Read Nyishi NYIQRY 4 Bible Online

NYIQRY 4 - Nyishi bible

NYIQRY 4

¹Hoq kokwb ngo kaanam ak akta kaapanum, ngo ao gvdag viyap ak mvko tvl apnam mam kaapanum. Hoo agam yalgo tuuly miqnam hvb dunbo ak ngam benam mam tapanum, hv benum, “Soq caato, soqg kokwb hognvkv nyitayin ham ngo nam bekin tvs.”

²Bic-belin maadab Yalv ngam mwwg alaqhv bvvnum. Ao gvda tv nyi ak hun pvlw ao golo doodunam mam ngo kaapanum.

³Mwwg nyuqmv jaspar hoo karnelian tvsw hvb huunum, ho hoq hun pvlw taqg-loosaqho jeenbo haqr gogongv gooiyiql doonum.

⁴Hoq hun pvlw ham gooiyiql hoqho asaq hun pvlw camnyi leq vpy go doonum, hoq camnyi leq vpy go hun pvlwho camnyi leq vpy nyi axago vj jipu vj kootwl hoo hun ywr dumtup bentwl doonum.

⁵Hun pvlw hoqgv taiyam wmv bioqlinum hoo agam Yalv la doogumv dulinum. Hoq hun pvlw hoqg agaho wm mur kvngo wm bioqdul doodunum, hoq tuluhv Pwnbog yal kvnv.

⁶Hoq hun pvlw otuqho vrs hvb nyinbo dvrwq cojorbo sa-svlo hvb nyitwl doonum. Hoq hun pvlw agaho taqg-loosaqb langk haabo ho hun pvlw gooiyiq tvl, langk haabo ho vnyiq gvnbo turnbo ao gumtw vpy go doonum.

⁷Otuq jaqb sony hvb nyinbo, hoq kokwb vnyi dvnhv svv hvvb hvb nyinbog, hoq kokwb oum dvnhv nyi nyuqm hvbjaq nyitwl, hoqgv vpy dvnhv pvta pwm jaakar joodu bo hvb nyinum.

⁸Hoq vpy bwbw ao gumtw turnbo hv bulug vxiv alap labx go gvnum, hoo bulug alab tuluho vnyiqngv ura aob kvvyiq-taxeqnum. Bulv aal aiyam bemin benam mam nywywngam topaq maanum. Bulv benum, “Dvrwq, dvrwq, dvrwq, Mwlwngam ator yaanbo At Sw, kolgv dooky bo, sijakam doonbo hoo haady bo Pwnbo.”

⁹Hoq turl doonbo nyi vpiv hun pvlw aoho doonbo akam xuml, paql ho nwrba cwtam hoqgv nwrba gob yuuky nvka hvl bemin benum. Bulv hvb nyida kalam

¹⁰camnyi leq vpy go nyiixa nyi tulungv hun pvlw aoho nwrba cwtam hoqgv nwrba gob doody bo akam lwbw kumbwl xumnum. Bulv bulug ywr dumtup pam dootam agaho jooptvl benum,

¹¹“Ngulug At Sw la Pwnbov! No xinam jaqkv yuunam mam, paqnam mam hoo huqlwngam nvvrwq deebv. Hoggab no hog mwlw luuxiam pwnum hoo noqg bulam swwm dvb jigam gab bulv doodwn hoo swwgam kaapa pan.”