Read Nyishi NYIQRY 21 Bible Online

NYIQRY 21 - Nyishi bible

NYIQRY 21

¹Kokw so ngo Nit Ao lvpw ak la Nit Gvda gvt ak kaapanum. Otuq Ao lvpwngv la otuq Gvda gvtv niiknum hoo sa-svlo ngvkam kaapa kumanum.

²Hoo ngo Dvrwqbo Bopam mam, nit Jerusalem mam ao lvpw toloqgv Pwnbog dook hoqgv ipoqnam mam kaapanum. Hoqhv nyem naatanam akv atwg nyegangam nyix-nyiqal vj koox-koaql kvvrwq tanam hvbjaq nyinum.

³Ngo kokw so hoq hun pvlw hoqgv agam yal ak vc alwb benam ak tapanum; “Sija Pwnbog nam doogwngv nyiakog pengko lo doodkun! Mwv bulug dookub dootayin ho bulv mwwg nyi tulub swwtayin. Pwnbov mwv atv bulug Pwnbob swwtayin.

⁴Mwv bulug vnyiq nyiqsam bulug vnyiq hoqgam tixaq tayin. Ho kokwngam sig dookram, mwwdwq mwwk, ho xabs dookram ho vc-aigo dookram, hoggab kucuq bov mwlwngv niinkun.”

⁵Hoq kokw so hun pvlw aoho doonbo akv benum, “Ngo sija hog mwlwngam nit dvb mvg yikun!” Mwv hvlakam ngam benum, “Sam xeqto, hoggab soq agam tulu si jvqtwngv ho mwwgw dvb nyinbov.”

⁶Kokw so mwv benum, “Sam niqtuq nyilin pakun! Ngo kolgv dooky dvn ho kol nwrba nagub dooky tayin, ngo bvl purabov ho bel pwtwr bov. Hiyv akgon hvngwr dvn mwam ngoqg swwg iss sokum soqgv hog kor naamakam twwnyib twwm dvb jitayin.

⁷Hiyv nyiv mviya tayin mwv ngoqg galoqkv sam nvvrwqtayin. Ngo mwwg Pwnbob nyitayin ho mwv ngoqg ko tuupwb swwtayin.

⁸Hvbmabde bosbov, mwwjw maanbov, kacbov, nyi mengbov, yocu-yabio nyinbov, sootu tunbov, murty xumn bov ho xaalyo bov mwlwngv nvkiq-nviyiql wm gudul doonbo wm mvram uraho dootayin. Soq si bulug lwnyi dvb sinamv.”

⁹Kokw so ao gumtw kvnwg pengko hoqg huc kvn dvnam mwlwngam hentwr jaqn bo hentwr huc bvvnbo akv ngoqg dookub haabnv benum, “Haato, ho ngo nam Nyem akam, Sviya kog nywxwngam kaakin tayin.”

¹⁰Yalv ngam bool wgnum, ho ao gumtw akv ngam yorn ao albo akwg aoho boocanum. Ho mwv ngam, Dvrwqbo Jerusalem lvpwngam ao gvdag ura hoqgv Pwnbog galoqkv ipoqnam mam kaakinum.

¹¹Ho Pwnbog yuunam hutongam bioqdul doodwb kaakinum. Lvpw ak hv dvrwq aljaqb huuda kvlal huul doonum.

¹²Soq lvpw ak si koi, ao albo ciqcv doonum ho viyap haagangv wyw leq vnyi go doonum, hoqham ao gumtw wyw leq vnyi go viyap tulungam rvkil daqgnum. Viyap tulug aoho Israel nyob wyw leq vnyig eminam xeqpwl apnamv doonum.

¹³Dou-caga taqc ho viyap yobumgo, odum taqc ho viyap yobumgo ako taqc ho viyap yobumgo ho dou-haaga taqc ho viyap yobumgo doonum.

¹⁴Hoq bopamg gurum ham rwwda dvvyw leq dvvnyig diilwql mvrabnum, hoq rwwda tulug aoho Sviya kog xuqnam buu wyw leq vnyig eminam xiqlwql apnamv doonum.

¹⁵Ngam agam goonbo ao gumtw ak hv xin nan hun poolaq daag mwwg alaqhv bvvnum, hoq poolaq lvgab lvpwngam, lvpw hoq viyap pam ho gurum mam xindvb bvvnum.

¹⁶Lvpw ak hv taqtv hog hvdnum aaso ngvkam hvd kalamnum. Ao gumtw akv lvpwngam xin nan poolaqngv bvvtwl xikanum. Soqg aasongv lwwyw leq lwwng mail hoo taqtvkam hwdgo, ho aongvkam hvd kalam go.

¹⁷Ao gumtw akv gurum hoqg cwqcam xikanum, cwqc hoq aongv 216 loqd go aonum. Hoq mwwg xin nanhv looxiam xikynanv.

¹⁸Lvpw hoqg gurum mam mwgw nanhv xinam wlw jaspar lvgab yirnum, hoo lvpwngam kwlwq-kvlaqbo hun hoqgv mvnum, hoqhv vrs hvb dvrwq cojorb hornum.

¹⁹lvpw ham mwgwnan wlw tuluhv xinam wlw luuxy hoqgv mvnum. Otuq rwwda da ham jaspar wlw lvgab, dvvnyi deenam sappir wlw lvgab, doum deenam agat wlw lvgab, dvvpy deenam emerald wlw lvgab,

²⁰daang deenam onex wlw lvgab, daax deenam karnelian wlw lvgab, kvn deenam lwwsa bo kuartj wlw lvgab, piin deenam beril wlw lvgab, kiya deenam topaj wlw lvgab, dvvyw deenam Krisoprase wlw lvgab, dvvyw leq daakin deenam turkuj wlw lvgab, dvvyw leq dvvnyi deenam amvtist wlwngv mvnum.

²¹Haaga viyap wyw leq vnyiam wlw xinam lwwyw leq luunyig lvgab mvnum, viyap yvbxiam luusaq-luusaq xinam wlw hoq mvnum. Lvpw hoq lamta pan nanam kaapeq taiyeqbo viyin hoqgv mvnum.

²²Bopam uraho ngo xumk nam akukam kaapa maanum, hoggab Mwlwngam ator yaanbo Pwnbo At Sw gabla Sviya ko ak hoq xumk nammwb nyinum.

²³Hoq lvpwho doonyi poolwg hutongv huuk majaqkam alv, hoggab hoqho Pwnbog yuunam hutongv hoo Sviya ko akwg hutongv huul doognum.

²⁴Gvda gvt soqg nyi tulungv hoq hutoho gaql yvmin dvn, hoq hutoho gvda gvt soq lvpw at tulungv bulug gumnam soq urab baqatayin,

²⁵lvpw haaga viyap pam aal loopwngam cwqkotvl aptayin, viyap pam nywywngam mutumram, hoggab ho tol ai dookram.

²⁶Nyob luuxy tulug yuunam nyet gumnam lvpw urab bvqlwq dvb nyitayin.

²⁷Hvbmabde kacbo hoolu akukam lvpw urab haanyiram, ho hvnyw-har nyipabo vm xaalyo bovkam urab haanyi ram. Hvbmabde Sviya kog swwg potalo xeqpwl apnam emin doonbo arongv lvpw urab hvvtwq tayin.