Read Nyishi NYIQRY 5 Bible Online

NYIQRY 5 - Nyishi bible

NYIQRY 5

¹Ngo hun pvlw aoho doonbo akwg lvqbwq alaqho pota tiqg bvvnam mam kaapanum. Hoq pota taq ham ura aob xeqnamv doonum. Hoq pota ham morxtubnam kvn lvgab morxtubnamv tubnum.

²Ho ngo ator albo ao gumtw ak kaapanum, mwv vc alwb sogoql benum, “Morxtubnam mam hiyv mvkol pota tiqnam mam taakoq nyotayin?”

³Hvbmabde ao gvda tolokam hvbmab gvda gvt so kam hvbmab ako nyook bolkam hoq pota vtiq ham taakoql kaanbo akukam dooma ko-gab ham hiyvkam taakoql hoq ura ham kaanyiram.

⁴Hoq pota vtiq ham hiyvkam taakoql kaanyi bo akukam dooma ko-gab ngo nyiqs dinum.

⁵Kokw so nyiixa akwn ngam benum, “Xamab, kaato! Judiya Sony nyot nyobv, Debidg ko hosiqkv mviya gvn kuba, ho mwv morxtubnam kvnam mvko dvb, pota vtiqkam taakoql kaadwb atorv doodwn.”

⁶Hoq kokwb ngo sviya ko ak viyin dootam lvpa ra jaqho turl doonbo vpiv la nyi nyiixa tulungv gooiyiql daqgnam mam kaapanum. Sviya ko akam patab pan hvb nyiknum. Sviya ko akv vrrw kvn go ho vnyiq kvn kalam go baqnum. Hoq tuluhv gvda gvt mwlwg kanam nvmlwqnam Pwnbog yal hvnamv.

⁷Sviya ko akv pota vtiqngam hun pvlw aoho doonbo dookub haabnv mwwg alaq lvqbwq hoqgam naanum.

⁸Mwv hvb nyiyikam turl doonbo nyi vpiv la ho nyi nyiixa camnyi leq vpiv Sviya ko akwg agaho bumptvl xumnum. Bulug alaqho vxiv rwwxw ho sungam albo sulum hoq hun pukaq kaqg kaqgab mwlwngv bvvnum, soq tulu si Pwnbog nyi tulug swgwnamv.

⁹Bulv nit bemin ak benum, “No pota vtiqngam naal hoq morxtubnam mam mvko deebv, hoggab nam mengknum, hoo noqg hijum mam nyob luuxig agam mam, nyobam, dulungam Pwnbo gab rvknum.

¹⁰No bulam Pwnbog nyubwg lvpw akub mvnum ho bulam ngulug Pwnboam xumdvb, ho bulam gvda gvtam bemdvb jitayin.”

¹¹Ho ngo lokta kaanum, xila maanam ao gumtw tulu go kaapanum. Bulv dootam mam gooiyiql daqgnum, ho turl doonbo nyi vpiv la camnyi leq vpy nyi nyiixa tulungv

¹²vc alwb goql bemin benam mam tapanum: “Mengknam Sviya ko akv, atoram, nyetam, nyijwq-nyegam mam, xinam mam, yuunam mam, hoo paqdynam mam naady bov!”

¹³Ho ngo ao gvdalo, gvda gvt lo ho ako gvdalo, swnyiqlo doonbo vc amin luuxiam turl doonbo mwlwngam swcw nyodo soqgam bulam mwlwngam bemin bidul doonam mam tapanum. “Hiyv dootam aoho doonbo akam ho Sviya ko gab, paqnamv, xinamv, yuunamv ho atorv, nwrba cwtam hoqgv nwrba gob doonka!”

¹⁴Turl doonbo nyi vpiv birwqnum, “Amen!” Ho nyi nyiixa tulungv kumbwl geqpwl xumnum.