Read Nyishi NYIQRY 22 Bible Online

NYIQRY 22 - Nyishi bible

NYIQRY 22

¹Ao gumtw akv ngam swwg iss pobungam dvrwq cojor dvb Pwnbog hun pvlw hoqgv tolin dvb

²ho lvpw lvpajaqb topeql lamtab toldvb kaakinum. Pobu kvd-kvsaqho swwg svvnv daqnum, hoq svvn tuluhv vnywngam lwwyw leq lwnyi go aaxy xeedwn, pool bvrxiam lok aaxiv xeedwn, ho hoq okv nyob tulungam mwp naadwb doodwn.

³Hoq lvpw uraho Pwnbog beenam hog akukam dookram. Hvbmabde hoq lvpw uraho Pwnbog la Sviya kog hun pvlwngv dootayin ho mwwg nyera tulungv mwam xumtayin.

⁴Bulv mwwg nyuqm mam kaatayin, hoo mwwg eminv nulug nyuqm ho xeqpwl aptayin.

⁵Hoqho ai dookram ho bulv wm mur bvvdwb nyikram ho doonyig huto gokam doodwb nyikram, hoggab Pwnbo At Sw bulug hutob dootayin ho bulv nwrba cwtam hoqgv nwrba gob lvpw at swwl lvpwngam bvvl doog tayin.

⁶Kokw so ao gumtw akv ngam benum, “Soq agam tulu si jvqtwngv ho mwwgab dvb nyinbov. Hoo Pwnbo At Sw mwwg Yalam nyiqry benbo tulungam jinbov, mwv mwwg ao gumtwngam kanam tvl oyu maadab hognvkv nyita dvn ham mwwg nyera tulungam kaakin mvdwn.”

⁷Jisu bedwn, “Tagabto! Ngo vnwq jaqb haaikun! Soq pota so nyiqry bepnam gomcwr tulungam bugil swwnbo nyi akv paqnam jaqkv!”

⁸Jon ngo, soq mwlw sam tatkun ho kaatkun. Ho kokw so ngo soq tulu sam kaaxo taxo so, kedhv geqpwl, ngam soq mwlw sam kaakin bo ao gumtw akam mwwg lvpia lwkw ho xumtanum.

⁹Hvbmabde mwv ngam benum, “Ham nyimab! Ngo noqg bon nyibam nyera akgon ho nyiqry benbo tulug nulug vbw-bor tulug pengko hoqg akwn ho soq pota so xeqpwl apnam mam bugil swwnbo nyi tulug hvkv. Pwnboam xumto!”

¹⁰Ho mwv ngam benum, “Nyiqry benam, soq pota soq agam mam kvsil ap maab, hoggab soq mwlw si nyidynamv ogum paku.

¹¹Hiyv nyiv almadwn, mwv almab nyidul dooto ho hiyv nyiv kacdvn, mwv kacib nyidul dooto, hiyv nyiv aldvn, mwv alboam nyidul dooto, hiyv nyiv dvrwqb doodwn mwv dvrwqb doodu to.”

¹²Jisu bedwn, “Tagabto! Ngo vnwqb haaikun! Hiyv hognvkam nyipan hoq nyijongam jidynam mam ngo ham ngoqg dook si doog gvdwn.

¹³Ngo jaqmolo otuqngv ho kokwngv, bvl pwrabov ho bvl pwtwr bov.”

¹⁴Swwg svvn hoqg aaxiam dvdwb ho lvpw viyap urab haadwb atwg vjam dvrwqb niixaqbo nyi tulungv paqnam jaqkv.

¹⁵Hvbmabde lvpw agaho doonbo nyi tuluhv kacbov, sootu tunbov, yocu-yabio nyinbov, nyi mengbov, ui panbov ho bek-nyiklo xaalyo bo nyi tulungv.

¹⁶“Jisu ngo, ngoqg ao gumtwngam kanam nvmlwqtvl soq tulu sam nulam dvrwq namlo tuluho bekin mvdwb kanam pan. Ngo Debidg imiq dvpar hoqgv haanbo ko hosiqkv. Ngo ar korlum huunbov.”

¹⁷Yalv la Nyem akv bedo, “Haato!” Hiyv nyiv sam tapa dvn, vxiv sam bedwb nyitayin, “Haato!” Hiyv nyiv hvngwr dvn mwv haato ho swwg issam kor jimakam twwnyib twwto, hiyv nyiv twwnw dvn sam twwto.

¹⁸Jon ngo, nyiqry benam soq pota so bepnam agam mam tanbo mwlwngam nyi vxiam yvtw pal vcjaqb bedwn; hiyv akgon soq agam tulu aoso vbw dvn, Pwnbov soq pota so xeqpwl apnam hentwr laqm baqdynam aob mwam laqm bvqbw mvtayin.

¹⁹Ho hiyv akgon soq pota so xeqpwl apnam nyiqry benam soqgv hog ak naapaq tayin Pwnbov mwwg swwg svvn hoqg aaxy pudnam, soq pota so jidub hvl xeqpwl apnam mam ho Dvrwqbo lvpw hoqgam naapaq tayin.

²⁰Hiyv nyiv soq agam sam hvvky swwnbo akv soq mwlw sam bedwn, “Vv, jvqtw jaqb! Ngo vnwqb haaikun!” Soq sib sam nyimto. At Sw Jisu, Haato!

²¹At Sw Jisug anyangv nul mwlwg lvgab dooba nvka! Amen.