Read Nyishi NYIQRY 11 Bible Online

NYIQRY 11 - Nyishi bible

NYIQRY 11

¹Hoq kokw so ngam xinnan toolo sog jitwl benum, “Wgdvl Pwnbog xumk nammam la yugw pvvkam xika ta, ho xumk nam uraho xumdul doonbo nyi tulungam xita.

²Hvbmabde haagag haty ham ximab, hoggab haagag haty hv Nyoodo nyi tulungam jipaqnamv ho bulv dvrwqbo lvpwngam pool campy leq bvrnyigo caajab tayin.

³Ngo ngoqg hvvky vnyi go tuila vj koomtvl kanam tayin, ho bulv Pwnbog puiyam aal 1,260 pengko ho bekin tayin.”

⁴Hvvky vnyi hv Olib svvn nwnyiv ho gvda gvtwg At Swg agaho daqnbo mur puunyiv.

⁵Hiyv akgon bulam hog mvta baloqkam bulug agam hoqgv wmv bioqlinl bulam mvta boam gux tayin, ho soq sib nyil hiyv nyiv bulam mvta dvn ham mengtayin.

⁶Bulv doonyi-poolam mutum tvl bulv Pwnbog puiyam bekar dvk moodam nyodo hom mvma dvb atoram doogdvn. Bulv issam kam uiyib mvdwb atorv doodwn. Bulv gvda gvtam mvdin tvl gvda so deedy luuxy vcam cimdvb bulug mwwlwqb mvdwb atorv doodwn.

⁷Bulv puiyam betam tamxo kokwngam nywywngam hoc maanam ung hoqgv sony nyot ak lengl bulug lvgab nyob pal bulam mviya tayin ho mengtayin,

⁸hoo bulug svmangv hogloqho bulug At Swam daapo aoho mengnum hoq nampamg lamta paanho geqpwl dootayin. Niitin tingwnan nampam hoqg eminv Sodom hvvma baloqkam Ijipt hvl benamv.

⁹Nyiilu luuxiv, nyob luuxiv, luuxy agam benbo nyi tulungv, nyi hoolu luuxiv bulug svmangam aal loum gola loopo go kaal doog tayin ho bulug svmangam nyubuho liimdvb jiram.

¹⁰Hoq nyi vnyiv sigam gab gvda soq nyi tulungv hemp pomangam potayin. Bulv hwnyir-hvmar nyil akwn akwn aky jiko sutayin; hoggab soq nyiqry benbo tulug vnyw si nyia kog aoho vigo hentwram jinum.

¹¹Aal loum gola loopo kokw so Pwnbog galoqkv swwgnan dooiyv bulug hang urab haanum, ho bulv daqrab kunum. Bulam daqrabnam mam kanbov mwlwngv lomnum.

¹²Kokw so hoq nyiqry kaanbo vnyiv ao toloqkv vc alwb agam yal ak bulam benam mam tapanum, “Nulv soqb aob caato!” Bulug ceebio nyemaqkv kaad lalab bulv doomwq ao golo ao gvdab caaknum.

¹³Hoq nyidy jaqho nyioby bit ak vcjaqb hwqnum, ho nampam hoqg pal wyw hoqgv akwn al kumanum, ho lwwyw kvn go nyiv siknum. Ho nyi simab doonbo nyi tulungv loma vrram lomnum ho ao gvdag Pwnbog koinam pagoqkam xumnum.

¹⁴Bosnam vnyi gon wnkun, hvbmabde oum deenv oyu maadab haatayin!

¹⁵Hoq kokw so kvn deen ao gumtw akv mwwg tuuliam miqnum, ho ao gvda ura tv agamv vc alwb dunum, hv benum, “Gvda gvtam sija bvvdkub ngulug At Swg alaqlo la Kristog alaqho doodkun, ho nwrba cwtam hoqgv nwrba gob mwv ham bvvtayin!”

¹⁶Kokw so Pwnbog agaho hun pvlwho doonbo nyiixa camnyi leq vpiv Pwnbog agaho pvxwl Pwnboam xuml benum:

¹⁷“Kol galoqkv dooky bo, sijakam doonbo, Mwlwngam ator yaanbo Pwnbo At Swv! Ngulv nam paqdwn hoggab no, noqg atoram bvvtwl lvpwngam yirab tag duku!

¹⁸Nyoodo nyiingv hang lengmanam mam lengnum, hvbmabde noqg hang lengdynam moodv haapa ku, ho sikbo tulungam pw-hwwd moodv hvvnwq paku. Noqg nyera tulungam, nyiqry benbo tulungam, nam xumn bo noqg nyi tulungam, koi ge, anyo ge, mwlwngam bulug nyijongam jood moodv haapa ku. gvda gvtam muiyu boam twrd moodv haapa ku!”

¹⁹Ao gvda tolo Pwnboam xumk nammam mvkoql apnum ho pvvb Uddum mam kaapa dvb nyinum. Hoq kokw ho taiyamv bioqlinum; agam mam tapanum, doogum gumnum, nyiobiv hwqnum ho nyodo taa-ngv vcjaqb hurnum.