Read Nyishi RUT 2 Bible Online

RUT 2 - Nyishi bible

RUT 2

¹Sija Naomig nyol Elimelekwg nyob hoqgv mwnwg imiq lwkw xinam nyi ak doonum, hoqg eminv Boaj

²‍Hoo Moab nyem Rut, Naominvn benum, “Ngo rongo rwqtaqb wdeen hoo ampa paakar taden, ho ngo cengdo ngam nyi tuugin kvvmw maab anya mwwpal mwwsw yin pv.” Hoo mwn mwnwn benum, “Ngoqg nyem ko, wn.”

³‍Hoqgab mwn rongo rwqtaqb wnum hoo am naanbo naaro kokwb ampa paal wnum, hoo Elimelekwg nyob hoqg Boaj rongo ho mwn ampa paakarnum.

⁴‍Hoo kaato, Boaj Betleham hoqgv haanum. Hoo mwv am naanbo tulungam benum, “At Sw nulug lvgab dooba nvka.” Hoo bulv birwqnum, “At Sw nam lvqc gvnka.”

⁵‍Ho Boaj am naagbo yaapa akam benum, “Soq si hiyvg dvn nyijwrv?”

⁶‍Hoo am naagbo nyera akv birwqnum, “Soq dvn nyijwr si Moab nyemv, hiyv Moab gvda hoqgv Naomi lvgab haabanum.

⁷‍Mwn benum, ‘Ngam anya mwwpa gvdwl am naanbo tulug naarongam ngam ampa paam tvb. Hoqgab mwn haanum, hoo mwn sor komc hoqgv sija godab ampa poodu do, mwn anyo ko go doonu twqnam.”

⁸‍Ho Boaj Rutnvn benum, “Sija, tato, ngoqg nyem ko, asaq rongob ampa paakartab wmabv ho soq ak sam apaqmab, hvbmabde ngoqg nyem nyijwr tulug ogum ho yvba to.

⁹‍Noqg vnyiqkv rongog am naanbo tulungam tuugab to, hoo bulug kokwb wmin gvto. Ngo nyega yaapa tulungam nam ika-hoqra mabwk hvl ngo tomswr maan mvi yv? Hoo hwdlo no hvngwr yin, wgdvl yaapa tulug iss bwwpnam uppum hoqgv twwto.”

¹⁰‍Ho mwn mwnwg nyuqm mam kedho pvxwl nywtin banv hoo mwam benum, “Hoggub ngam noqg vnyiqho aya kaapa pan, ngo nyoodo nyi akv, ngam no hoggub kaapanum?”

¹¹‍Hvbmabde Boaj mwnwn birwqnum, “Noqg nyolv sixo kokw so noqg aiyam no hog nvkv nyiknum hoqg hog mwlwngam ngam twrkub betamnum, hoo hoggub no noqg ab-annam hoo noqg atwg gvdangam apaq pel hoo noqg cengka maanam nyiilug pengko ho haanum.

¹²‍No hoggv nyipa kun, ham At Sw nam jirwq gvnka, hoo Israelwg Pwnbo At Sw, hiyvg alap niikum ho no cwwgwl doodwb naapa kun, hv nam bumpwb lvqc akiam jignvka!”

¹³‍Ho mwn benum, “Ngoqg bir ata, ngam noqg vnyiqkv aya kaapa pa, hoggab ngo noqg paqn tulug paqn akwg taqp kaama su, noqg paqnam, no ngam anya jaqb agam goopa ku.”

¹⁴‍Hoo dwd moodho Boaj mwnwn benum, “Soqb haato hoo wtw meeg dvto hoo noqg dvsam dvtwl twwbiq to.” Ho mwn am naanbo tulug bviywrho doanum, hoo mwv mwnwn wtw cwwnam mam jinum. Hoo mwn dvdeq maady deedib dvnum, hoo mwn meeg dvleqkv doonum.

¹⁵‍Hwdlo mwn ampa paatab wleq yin, Boaj mwwg nyega yaapa tulungam tomswrl begamv, “Mwnwn am agaq soqkv kam joomto, hoo mwnwn yolu maabv.

¹⁶‍Hoo am agaq hoqgv meeg seqlin gvdwl mwn gab apaq jito, hoo mwnwn yolu maabv.”

¹⁷‍Hoqgab mwn ariyum namgub rongo ho ampa paakarl yvnum. Ho hoggv mwn ampa paaknum ham mwn swql mvxaqnum, hoo tanyeqkv ipa ak gob nyiknum.

¹⁸‍Hoo mwn ham baqla yukul hoo bopamb wnum. Mwnwg ai akv mwn hoggv ampa paakarnum ham kaanum. Mwn mwnwg aiyam mwnwg wtw dvngo baqnam mam kam naalin banv aiyam jinum.

¹⁹‍Hoo mwnwg aiyv mwnwn benum, “Soolo no hogloq ho ampa paakar pen i? Hoo hogloq ho no bonam nyipen? Nam kvvmwq maab kaapa bo nyi hv xinam jaqkv.” Hoqgab mwn mwnwg aiyam betamnum, mwn hiyvg lvgab bonam nyinum. Ngo soolo Boaj hvl eminam nyi akwg lvgab bonam nyinum.”

²⁰‍Hoo Naomi mwnwg nyeexw akam benum, “At Sw mwam lvqc cignvka, swwl doon boam kam hoo sin boam kam aya mwwpanum!” Naomi mwnwn benum, “Nyi ak hv ngulug imiq lwkw nyiv, ngulam pvlyw deenbo akv.”

²¹‍Hoo Moab nyem Rut benum, “Soq lvgab, mwv ngam hvl kam benum, ‘Ngoqg nyega yaapa tulu sam bulv ngoqg vliam naanya maady deedib no bulam kaaya tvbv.’”

²²‍Hoo Naomi mwnwg nyeexw Rutnvn benum, “Ngoqg nyem ko, hv aljaqpa, no mwwg nyem nyijwr tulu lvgab wmin gvto, hvb nyima baloqkam asaq rongo ho nam nyinyi-nyiya kamyi nvpv.”

²³‍Hoqgab mwn Boajwg nyem nyijwr tulu lvgab hengab jinjinl yvmin gvl tanyeqkam la wtw am mam vly naanya maady deedib ampa paakarnum. Hoo mwn mwnwg ai lvgab doobanum.