Read Nyishi NYIQRY 14 Bible Online

NYIQRY 14 - Nyishi bible

NYIQRY 14

¹Kokw so ngo kaapanum, Sviya kov Jaiyon yorn puutu aoho mwwg lvgab mwwg eminam la mwwg Abwg eminam bulug dumpo tuqt aoho baqtwl 144,000 nyi tulug lokub daqdwb kaapanum.

²Ho ngo ao gvda toloqgv iss dunam hvb la doogum dunam hvb vc alwb yal ak tapanum. Ho ngoqg hoq tapanam agam yal hv rwwxw-gungga twqlaqbo nyi tulungv at atwg rwwxwngam-xwwnum hoo gunggangam twqnam Yalv dunum.

³Ho 144,000 nyi tulungv bulv hoq hun pvlw agaho turl doonbo nyi vpiv la nyiixa tulungv daqnum. Bulv nit bemin ak bidul doonum. Hoq bemin ham 144,000 nyi tulug aoho hiyvkam cengla maanum. Bulv nyia ko tulug pengko hoqgv rvlinamv.

⁴Bulv nyem tulug lvgab kac-kanyiaq nyil yocu-yabio nyima bov ho atam dvrwqb apbov. Bulv Sviya kov hogloq wtayin mwwg kokw kokwb emin gvnbov. Bulv Pwnbog la Sviya kog gab otuqjaqb aaxy xeeco bov.

⁵Bulv xaalyongv hoggv ham nywywngam cengkama; bulv dvrwqjaq nyiidarbo nyiv.

⁶Kokw so ngo ao gumtw ak doa lvpa tv jargaql yvnam mam kaapanum. Mwv nwrba cwtam tugu pui ak gvda gvtwg nyi tulungam nyob luuxiam, agam luuxib benboam, hoolu luuxiam ho lvpwngam bekin dvb jarl yvnum.

⁷Mwv vc alwb sogoql benum, “Pwnboam bosil mwwg koi xitornam mam paqto! Hoggab nyia koam mwwg pw-hwwd moodv haapa ku. Ao gvdangam, gvda gvtam, sa-svlongam ho iss pobu tulungam pwnbo Pwnboam xumto!

⁸Kokw so ao gumtw akta otuq akwg kokw kokwb jarmin gvl mwv benum, “Xitor albo Bebilon tapto paku! Mwn tapto paku! Mwn nyi mwlwngam mwnwg opongam twwmnum-mwn almanbo yocu-yabio nyigbo roo alangam twwxum dvb twwmnum!”

⁹Ao gumtw oum dvb akta otuq vnyiam jarmin gvl sogoql benum, “Hiyv nyiv sonyiam xumdwn, ho ham mwiyw-mvcnam mam xumdwn, hoqgv dumpo tuqt aoho la alaqho mwwg muxnam mam baqdwn,

¹⁰mwv atv Pwnbog opo poodwqngam hang lengl mwwg haaxaqnan pvtaqho toolwqnam mam twwtayin! Soq sam nyinbo nyi mwlwngam wm mvramho la mwk uraho dvrwqbo ao gumtw tulug la Sviya kog agaho boatayin.

¹¹Bulam wm mwk hoq wmv ho wm mwkv nwrba cwtam hoqgv nwrba gob gudul dootayin. Hoq Sony ham hiyv nyiv xumdwn mwam mwiyw-mvcnam mam xumdwn hoo mwwg muxnam mam eminam baqdwn bulv nywywngam aiyam kam aalam kam doonu dvb kaaparam.”

¹²Soq solak Pwnbog nyi tulug cwqnam mam bulug Pwnbog gamlam tal swwnam mam ho Jisun mwwjwbo nyi tulungam kaacin tayin.

¹³Kokw so ngo ao gvda toloqgv benam agam yal ak tapanum, hv benum, “Soq sam xeqto; Sija galoqkv hiyv nyiv At Swg gab bon nyiklo sinbo nyi tulungv hemp ponam jaqkv! “Vjaqbo jvqtw jaqb!” hvl Yalv birwqnum. “Bulv bulug hentwr bon nyik hoqgv doonunam mam kaapa tayin, hoggab bulug bon nyijongv bulug kokwb wba tayin.”

¹⁴Kokw so ngo puulubo doomwq ak, ho hoq doomwq aoho nyi hvbjaq nyinbo ak doonam mam kaapanum, mwwg dumpo aoho hun ywr dumtup ak bengnum hoo alaqho lyoqciq daag bvvnum.

¹⁵Kokw so xumk nam hoqgv ao gumtw ak lengb nv doomwq aoho doonbo akam vc alwb sogoql benum, “Lyoqciq ham bvvtwl dvn naato, hoggab moodv haapa ku, gvda gvtv dvn naadwb ningpa ku!”

¹⁶Kokw so doomwq aoho doonbo akv mwwg lyoqciqngam bvvtwl gvda gvt aoho tvdaqnum ho gvda gvtwg dvnam noocum kunum.

¹⁷Kokw so ngo ao gvdag xumk nam hoqgv ao gumtw akta lengnam mam kaapanum, mwv kam lyoqciq areqbo soog bvvnum.

¹⁸Hoq kokw so wm mam rvkybo ao gumtw akv yugw pvvk hoqgv lengnum. Mwv sogoql vc alwb lyoqciq bvvnbo ao gumtw akam benum, “Noqg lyoqciq ham bvvtwl gvda gvtwg roo boolu hoqgv roo aaxy opium mam piiriqto, hoggab roo aaxiv ningpa ku!”

¹⁹Hoqgab ao gumtw akv gvda gvtwg aoho lyoqciqkam lwqgaql roo ann ho roo aaxiam piikumnum hoo hoq tulu ham Pwnbog hang lengl haaxaql roo heqnnan urab hurlwqnum.

²⁰lvpw agaho doonbo roo heqxornan ho roo aaxiam heqxornum ho roo heqxorko hoqgv uiyv diidwr issib tolinum, hoq iss aasongv mail lwwnyi go aasonum hoo jwwkamv loqd tung gob nyinum.