Read Nyishi NYIQRY 19 Bible Online

NYIQRY 19 - Nyishi bible

NYIQRY 19

¹Soq kokw so ngo ao gvda tolo nyi tulug goqr ronam agam hvbjaq benam ak tapanum, hv benum, “Pwnboam paqto! Halleluya! Ywwt ywwnamv, yuunamv ho atorv ngulug Pwnbo gab doodwn!

²Mwwg pw-hwwnamv jvqtw jaqb ho hwwdil hwwdwn! Mwv gvda gvt soq meqjol gvda gvtam kacdvb nyibur boam haqpaq dvn. Pwnbov mwam laqm-baqmnam pagoq si hvbaloqkam mwv Pwnbog nyerangam meng gam gab nyidwn.

³Bulv lokta sogoql benum, “Pwnboam paqto! lvpw xitoram wm moily bioql gunbo wm mwkv nwrba cwtam hoqgv nwrba gob hwrdul dootayin.”

⁴Hun pvlw aoho doonbo Pwnboam nyi nyiixa camnyi leq vpiv la turl doonbo nyi vpiv lwbw kumbwl xumnum. Bulv benum, “Amen! Pwnbog eminv koi nvka!”

⁵Kokw so hun pvlw hoqgv agam yal ak dulinum ho hoq agamv benum, “Nulv Pwnbog nyera mwlwngv, nyi mwlwngv anyo ge koi ge, hiyv mwam xumdwn, mwlw jaqkv Pwnboam paqto!”

⁶Hoq kokw so ngo nyi olumgo dunam jaqhvb dunam agam yalgo tapanum, hoqhv yorn hoq iss copoqnam hvb la ho wm taiyam dunam hvb dunum. Ho bulug benam mam ngo tapanum, “Pwnboam paqto! Hoggab mwlwngam ator yaanbo ngulug Pwnbo At Sw, mwv Lvpw atv!

⁷Ngulv hwnyir-hvmar gvdwl mwwg koi alnam mam paqtju! Hoggab Sviya ko akwg nyem naad moodv haapa ku ho mwwg nyem naadynam akvkam mwwxy-svqrwl atv nyix-nyiaq paku.

⁸Mwnwn kwlwq-kvlaqbo topum vjam huun boam koom dvb jipa kun.” Kwlwq-kvlaqbo hv Pwnbog nyi tulug albo bonam nyinamv.

⁹Kokw so ao gumtw akv ngam benum, “Sam xeqto; Sviya kog nyem naak durum ho dvgoq goqanam nyi tuluhv hemp ponam nyi tulungv.” Ao gumtw akv akta benum, “Soq torab si Pwnbog jvqtw agamv.”

¹⁰Ngo mwwg lvpia lwkw ho geqpwl xumtanum, hvbmabde mwv ngam benum, “Hvb nyimabv! Ngo nulug lvgab bon nyibambo akwn ho nulug vbw-bor tulug pengko lo Jisug jvqtw puiyam benbo nyi tulug bon nyibamv. Pwnboam xumto!” Hoggab Jisug jvqtw pui bekinam hv nyiqry kaanbo nyi tulug swwgv.

¹¹Kokw so ngo ao gvdag viyap pam kuqko dvb kaapanum ho hoqho svpur puulu bo dorg daqdwb kanamnum. Hoq aoho caobo akam mwwjwbo ho jvqtw akv hvl benum. Mwv pvvb korbo maab pw-hwwdil hwwdwn ho nyob padwn.

¹²Mwwg vnyiqkv wm moily hvb bioqdwn hoo mwv mwwg dumpo aoho hun bopyangv naleqgo gvdwn. Mwwg aoho emin ak xeqnamv doonum, ham hiyvkam cengmadvn, hvbmabde mwv aro cingtwq dvn.

¹³Mwwg kamt koonam hv rumpwngv ui rooxonum. Mwwg eminv “Pwnbog Agamv.”

¹⁴Ao gvdag nyemaq sipai tulungv mwwg kokwb kwlwq-kvlaqbo topum vj kotwl svpur puulubo aoho dootwl emin gvnum.

¹⁵Mwwg agam ura hoqgv areqbo lyoqr orioq daag lengnum, hoqg lvgab mwv nyob tulungam nyob paiya natayin. Mwv lyoqdwr dvvp lvgab bulam munyiub tayin ho mwv Mwlwngam At ator yaanbo Pwnbog hang lengl haaxaqnam hoqgv mwv opo heexornanam lvpiangv caajabl mvtayin.

¹⁶Mwwg kamt ao hoola xarpoho: “Lvpw at tulug Lvpw at yaangv hoo At tulug At Sw yaangv hvl xeqpwl apnamv doonum.

¹⁷Kokw so ao gumtw ak doonyi aoho daqtumtvl daqdwb ngo kaapanum. Mwv vc alwb sogoql doa lvpaho jargaql jordu bo pvta tulungam benum, “Mwlwngv lokub olumgob Pwnbog koibo durum gab hookumto!

¹⁸Haag dvl lvpw at tulug, sipai saab tulug, sipai tulug, svpur tulug ho svpur aoho caobo tulug ho nyet ge, nyera ge, koi ge, anyo ge nyi mwlwg vdinam dvtab hookum nyiato!”

¹⁹Kokw so ngo sony ak kaapanum, gvda gvt soq lvpw at tulungv la sipai tulungv lvkin gob nyil svpur aoho caobo akam la mwwg sipai tulungam nyemaq nyil nyob panyanum.

²⁰Sonyiam la xaalyo bo nyiqry kaanbo, mwwg kaagaho swrdorxeqb nyil nyi tulungam xaalyo lyol sony akwg muxnam mam baqnbo ho sonyiam kvvyw-tacdvb mvnam mam xumdvb jinboam nootul nyumwb booknum. Sonyiam la xaalyo bo nyiqry kaanbo vnyi vnyiam turdub bulam nvkiq-nviyiql wm gudul doonbo mvramho hurlwq kunum.

²¹Bulug sipai tulungam svpur aoho caobo ak hoqg agam hoqgv lengn bo lyoqr orioqngv bulam mengknum ho bulug vdinam pvta tulungv dvtar nagub bulv dvnum.