Read Nyishi NYIQRY 3 Bible Online

NYIQRY 3 - Nyishi bible

NYIQRY 3

¹“Sardis dvrwq namlo ho doonbo ao gumtwngam soq pui sam xeqto. “Soq pui si Pwnbog Yal kvnam la takar kvnam doogbo ak hoqgv. Ngo cengdwn no hognvk nyis tulungam nyidu dvn. Ngo cengdwn, no gv vpv turl doogam gab nam yuug do; hvbsujaqkam no sidkun hvb nyido.

²Hoqgab huurab tuku, ho sita bo tulu ham siriq maadab ator torto. Hoggab ngoqg kaanamv no hognvk nyis tulungam nyipa kun hoqhv sijakam ngoqg Pwnbog kaagaho niqtuq lengnam kaapa ma.

³Mwwgabto, hoggab nam hognvkam biswr pakun ho no hognvkv tapa kun ham tvjwl noqg nyic nyinam hoqgv mwwkurl wkur tuku, hvbmab no huurab maab nyiloqkam ngo noqg dookub dvcobov haanam hvbkalam haatayin ho no ngoqg haad moodam cengram.

⁴Hvbmabde noqg Sardis ho atwg vjam kac mvmab apbo nyi tulu go doodo, bulv ngoqg lvgab vj jipu kootwl wi-wcal yvtayin. Hoggab bulv hvb nyidwb niqtuq doon bov.

⁵Hiyv nyicam mviya dvn bulam soq eminam swwg pota hoqgv naapaqram. Ngo Abwg agaho ho mwwg ao gumtw tulug agaho bulv ngoqgab dood kunwk hvl bedarl bepatayin.

⁶“Hiyv nyiv nyuru baqdwn, mwv Yalv dvrwq namlo tulungam benam sam tagabto!

⁷“Piladelpiya dvrwq namlo ho doonbo ao gumtwngam soq pui sam xeqto. “Soq pui si dvrwqbo ho jvqtw bo ak hoqgv. Mwwg alaqho Debidg sabi-ngam doogdvn, mwv mvkonam viyap pam hiyv akkam ciqtum nyoma dvn ho mwv mutumnam viyap pam hiyvkam mvko nyoma dvn, mwv bedwn.

⁸Ngo cengdwn no hognvk nyis tulungam nyidwn. Ngo cengdwn noqg atorv anyo koggo doodwn ho ngoqg tomswrnam mam tal no ngoqg eminam bepaq maab mwwjwl hvraqb doodo. Ngo noqg agaho viyap yabg mvkol ap jipan, ham hiyvkam mvko nyoram.

⁹Tagabto! Uiyig dvparb doonbo tulu, xaalyo bo atam Juhudi majaqkam Juhudi ngvk hvl bisboam ngo bulam ngoqg lvpia lwkwb haal xumdvb jitayin. Ho bulv mwlwngv ngo nam aby bonam mam betayin.

¹⁰Hoggab nam ngoqg cwqtwk hvl gaml jinam mam niqtuq nyilinpa, hoqgab ngo nam gvda gvtwg aoso haata bo swcw nvg aoso doonbo nyi mwlw gab haata bo hentwr hoqgv nam ywwtayin.

¹¹Ngo vnwq jaqb haaikun. Noqg doognam mam hvvmin apto ho hiyv nvkam noqg mviya ko-gab amin kaapanam mam naareq komabv.

¹²Ngo mviyabo akam ngoqg Pwnboam xumk namlo rwwda ann gob mwam mvtayin ho mwv ham nywywngam ham apaqram. Ngo mwwg aoho ngoqg Pwnbog eminam la ao gvda toloqgv ipoq tanbo ngoqg Pwnbog lvpw nit Jerusalem eminam xiqlwq tayin. Ngo mwwg aoho ngoqg nit eminam kam xiqlwq tayin.

¹³“Hiyv nyiv nyuru baqdwn, dvrwq namlo tulungam Yalv hognvkam bedwn ham tagabto!

¹⁴“Laodisiya dvrwq namlo ho doonbo ao gumtwngam soq pui sam xeqto. “Soq pui si Amen, mwwjw albo hoo jvqtw jaqb hvvky swwnbo hoo Pwnbog pwnam mwlwngam pwconam ak hoqgv.

¹⁵Mwv bedwn, hognvk nyis tulungam no nyipa kun ham ngo cengdwn. No og lakam ogma ho hviyiq lakam hviyiq ma, gubum gulum do. Ngo mwwdwn no akwn maalo akwn hvb swwkin pa.

¹⁶Hvbmabde no gubum gulum ko-gab, og kama, hviyiq kama, hoqgab ngo nam ngoqg agam soqgv tacor curpaq tayin.

¹⁷No bedwn, ngo nyet dvn ho nyet twnwr pakun. Ngoqg nyet tvdynam mam tvpa kun. Hvbmabde no aya-kaasor dvb nyidwn, aya mwwpanamv, jwwgw dvn, vj koopa maadwn ho nyiqca dvn ham no cengsma.

¹⁸Hoqgab ngo nam tomswr-hony dvn ho ngoqg galoqkv hun rvto, hun kaadar bolo. Ho vj jipu, vj koos loqrub noqg gv ham kootum naadwb ho hvnyw-har kaapanam noqg gv asar ham kootum naato. Noqg vnyiqkv kaapa dukub noqg vnyiqho dilwq dvb vnyiq dvrab loqkam rvto.

¹⁹Hiyvn ngo abydvn, bul mwlwngam yolu ruqdwn ho laqm-baqm dvn. Hoqgab no hvnyw mwwpa gvdwl noqg nyic nyinam hoqgv mwwkurl wkur tuku.

²⁰Kaato! Ngo viyap yabtam ho doqdu dvn ho viyap pam kwdin dvn, hiyv akgon ngoqg agam mam tatwl viyap pam mvko jitayin ngo mwwg nammwb haal mwwg dookub dvba tayin, hoo mwv ngoqg lvgab dooba tayin.

²¹Mviyabo tulungam ngo bulam ngoqg bviyamho ngo mviya peekul sija ngoqg Abwg bviyamho doonam hvbkalam doom dvb jitayin.

²²“Hiyv nyuru baqdwn, mwv dvrwq namlo tulungam Yal benam sam tagabto!”