Read Nyishi NYIQRY 13 Bible Online

NYIQRY 13 - Nyishi bible

NYIQRY 13

¹Kokw so ngo sony dorg swnyiq hoqgv lengnam mam kaapanum. Mwv vrrw rwwywg gvnum, dumpo kvn go baqnum. Vrrw rwwxig aoho bopya paag paagaqb doonum, dumpo pwxig aoho Pwnbog eminam tob-taiyil benam agamv doonum.

²Sony dorv hogga takar jaqhvb nyinum, mwwg lvpiangv sutum lvpia hvb nyinum ho mwwg agam sony agam hvb nyinum. Mucum lvvr-laanyi tvb akv mwwg atoram, hun pvlwngam hoo mwwg hwngkw laqsongam sony akam jinum.

³Sony dumpo tulug pengko hoqg pwggin mudup svqtwqb un gvnum, hvbmabde unnam al dukub mvknum, ham kaatwl gvda gvtv mwlwngv lomnum ho sony kokwb wmin gvnum.

⁴Nyi mwlwngv tvb sam xumnum hoggab mwv sonyiam mwwg atoram jiknum. Bulv sonyiam kam xumnum. Bulv benum, “Hiyv nyiv sony hvb nyidwn? Hiyv nyiv mwam dvqrwql pvrwq nyotayin?”

⁵Sony doram mwwtaqb Pwnboam tob-taiyil bemdvb jinum ho xitor alwb paqsul Pwnboam benyi-beyal bemnum hoo pool campy leq bvrnyigo hvb bekar yvmdvb atoram jinum.

⁶Mwv Pwnboam beel-torl Pwnbog eminam, mwwg dookho ao gvda tolo doonbo mwlwngam bec-beya benum.

⁷Mwam Pwnbog dvrwqbo nyi tulug ceebiob nyob pam dvb jinum.

⁸Gvda soq nyi mwlwngv mwam xumtayin, hvbmabde gvda gvtam pwma daab hiyvg eminam mengknum Sviya kog swwg potaho xiqlwq mapan hoq nyi tuluhv hoq sony ham xumtayin.

⁹“Hiyv nyuru gvdwn, mwv tato!

¹⁰Hiyvn nyumwb boodynamv, mwam nyumwb booky dvb nyitayin. Hiyvn lyoqr orioqkv mengdwb nyidwn mwam lyoqr orioqkv mengky dvb nyitayin. Soq so Pwnbog dvrwqbo nyi tulu gab cwqnamv la mwwjwnamv doodwn.”

¹¹Kokw so ngo sony dorg ta gvda gvt soqgv lengnam mam kaapanum. Mwv Sviya ko hvb vrrw rwnyi go baqnum ho mucum lvvr-laanyi hvb agam goonum.

¹²Soq ak si otuq sony dor hoqg ator mwlwngam naal mwwg kaagaho nyinum. Mwv gvda gvtam ho soq aoso doonbo mwlwngam otuq unnam mwp kunam sony doram xumtwk hvl bos belaml xumnum.

¹³Soq sony dornyi deensi swrdorxeq koijaqb nyinum. Mwv ao gvda toloqgv gvda gvtwb mwlwngv kaapa dvb wm mam paqlnum.

¹⁴Mwv nyi mwlwngam gvda gvt aoso doon boam swrdorxeqb nyil kaakin mvdwb otuqg sony akwg kaagaho mwam bonam nyimdvb jigam gab xaalyo lyopaqnum. Sony akv otuqg lyoqr orioqkv un pagnum, hvbmab simab doonbo akam xuml mwam kvvyw kaacdvb murty loq ak mvtwk hvl benum.

¹⁵Sony dornyi deen akam otuqg sony akam kvvyw tacdvb mvnam urab swwgnan dooiyam miqlwq mvmdvb jitwl hoq kvvyw tacdvb mvnam ham wkarl yvmdvb hoo ham xuma bo mwlwngam mengm dvb gaml jinum.

¹⁶Sony akv koi ge anyo ge, swwn ge jwwgw ge, nyet ge aro ge mwlwngam bulug dumpo tuqtho hvbmab nyiloqkam bulug alaq lvqbwqho muxul ap mvdwb birnum.

¹⁷Sony akv hoq muxnam, eminam hvbmab emin kwlib tinglwqnam potangam baqma bov nyiv kor rvdwb ho kor puqdub nyiram.

¹⁸Soq si pumb rwnam agam go. Hiyv nyiv mwwlaqdvn mwam soq sony nambar niqtuqkam meelin mvto, hoggab nambar si nyi ak gonwg eminv. Soq nambarv 666.