Read Nyishi NYIQRY 16 Bible Online

NYIQRY 16 - Nyishi bible

NYIQRY 16

¹Kokw so xumk nam ura hoqgv vc alwb ao gumtw kvnnam agam ak benam mam ngo tapanum, “Nulv wgdvl Pwnbog haaxaql hang lengnam hucam gvda gvtwg aoho yoqpup ta!”

²Ao gumtw otuq akv mwwg hucam gvda gvtwg aoho yoqpupnum. Ho sony hoqg muxnam mam baqnbo ho hoqham mwiyw-mvcnam mam xumn bo nyi tulungv heenc-kaaya unnam gvl dwql-xaal hentwram henum.

³Hoq kokwb ao gumtw vnyi deenv mwwg hucam swnyiq aoho yvqlwqnum ho issiv nyi sinbo nyiig ui hvb nyinum ho swnyiq uraho turl doonbo mwlwngv siknum.

⁴Hoq kokw so oum dvn ao gumtw akv mwwg hucam iss pobu aoho hoo iss kucw aoho yvqlwqnum hoo issiv uiyib nyiknum.

⁵Issam rvkybo ao gumtw ak hoqg benam mam ngo tapanum, “Noqg pw-hwwnam si kvtaq jaqb hwwjiq pa, Dvrwqbo Ak no, kol galoqkv sija godab dooky dvn!

⁶Hoggab bulv Pwnbog dvrwqbo nyi tulungam ho nyiqry benbo tulungam ui lengdwb mvnum, hoqgab no bulam uiyam twwdub jipa ku. Bulv hognvkv naadwb nyinum ham naagdo!”

⁷Kokw so pvvb hoqgv agam ak benam mam ngo tapanum, hv benum, “Mwlwngam ator yaanbo Pwnbo At Swv! Noqg pw-hwwnamv jvqtw bvla hindy jaqb pw-hwwdwn!”

⁸Ao gumtw vpy deenv kokw so mwwg hucam doonyig aoho yoqpupnum ho doonyi ogam nyi tulungam gubiaq mvdwb jinum.

⁹Nyi tulungam doonyi oggv gubiaq yukam bulv hoqhvb bulam hentwr hem dvb jinbo Pwnbog eminam beenum. Hvbmabde bulv bulug nyic nyinam hoqgv mwwkur la wkur kumanum ho Pwnbog koinam pagoqkam paqmanum.

¹⁰Ao gumtw ang deen akv mwwg hucam sony akwg dootamnan aoho lubyaqnum. Ho sony akwg lvpwngam kanv pulubnum ho nyi tulungv bulug lyol vcam henla maab kotwq sunum.

¹¹Ho bulv ao gvda tolo doonbo Pwnbog eminam bulug vcnam gab la un-gab beenum. Hvbmabde bulv bulug nyic nyinam hoqgv mwwkur kumanum.

¹²Hoq kokw so ao gumtw ax deen akv mwwg pukaqkam sa-svlo Iupratas pobu aoho toolwqnum. Ho iss pobungv xooknv pwtw tukul dou-caga hoqg atam haam dvb lamta jinum.

¹³Hoq kokw so tvtwq hvb nyinbo kacbo yal oum go ngo kaapanum. Bulv mucum lvvr-laanyi tvb agam hoqgv, sony agam hoqgv ho xaalyo bo nyiqry kaanbo agam hoqgv lengnum.

¹⁴Hoq tuluhv swrdorxeqb nyinbo uiyig Yalv, soq yal oum si gvda gvtwg at tulug dookub wl bulam olumgob bookuml At ator albo koi albo Atwg Aalam nyob pam dvb ywrkar dvn.

¹⁵“Tagabto! Ngo dvcobov haanam hvb haatayin! Huul doonbo ho atwg vjam hengab doogbo nyi akv paqyalinco, hoggab mwv nyiig kaagaho vj koomab asar lengdwb hoo hvnyw dvb nyiram!”

¹⁶Kokw so yal tulungv lvpw at tulungam olumgob Hibru agamb Armagedon hvl benam nyookho bookumnum.

¹⁷Hoq kokw so kvn deen ao gumtw akv mwwg hucam doa aoho topaqnum. Xumk nam ura hun pvlw hoqgv agam ak vc alwb sogoql benamgo tapanum, hv benum, “Soq sam nyipa kun!”

¹⁸Ho taiyam bioqnum, doogum gumnum, korlw caanum ho nyioby bit ak vcjaqb hwqnum. Nyia koam bvl pwdwk hoqgv hoqhvk nyioby go nywywngam cengkama. Soq si mwlwngam koi yaanbo nyioby bitbilo jaqkv!

¹⁹Lvpw koi albo akv lvpw pwum gob nyiknum, ho gvda mwlwg lvpwngv dubknum. Pwnbov Bebilon lvpwngam mwwpal ham hoggub mwwg hang lengl haaxaqnam roo ala twwn nan pvtaqngam twwm dvb jinum ham mwwpa dvb nyinum.

²⁰Iss boqcumv jim susu nukun, yorn tulungv niinkun.

²¹Ho doonyi ao toloqgv lwwpaq hwdgo vibo nyodo taa-ngv nyi tulug aoho hodaqnum, hoqgab nyi tulungv Pwnboam beenum, hoggab hoqhv swlin-momin dvb nyinum.