Read Nyishi NYIQRY 20 Bible Online

NYIQRY 20 - Nyishi bible

NYIQRY 20

¹Kokw so ngo ao gumtw ak ao gvda toloqgv nywywngam hoc maanam ung hoqg sabi-ngam la soot albo tag soog mwwg alaqhv bvvtwl ipoqnam mam kaapanum.

²Kokw so mwv kolwg tvb, hvgdvn si Uiyam, Alma akam nootul tag korcuptvl.

³Ao gumtw akv mwam nywywngam hoc maanam ung uraho pvqlwqtvl sabi hiqtum tvl vnyw lwwyw taqt vnyw maady deedib nyob tulungam sup pum mvma dvb tuml apnum. Hoq kokwngam mwam apo gob topaq jitayin.

⁴Hoq kokw so ngo hun pvlw atago kaapanum, hoq aoho doonbo nyi tulungam bulam pw-hwwm dvb atoram jinum. Ho Jisug jvqtw puiyam bekarbo Pwnbog agam mam bvk gab dumpongam pvriqnam, sonyiam xuma bo ho ham kvvyw-tacdvb mvnam mam xuma bo, ho tuqtho, alaqho sonyig muxnam mam baqmabo Yalam ngo kaapanum. Bulv Kristog lvgab lengknv swwgam kaapal alwb nyil vnyw lwwyw taqtgo Kristog lvgab lokub lvpwngam betayin.

⁵Hoq vnyw lwwyw taqtv wnya maady deedib sikbo tulungv swwgwb turab kumanum.

⁶Sikbo tulungam swwgwb purab dvk aal so otuqjaqb gorab kunbo nyi tuluhv hemp ponam jaqkv. Lwnyi dvb sigv bulam hog mvdwb ator dook maadwn. Bulv Pwnbog la Kristog nyubwb nyitayin ho bulv mwwg lvgab vnyw lwwyw taqtgo lvpwngam bvvba tayin.

⁷Vnyi lwwyw taqtv wxo kokwngam Uiyam pvtwq hoqgam tolin tayin,

⁸ho mwv nyob luuxig dookub gvda gvtwb wgaql pwqtab, sa-svlo bviywrho doonbo xuqx hvb nyinbo Gognvn la Magog bulam olumgob goqkuml nyob patajuk hvl bookum tayin.

⁹Bulv gvda gvtwb wiyiql Pwnbog dvrwqbo nyi tulug doogw bopam mam ho abynam nampam mam gooiyiql doqtumnum. Hvbmabde ao gvda toloqgv wmv ipoqnv bulam guxnum.

¹⁰Kokw so bulam pwqnbo Uiyam wm mvram nvkiq-nviyiq juudu dvkho, sonyiam la xaalyo bo nyiqry kaanbo tulungam hurlwq kob hurlwqnum. Ho bulv nwrba cwtam hoqgv nwrba gob ai-alwb hentwram henl dootayin.

¹¹Kokw so ngo koi albo puulubo hun pvlw aoho doonbo akam kaapanum. Mwwg aga hoqgv swcw nyodongv keleq nukun ho ham lok kaapa kumanum.

¹²Ho ngo sikbo tulungam, anyo ge, koi ge bulam mwlwngam mwwg hun pvlw agaho doqdunam mam kaapanum. Pota tulungam lwqkonum, kokw so pota taqsaq ak lwqkonum, hoq pota hv Swwg potangv. Sikbo tulungam hoq potaho hog hvl xeqpwl apnum ham bulv hognvkv nyinum ham kaal pw-hwwnum.

¹³Hoq kokw so swnyiqngv hoq uraho sik boam tolin jiknum. Ho Sinamv hoo gvda gvt soq Sig bov, bulv kam bulug sin boam doognam mam tolin jiknum. Ho mwlwngam bulv hognvkv nyiknum ham kaal pw-hwwnum.

¹⁴Kokw so Sinam mam hoo gvda gvt soq Sig boam wm mvram urahv hurlwq kunum. Soq wm mvram si lwnyi dvb sitanamv.

¹⁵Hiyvg eminam hoq swg potaho xiqlwql ap kumanum ham wm mvram urab hurlwq kunum.