Read Nyishi NYIQRY 7 Bible Online

NYIQRY 7 - Nyishi bible

NYIQRY 7

¹Soq kokw so ngo gvda gvtwg cuukiq vpy ho ao gumtw vpy go doqdu dvb kaapanum. Bulv cuukiq vpy hoqg dooiyam yim maab nootul aptvl gvda gvt aoso kam, sa-svlo ao hookam, swwn ao hookam dooiyam yim maab doomnum.

²Ho ngo ao gumtw asaq ak dou-caga hoqgv turl doonbo Pwnbog morxtubnanam bval haanam mam kaapanum. Mwv vc alwb sogoql Pwnbov gvda gvtam la sa-svlongam twrm dvb ator jinam ao gumtw vpiam benum.

³Ao gumtw akv benum, “Gvda gvtam, sa-svlongam ho swwnam hog mvmab, ngulv ngulug Pwnbog nyera tulungam bulug tuqt aoho hog ak morxtubl ap maady deedib.”

⁴Ho ngam betamnamv tuqt aoho Pwnbog morxtubnam nyiv xikanamv 144,000 gob nyinum. Bulv Israel nyob camleq vnyi go doonum.

⁵Juda hoqgv nyob 12,000 gob morxtubnamv doonum, Reuben hoqgv 12,000 gob, Gad hoqgv 12,000 gob,

⁶Aser hoqgv 12,000 gob, Naptali hoqgv 12,000 gob, Manasse hoqgv 12,000 gob,

⁷Simeon hoqgv 12,000 gob, Lebi hoqgv 12,000 gob Issakar hoqgv 12,000 gob,

⁸Jebulun hoqgv 12,000 gob, Josap hoqgv 12,000 gob, Benjaminwg tulu hoqgv 12,000 gob morxtubnamv doonum.

⁹Soq kokwb ngo nyob luuxy, tulu luuxy, nyiilu luuxy ho agam luuxy hoqg nyi xilamanam acamgo vj jipu kotwl dootamho la Pwnbog Sviya ko ogumho doqdunam mam kaapanum.

¹⁰Bulug alaqho tamaq svvn haqbam bvvnyianum. Bulv vc alwb sogoq goql benyanum, “Ywwt ywwnamv ngulug hun pvlw aoho doonbo ngulug Pwnbog galoqkv la Sviya ko galoqkv haadwn!”

¹¹Ao gumtw mwlwngv, nyi nyiixa tulungv ho turl doonbo svdin vpiv dootam mam gooiyiql doqtum tvl, hun pvlw agaho bulv mwlwngv lwbw kumbwl Pwnboam xuml.

¹²Begamv, “Amen! paqnamv, yuunamv, mwwlaqnamv, paqyalinco hvnamv, xinamv, atorv ho atornamv ngulug Pwnbog gab nwrba cwtam hoqgv nwrba gob dooky nvka! Amen!”

¹³Nyiixa tulug akwn ngam toxnum, “Soq vj jipu koonbo nyi tulu si hiyv hoo hogloqkv haapan?”

¹⁴“At, ngo cengma, no ham cengdwn,” hvl ngo birwqnum. Mwv ngam benum, “Soq nyi tulu si sis-torsv twqb mvnyi-mviyanam hoqgv simab lengk bo nyiv. Bulv bulug vj koonam mam Sviya kog ui hijum lvgab niixaq tukul puulu dukub mvpa kun.

¹⁵Hoqgab bulv Pwnbog hun pvlw agaho dootwl mwam xumk nam uraho Pwnboam aal aiyib kanam tal doodwn. Hun pvlw aoho doonbo akv bulam hiyv nvkam hog mvm maab daqtor tayin.

¹⁶Ho bulv lokkam kano hvngwr nywywngam hentin takma, hvbmab bulam doonyiv kam xomta kuma ho hog og ayaq gokam bulug ogumho doota kuma.

¹⁷Hoggab hun pvlw lvpa jaqho doonbo Sviya ko akv bulam rvkybo gob nyitayin ho mwv bulam nywywngam xooma bo todul doonbo swwg issam jinbo iss xulin koob bool wgtayin. Ho Pwnbov bulug vnyiq nyiqsam tixaq jitayin.”