Read Nyishi NYIQRY 10 Bible Online

NYIQRY 10 - Nyishi bible

NYIQRY 10

¹Hoq kokw so ngo ator albo ao gumtw ak ao gvda toloqgv ipoqnam mam kaapanum. Mwam doomwqkv liqlubnum ho mwwg dumpongam haqr gogo ak gooiyiqnum, mwwg nyuqmv doonyi hvb nyinum, mwwg lvpiangv wm swwrw hvb nyinum.

²Mwwg alaqho pota vtiq tiqnyo ko ak taakoq tvl bvvnum. Mwwg lvpia lwbwqkam sa-svlo aoho ho lvpia lvcam ked aoho daptvl vc alwb sogoql benamv

³ho mwwg sogoqnamv sony nyot sogoqnam hvb dunum. Mwv sogoq goqxo kalam doogum kvnv vc alwb goqrwqnum.

⁴Hoq doogum kvnv vc alwb duda kalam ngo xeqtanum. Hvbmabde ao gvda toloqkv agam ak ngo tapanum, hv benum, “Doogum kvnv hognvkv bepan ham belin maab kvsil apto; ham xeql ap maab!”

⁵Hoq kokw so sa-svlo aoho la ked aoho daptvl daqnbo ao gumtw akv mwwg alaq lvqbwqngam ao gvdab ica tvl

⁶hoo dingl benum hiyv nwrba cwtam hoqgv nwrba gob doodwn, swcw-nyodongam pwnbo, sa-svlongam ho hoq uraho doonbo hog mwlwngam pwnbo Pwnbog emin gab ao gumtwngv benum, “Hoqhv oyu go dugub kuram!

⁷Hvbmabde kvn deen ao gumtw akv mwwg tuuliam miqk baloqkam, Pwnbov mwwg uraho mwwsil apnam bvrwqngam, mwv mwwg nyera tulungam ho nyiqry benbo tulungam bekinam hvb bon niqtuq nyilin taikun.”

⁸Hoq kokw so ao gvda toloqgv ngo agam goodwb tapanamv ngam benum, “Wn sa-svlo hoola kedho daptvl daqnbo ao gumtw alaq alo taakoq tvl bvvnam pota vtiqngam naato.”

⁹Kokw so ngo ao gumtw dookub wbnv mwam pota vtiqngam ngam jitbvk hvl konum. Mwv ngam benum, “Naag dvl sam dvto, si noqg aiyeq uraho kacaq tayin, hvbmabde noqg agam uraho si tong ngola hvb tiiswr tayin.”

¹⁰Ngo pota vtiq tiqnyo koam mwwg alaq hoqgv naal dvnum, ho hoqhv tong ngola hvb ngoqg agam ura si tiinum. Hvbmabde ngo meqxo kokw so hoqhv ngoqg ayeq ura si kacaq kunum.

¹¹Hoq kokw so ngam betamnum, “No nyiilug pagoqkam, nyob tulug pagoqkam, nyob luuxig agam mam ho gora ab tulug pagoqkam Pwnbog puiyam bekin dvb nyiky tayin.”