Read Nyishi NYIQRY 2 Bible Online

NYIQRY 2 - Nyishi bible

NYIQRY 2

¹“Ipisi Dvrwq namlo ho doonbo Ao gumtwngam pota sam xeqto! “Takar kvnam alaq lvqbwqho bvvl doogbo hun mur twgwnan kvnwg pengko ho wkar yvnbo ak hoqgv soq pui si haado.

²Ngo cengdo no hognvkv nyipan, ngo cengdwn no hoggub ator jaqb kwrwb nyis tulungam nyinum ho cwql doonum. Ngo cengdwn no almanbo nyi tulungam cwqla maadwn ho hiyv nyiv bulv xuqnam tulungv hvl bes jaqkam bulv xuqnam ma ham hindy paku, bulam xaalyo bogub mvlin paku.

³No vigo cwqbnv ngoqg emin gab hentwram hempa ku, hvb jaqkam no mwwjwngam paqxiama.

⁴Hvbsujaqkam, ngo nam bes ak doodwn. No ngam otuqho abynam hvb aby kuma.

⁵Mwwka suto, no hogloqkv yoql pakun; mwwkur to, hoo no otuqg nyis tulungam nyinam hvb nyito. Hvbmab nyiloqkam, ngo noqg dookub haatayin hoo no mwwkur mabnyiloqkam noqg mur twgwnanam hoqg nyook hoqgv naapaq tayin.

⁶Hvbmabde ngo Nikolait nyi tulu nyis nyinam mam oyumnam hvbkalam no kam bulam oyum do.

⁷“Hiyv nyuru baqdwn, Dvrwq namlo tulungam Yalv hog hvl bedwn ham mwam tamto! “Hiyv nyiv mviya tayin, mwam ngo Pwnbog boolu ho swwnbo swwg svvn hoqg aaxiam dvmdvb atoram jitayin.

⁸“Ismarna dvrwq namlo ho doonbo ao gumtwngam soq pui sam xeqto: “Soq pui si otuqjaqb doorab bo ho kuiyum nagub dooky dvnbo, sipekul lokta turl doonbo hoq ak hoqgv. Ngo noqg hentwr henam mam ho no jwwgw dvn ham cengdwn, hvbmab no jvqtw jaqb nyetdvn!

⁹Hiyv nyiv al maab bedwn ham ngo cengdwn. Bulv uiyig dvpar hoqg hoolungv. Bulv atam Juhudi ngvk hvl bedwn, hvbmab bulv Juhudi nyi ma.

¹⁰No oyu maadab hentanam hentwr hoqgab akukam bos maab. Tagabto! Uiyv nam pooka-yirkal nulug pengko hoqgam tuugin pvtwq urab siilwq tayin, hoo nulam aal looyw gob nulv hentwram hentayin. No sinam gob ngam mwwjwl dooto hoo ngo nam sigam mviyal mvjongam swwgam jitayin.

¹¹“Hiyv nyiv nyuru baqdwn, mwv dvrwq namlo tulungam Yalv hog hvl bedwn ham mwam tamto. “Mviyabo tulungam lwnyi dvb sinamv hog mwdw nyoram.

¹²“Pargamam dvrwq namlo ho doonbo ao gumtwngam soq pui sam xeqto. “Lyoqgw-lyoqarv areqbo lyoqr orioqngam doogbo ak hoqgv soq pui si.

¹³No hoglo doodwn ham ngo cengdwn. No Uiyig lvpwho doodo. No ngam tumab jvqtw jaqb mwwjwdo, hoggab ngam mwwjwl ngoqg hingwnam ngoqg hvvky swwnbo Antipaswn mengs kubakam no ngam hvraqb mwwjwl Uiyig lvpw hookam doonum.

¹⁴Hvbmabde nam ngo agam gomnyi gomumgo besv doodwn. Nulug pengko ho tuugin Baalamg tomswrnam mam tal swwdo. Baalam Balaknvn Israel nyi tulungam binin banv ui panan vdinam dvmwl nyic nyimdvb jinum hoo yocu-yabio nyimdvb jinbo.

¹⁵Nikolait nyi tulug tomswrnam mam tal swwnbo nyi ata go nulug pengko ho doodo.

¹⁶No sija noqg nyic nyinam hoqgv mwwkur wkur tuku, hvbmab nyiloqkam, ngo noqg dookub vnwqb haatayin ho hoq nyi tulug dookub haal hoq nyi tulungam ngoqg agam soqgv lengn bo lyoqr orioq lvgab ceebiob nyob patayin.

¹⁷“Hiyv nyiv nyuru baqdwn, Yalv dvrwq namlo tulungam hog hvl bedwn hoq benam mam tagabto! “Mviyabo tulungam ngo bulam kvsil apnam manna tuugin jitayin. Hoq aob ngo bulam vxiam puulubo wlw pwsaqg jitayin, hoq aoho nit emin ak xeqnamv dootayin, ham hiyv cengram hvbmab hiyv ham kaapal nvvrwq dvn mwv cingtwq tayin.

¹⁸“Tiyatira dvrwq namlo ho doonbo ao gumtwngam soq pui sam xeqto. “Soq si Pwnbog Ko Tuup, hiyvg vnyiqkv wm moily hvb bioqdwn ho hiyvg lvpiangv pitol tvk hvb huuda kvlabo ak hoq puiyv.

¹⁹Ngo cengdwn, no hognvkv nyis tulungam nyidwn. Ngo noqg abynam mam, mwwjwnam mam, bon nyinam mam, ho cwqnam mam. Ngo noqg otuqho nyiconam mam hilayab sija nyis tulungam nyinam mam cengdwn.

²⁰Hvbmabde soq si nam haql bes ak doodwn; No dvn Jejibelwg mwn atam ngo Pwnbog pui baqnbovk hvl benam mam tado. Mwv ngoqg nyera tulungam tomswr swrxiaql bulam almanbo lamtab wg banv bulam yocu-yabio nyinam mam ho ui panam dvsam dvm gvdo.

²¹Ngo mwnwn nyic nyinam hoqgv mwwkur mvdkub moodam jipan; hvbmabde mwn yocu-yabio nyinam nyic hoqgv mwwkurl wkur dukub mwwma.

²²Hoggab ngo mwnwg kark ho hurpwl aptayin ho mwn la mwnwn yocu-yabio nyinbo tulungv bulug alman bo nyis tulungam nyiknam hoqgv mwwkur kumab nyik baloqkam ngo bulam hemanam hentwram hem tayin.

²³Ngo mwnwg benam mam tanbo nyi tulungam mengpaq tayin hoo ngo nyi vxig hang mwwnam mam cengn bo akv hvl dvrwq namlo mwlwngv cengtayin. Ngo nulam vxiam nulug at atwg nyis tulu nyijongam jitayin.

²⁴“Hvbmabde, Tiyatiraho doonbo nulug nyi tulu gon hoq almanbo tomswrnam mam tama pan. Nulv nyi asaqg “Uiyig urajaq bvrwqkv” hvl benam mam tag maanum. Ngo nulam sam bedwn, ngo nulam hog asaq igin viyam baqm dvb jiram.

²⁵Hvbmabde ngo haanam gob nulv vdwjaqb sijag doognam ham nootul doog keedwb nyitayin.

²⁶Mviyabo tulungam ho kokwnam gob ngoqg bulam nyimdvb jinam mam ngoqg mwwlwqkob nyinbo nyi tulungam ngo ngoqg Ab galoqkv hognvkv kaapa pan, hoq atoram ngo bulam jitayin. Bulam ngo Nyoodo nyi tulug aoho atwb swwm dvb jitayin ho bulv lyoqdwr dvvp lvgab bulam kor jaqb sotayin ho bulam deekam pwcwngam podubnam hvb yvqmwq dvb mvtayin. Ho ngo bulam ar komcig takar korlum mam jitayin.

²⁹“Nulv nyuru baqd nyiloqkam, Yalv dvrwq namlo tulungam hog hvl bedwn, hoq benam sam tagabto!