abimelek mwam ruqmin gvnum, hoo mwv mwwg aga hoqgv keleqnum. Hoo naleqgo un gvnum, ho bopamg haagag toggoq namgub ruqlwqnum.

⁴¹‍Hoo Abimelek Aruma ho doonum, hoo Jebul Gaal nvla mwwg imiq nyi dvparam ruqpaq kunum, ho bulv Sekem ho doogwl doola kumanum.

⁴²‍Aal loogwn so nyiilungv rongob wnum, hoo ham Abimeleknvn betamnum.

⁴³‍Mwwg nyiilungam mwv boolayil hoo ham dvpar oum gob mvpin-mvranum hoo rongo ho tooiyal doonum. Hoo mwv nyiilug bopam hoqgv lengnam mam kaapa yin, mwv toos koob lenglayil hoo bulam mengnum.

⁴⁴‍Abimelek la mwwg lvgab doomin gvnbo nyi tuluhv bopam haagag toggoqb nyebia jaqb xaranum, hvbmabde dvpar vnyi gon hv rongob xarnv rongo ho yvnbo tulungam bulam mengnum.

⁴⁵‍Hoo Abimelek hoq aal loopw ho bopam mam ceekol nyob panum. Mwv bopam mam naareq kunum hoo hoqho doonbo nyiilungam mengnum, hoo mwv bopam mam wm tolwqnum hoo ham al lvgab taaiyaqnum.

⁴⁶‍Hwdlo Sekemg Sojag nyigbo nyi tulungv ham tapa yin, ator jaqb cwwgwl dook El-berit nam urab bulv haanum.

⁴⁷‍Sekemg Sojag nyigbo nyi tulungv lvkin gob hookumnam mam Abimeleknvn betamnum.

⁴⁸‍Hoo Abimelek la mwwg lvgab doonbo nyiilungv Jalmon Puutub caanum. Hoo Abimelek mwwg alaqho vxam bwwnum hoo nwmw sengbo agaq gaqg palayil ham mwwg gorbw aoho apnum. Hoo mwv mwwg lvgab doonbo nyiilungam benum, “No hoggv nyidwb nulv kaanum, hvb nyebia jaqb nulv ngoqg nyinam hvb nyito.”

⁴⁹‍Hoqgab nyiicwr-cwrx nyiilungv mwwg agaqkam palayil hoo Abimeleknvn wmin gvl hoqham ceekol cwwgwko namho vlwqnum, hoo bulv hoq cwwgwko nammam wm tolwq kunum, ho Sekemg Soja hoqg nyiilungam mengnum, hoqho sin bov nyem-nyegab 1,000 gob nyiknum.

⁵⁰‍Ho Abimelek Tebejib wnum hoo Tebejab hwwiyuml ham naareq kunum.

⁵¹‍Hvbmabde bopam uraho cwwgwl dook hwngkw bo soja ak doonum, hoo nyem-nyega mwlw ngvla bopamg nyigbo tulungv hoqb kilwqnv hoo bulv atv mutum tvl hoq uraho doonum, hoo bulv soja aoho caol doonum.

⁵²‍Hoo Abimelek sojab haanum hoo ham ceekol nyob panum hoo sojag viyap lwkwb haal wm tolwq taab ogumb haanum.

⁵³‍Hoo nyem ak soja ao hoqgv miiriq lwpia ak joogeq lonv Abimelek gv dumpongam joodaqnum hoo mwwg dumpongam joodupnum.

⁵⁴‍Ho mwv nyebia jaqb mwwg nyob pananam baqnbo yaapa akam goqanum hoo mwam benum, “Noqg lyoqr orioqkam seqlin gvdwl ngam mengt kubv, hvbmaba lo bulv ngam hvl betayi, ‘Nyem akv mwam meng nukun.’” Hoo mwwg yaapa akv mwam orioqkv nwqlwq kunum, hoo mwv siknum.

⁵⁵‍Hoo hwdlo Israel nyiilungv Abimeleknvn sidwb kaapa peekul, nyiicwr-cwrxiv mwwg at nammwb wng-wral wknum.

⁵⁶‍Soq sib Pwnbov Abimelek gv almab nyinam mam mwwg aoho hookur mvknum, hoggab mwwg abwg imiqkam mwv ceekol mwwg vbw-bor cam kvnnam mengnum.

⁵⁷‍Hoo Pwnbov Sekemg nyi tulug almab nyinam mam rub bulug dumpo aoho haam kunum, hoo Jerubbaalwg ko tuup Jotamwg beenamv bulug aoho haaknum.