Read Nyishi NYIQRY 12 Bible Online

NYIQRY 12 - Nyishi bible

NYIQRY 12

¹Kokw so ao gvda tolo hog kamanam kaas ak lengnum. Dvn ak doonyiam gvvho baqtwl hoo poolam lvpia hv gvtwl hoo takar cwyw leq cinyig doonbo ywr dumtup ak dumpo aohv bentwl lengnum.

²Mwn kepo ho ko gvnamv bwwsv twqb nyinum. Mwn ko bwwdwb cinc vc cil doonum, hoo vcam henla maab mwn sogoqnum.

³Kamanam akta ao gvdaho lengnum. Kaato, dumpo kvnwg baqnbo, vrrw rwwyw go gvnbo ho dumpo pwxyho bopya paasaqgo benbo mucum lvvr-laanyi tvb sog lengnum.

⁴Mwwg amiv ao gvdag takar oum hoqgam akwn gvda gvtwb xigeqnum. Mwv nyem akwg agaho daqtwl nyem hoq koam bwwlin kalam dvdwb mwwnum.

⁵Kokw so nyem akv nyega ko ak bwwnum, mwv nyob mwlwngam kor jaqb mwwg alaqho bvvtayin. Hvbmabde hoq ko akam Pwnbog hun pvlw dookub la Pwnbog dookub naareql wgnum.

⁶Nyem akv Pwnbov mwam kvsil dookub mvp jinam ho 1,260 aal gob dootab deexa-rarab keleqnum.

⁷Kokw so ao gvda tolo nyobv parabnum. Mikael la mwwg ao gumtw tulungv mucum lvvr-laanyi tvbwg ceebiob nyob panum. Mucum lvvr-laanyi tvb mwwg gumtw tulungam bootwl nyob pvrwqnum.

⁸Hvbmabde mucum lvvr-laanyi tvbv paiyanum, hoo mucum lvvr-laanyiam la mwwg gumtw tulungam ao gvda tolo doom dvb jik maanum.

⁹Mucum lvvr-laanyi tvb xitorbo, kolwg tvb sov, Ui yup, gvda gvtam xaalyo lyopaqbo, surbo akam mwam la mwwg gumtw tulu mwlwngam mwwg lvgab gvda gvtwb hwrgeq looknum.

¹⁰Kokw so ngo agam vc alwb ao gvda toloqgv benam mam tapanum. Hv benum, “Sija Pwnbog ywwt ywwnamv haapa ku! Sija Pwnbov mwwg atorjaqb Koi swwnam mam kaakin pa! Hoggab ngulug Pwnbog agalo daqal ngulug bor tulungam ai-aalwb sorn boam ao gvda toloqgv hurlin paku.

¹¹Ngulug bor tulungv mwam Sviya kog ui hoqgv ho bulug bekarnam jvqtw hoqgv mviya pakun. Hoggab bulv sigam kam bosmab hoqgab sitam tanum.

¹²Hoqgab ao gvda no hemp poto! Ho hoq uraho doonbo nulvkam mwlwngv hvnyir to! Hvbmabde gvda gvt gab la sa-svlo gab hoggub jaq hentwrnam go! Hoggab Uiyv nulug dookub hang lingtwr twrxa tvl ipoq paku, hoggab mwv cengdwn, mwwg gab moodv vigo dook maadwn.”

¹³Mucum lvvr-laanyi tvb sov mwam gvda gvtwb hurpoqnam mam cengt kul mwv nyega ko bwwnbo nyem akam ruqrabnum.

¹⁴Hvbmabde nyem mam pwm alap labnyi go jinum ho mwn deexa-rara jarl mwnwg dookho vnyw nywum gola nywpo go rvkil mucum lvvr-laanyi tvbam hog mvm mvma dvb apnum ho mucum lvvr-laanyi tvbv ruqkmab doonum.

¹⁵Ho kokw so tvb hoqg agam hoqgv diidwr issam umlin tvl nyem akam nuum dvb nyinum.

¹⁶Hvbmabde gvdangv agam mam gamkoq tvl issam meqnum ho mucum lvvr-laanyi agam hoqgv umlinam diidwr issam swcwngv nyem mam svkanum.

¹⁷Mucum lvvr-laanyi hang lengma vrram lengknv nyem ak hoqg vbw-bor tulungam, Pwnbog gamlam tanbo mwlwngam ho Jisug jvqtw puiyam mwwjwbo mwlwngam nyob patab wnum.

¹⁸Kokw so mucum lvvr-laanyi so hv sa-svlog xuqx sugurho daqknum.