Read Nyishi NYIQRY 18 Bible Online

NYIQRY 18 - Nyishi bible

NYIQRY 18

¹Hoq kokwb ngo ao gumtw akta ao gvda toloqgv lengl ipoqnam mam kaapanum. Mwv xitor-xilo atoram doognum, ho mwwg atorv gvda gvtam hutongv huupwl doognum.

²Mwv vc alwb sogoql benum, “Xitorbo Bebilonv dubn kuba! Mwn dubn kuba! Mwn sija uiyig doogw nammwb nyipa ku, ho almanbo yalwg doogwb la kacbo, oyumnam pvta tulungv mwnwg urahv swrwq rwqgw dukun.

³Hoggab gvda soq nyob luuxiv mwnwg opongam twwpa ku. Twwxum dvb atorbo yocu-yabio nyinwnan opongam mwnwg galoqkv twwpa ku. Gvda gvt soqg lvpw at tulungv mwnwg lvgab yocu-yabio nyipa ku, ho gvda gvt soq kor mvnbo nyi tulungv mwnwg cwqla maanam nyijo hoqgv nyet swnyia paku.”

⁴Kokw so ngo ao gvda toloqgv agam ak benum mam tapanum, hv benum, “Ngoqg nyi tulu, nulv mwnwg hoqgv lengleq tuku! Nulv mwnwg nyic nyikho nyiba dvb nyima dvn, mwnwg laqm baqkho nulv baqba dvb nyiky maadwn.

⁵Hoggab mwnwg nyic nyinamv, okum kunamv, doonyi-pool aob cvvc paku, hoggab Pwnbo mwnwg almab nyic nyinam mam mwwgab dvn.

⁶Mwn nulam nyinam kalam hvb nulv mwnwn nyilwqto, mwnwg nyinam mam laabo yaab mwnwn ree daqto. Mwn nulam opo vdwq boam jitanam, ham laabo yaanbo opo vdwq bolo mwnwn jilwqto.

⁷Mwn atam yuusnam ho hemp-hengam ngamnam hvbkalam, mwnwn hentwram la hingram hem dvb jito. Hoggab mwn atam bel doodwn, “Ngo vi-kooriv, si doodwn! Ngo xwwmy ma, ngo nywywngam hentwr go henka ram!”

⁸Soq pagoq gab, aal loog golo mwnwn swlin-momin hoqgv sim tayin— vc-aiyv, mwwdwqkv, hoo dwr-kanongv haatayin. Mwnwn wm uraho partayin; hoggab mwnwn pw-hwwdy bo Pwnbo At Sw, mwlwngam ator yaan bov.”

⁹Ho hoq nyem lvgab nyis-nyipeql nyinw-wnwngam nyinbo lvpw at tulungv hoq nampam hoqg wm gunam wm moily hoqgv mwkam kaatwl bulv hoq nampam gab xabl ril nyiqs tanap ditayin.

¹⁰Mwnwg lvgab laqm baqsam bulv bos layil aado hv daqgin tvl benum, “Bos jaqkv hiyaq! Bos jaqkv hiyaq! Soq yuunam Bebilon nampam si bos jaqkv hiyaq! Nam wm swlw duur kama daab laqm-baqm paku!”

¹¹Gvda gvt so kor mvnbo nyi tulungv kam mwnwg gab mwwdwql xabnum, hoggab hiyvkam bulug puqdynam koram nvvrwql rvnbo dook ma.

¹²Hiyvkam mwnwg hunam, rupam, xinam tvswngam hoo topum vjam, lwwsa-lwwma bo vjam, pud vjam, svcaq vjam, nvj pulw vjam, svvda xinam luuxiam, hoo svt vrrw hoqgv mvnam jemmam, xitwr yaanam svvdangam, hoo pitol lyoqdwr, marbol,

¹³asing-tari, seli, taky, talap, nor sungam albo, sulum, roo ala kuty, wtw, am, tanyeq, sviya, svpur tulu, sudum svr, ceriot svpur, nyera hoo nyia ko swwnam mam.

¹⁴Kor mvnbo nyi tulungv mwam bedwn, “Hog mwlw alboam noqg naadwb mwwnam mam mwlwngv niim paku, ho noqg hog mwlw gumnv nyetv kaabynamv dook ma, ho no nywywngam hoq torab pam kaapa kuram.”

¹⁵Kor mvnbo nyi tulungv hoq lvpwho nyet swwk bo tulungv aado ho daqgin tukul bulv mwwg hentwr henam mam kaatwl boswl doqtu tvl

¹⁶betayin, “Bos jaqkv hiyaq! Bos jaqkv hiyaq! Bos jijaq dvb hoq lvpw vv nyido! Mwv kwlwq-kvlaqbo topum vjam, lwwsa-lwwma bo vjam kootwl, hun, rup, xinam tvsw huqxiam, ho dumpin jwwrwngam gv dorpwngam gujv gubum tvl doonum.

¹⁷Wm swlw duur ciqnyi golo hoq mwlw nyet swwnam mam yuupaq mvgnukun.” Iss jaaj mwlwg atv ho hoqho wnbo nyi tulungv iss jaajam pool wgbo nyi tulungv ho iss aoho jaakarl atwg dvsam door tvnbo nyi tulungv aado ho daqgin tvl

¹⁸lvpwngam wm gunbo wm moiliam kaatwl bulv benum, “Soq svk lvpw koibo nywywngam ak doomanum!”

¹⁹Bulv ked diimwram bulug dumpo aoho toopup subnv hangv muur banv benum, “Bos sonam jaqgo hii! Hognvk koorjaq lvpw jaqkv yu! Soq lvpw soqgv lak swnyiq mwlwb jaakarl kor mvgaql nyi tulungv nyet swwrab nyapa kun! Hvbmabde wm swlw duur kama dab mwwg hog mwlwngv yuun kuba!”

²⁰Ao gvda no, Pwnbog dvrwqbo nyi tulu, xuqnam tulu, ho nyiqry benbo tulu, nulv mwv yvgam gab hemp poto! Hoggab Pwnbov nulug pw-hwwd gab mwam pw-hwwpa kun!

²¹Kokw so ator albo ao gumtw ak svpo hvdbo wlw pwg joorab banv ham sa-svlo urab hurlwql benum, “Soq sib lak yuunam Bebilon lvpwngam vc alwb hurpaq dvb nyitayin hoo nywywngam ham lokta kaapa kuram.

²²Rwwxw-xwwnam, nyia kog piul tabnam hoo tuuly miqnam agam mam nywywngam noqg galoqkv tapa kuram hoo kor gab jem mvnbo nyi akukam noqg dookho kaapa kuram, ho lvpaq wlwg duqdingl dunam mam nywywngam tapa kuram.

²³Noqg aoho nywywngam wm mur hutongam kaapa dukub nyiram, hvbmab nyem naadynam ho nyega naadynam hoqg agam mam kam tapa dvb noqg galoqkv nyiram. Noqg kor mvnbo nyi tulungv gvda gvt so mwlwngam xitor yaagub nyinum, ho no rwwxw-gungga mvl gvda gvt soq nyi tulungam mwlwngam xaalyo lyopaqnum!”

²⁴Bebilon sam laqm-baqmnam pagoq si hvbaloqkam, gvda gvt so nyiqry benbo tulungam ho Pwnbog dvrwqbo nyi tulungam mengnam nyi mwlw hijum uiyam soq lvpw ura si kaapanum.