Read Nyishi NYIQRY 1 Bible Online

NYIQRY 1 - Nyishi bible

NYIQRY 1

¹Oyu maadab nyidynam pagoqkam Jisu Kriston mwwg nyera tulungam bekin mvdwb Pwnbov mwam jipoqnam puiyam huulinam. Soq sam Pwnbov mwwg ao gumtwngam kanam tvl mwwg nyera Jonnvn bekinnum.

²Jon mwv kaanam hog mwlw luuxiam bekinnum. Soq nyiqry kaanam tulu Jonwg Pwnbov Jisu Kristo galoqkv pui huulinamv.

³Hiyv nyiv soq pota soq xeqnam gaml sam bugil tal swwnbo nyi tuluhv paqyalinco! Hoggab soq mwlw si nyid moodv hvvnwq paku.

⁴Jon galoqkv Asiya gvdaho doonbo dvrwq namlo kvnam salam jidwn. Sijakam doonbo, kolgv dooky bo ho kuiyum godab doody bo, haady bo mwwg viyin dootam agaho doonbo yal kvn hoqgv ho mwwjwnam hvvky, swwgwb purab kunam, dwr buqconam ko tuup, sik boam turdkub purab kunam,

⁵gvda gvtwg lvpw at tulungam bvvl doogbo Jisu Kristo galoqkv anyangv la swrsomalongv nulug gab doonka. Mwv ngulam abydvn hoo ngulam mwv swlyw kunv ngulug nyic hoqgv naalin pakun.

⁶Mwv ngulam mwwg Ab Pwnboam xumdvb lvpwg nyubwb mvpa kun. Yuunamv la atorv nwrba cwtam hoqgv nwrba gob Jisu Kristo gab doonka. Amen.

⁷Kaato, mwv doomwq aotv hoodu do! Nyi mwlwngv vxiv mwam nwwxo nwqnbov kam mwam kaapa tayin. Swcw nvg gort so doonbo nyi mwlwngv nyob luuxiv mwam kaatwl xabtayin! Vv, hvb nyitayin, Amen.

⁸Mwlwngam ator jinbo At Sw Pwnbov sijakam doodubo, kol kam doonum ho nwrba cwtam nagub doodwb haady bo akv bedwn, “Ngo otuqjaqkv hoo kootwrv.”

⁹Jisu Kristog buu akgob nyil, nulug lvgab hentwram hemin gvnbo mwwg lvpwg nyi tulub nyil nulug bor Jon ngo, Pwnbog agam mam ho Jisug ngam jvqtwngam kaakinam mam ngo bekar yvgam gab ngam Patmos iss boqcumho tumpaql apnum.

¹⁰At Swg aalho Yalv ngam mvturl doognum hoo ngo agam vc alwb benamgo ngoqg langk taqc asoqkv doogum dunam hvb dudub tapanum.

¹¹Hoq agamv benum, “No hognvkv kaapa dvn ham xeqpto ho hoq pota ham lvpw kvnho doonbo dvrwq namlo tulungam jilwqto; Ipisi, Ismarna, Pargamam, Tiyatira, Sardis, Piladelpiya ho Laodisiya.”

¹²Kokw so ngo nywkurl hiyvjaq ngam goonbov ham kaadwb nyinum, ho ngo kaapanamv wm muram twgwnan kvn go kaapanum.

¹³Hoq tulug pengko ho nyi jaq hvb nyinbo vj lvbor lvsor dvb kootwl viyin soruqkam haabo ho gvtwl doonam mam kaapanum.

¹⁴Mwwg dumpongv la dumv svcaq hvb ho tapam hvb huuda kvlanum ho mwwg vnyiqkv wm hvb bioqnum.

¹⁵Mwwg lvpiangv pitolam jiqxuql apnam pitol hvb huuda kvlanum ho mwwg agam Yalv issiv bwdwlo topoqnam hvb dunum.

¹⁶Mwwg alaq lvqbwqho mwv takar kvn go gvbwl bvvl doognum, hoqgv mwwg agam hoqgv lyoqgw lyoqar kaadar maab areqbo lyoqr orioq daag lengnum. Mwwg nyuqtuq-moorv doonyi caadabo hvb nyinum.

¹⁷Ngo mwam kaapa tvl, mwwg lvpia lwkw hv geqpwl nyi sikbo hvb nyiknum. Mwwg alaq lvqbwqngv ngoqg aosi idaql ngam benum, “Bos maabv! Ngo otuq hoqgv doodwn ho kuiyum nagub dootayin.

¹⁸Ngo turl doodubo akv! Ngo siknum, hvbmabde ngo sija galoqkv nwrba cwtam hoqgv nwrba gob turl dootayin. Ngoqg atorv sinam aoho doodwn ho sikbo tulug ao hookam doodwn.

¹⁹Hoqgab ngoqg kaapanam hog mwlwngam ho sija hognvkv doodwn ho soqg kokwb hog nvkvxeq nyita dvn hoq nyidybo tulu ham xeqto.

²⁰Ngoqg lvqbwq taqc so doonbo takar kvn hv dvrwq namlo kvn hoqg ao gumtw kvnv ho kvn mur twgwnan hv dvrwq namlo kvnam bedwn.