Read Nyishi RUT 3 Bible Online

RUT 3 - Nyishi bible

RUT 3

¹Ho Naomi mwnwg aiyv mwnwn benum, “Ngoqg nyem ko, nam pucum-svlaq boloq ak ngo mvviyin jima dvn yv, hoqhv noqg lvgab alwb dookam yin pv?

²‍Boaj ngulug imiq nyi maai yv, hiyvg nyem nyijwr tulu lvgab no bon nyimin gvnum? Kaato, mwv soi aiso tanyeqkam jurpy mvxaq tayin.

³‍Hoqgab hurs moomiqto hoo no atv kuty piaqlab to, hoo noqg vjam kooto hoo jurpy mvxaqkob in, hvbmabde hwdlo mwv dvnam twwnam mam duiyum maady deedib, no atv nyi ak ham kaapa komabv.

⁴‍Hvbmabde hwdlo mwv yuba yin, mwwg yubkam hingkib kaagab ta. Ho jinglwq gvdwl mwwg lvpiag vjam puko gvdwl lwsin mingta, hoo mwv nam hoggv nyitayin ham betam tayin.”

⁵‍Hoo mwn birwqnum, “No hoggv bepan ham ngo nyitayin.”

⁶‍Hoqgab mwn jurpy mvxaqkob innv mwnwg aiyv hoggv gaml jinum hvbjaq mwn nyiknum.

⁷‍Hoo Boaj dvpe-twwpe kul, mwwg hangv hwrcwnum, ho mwv wknv am yaqpko vtwrho karknum. Ho mwn cooikab jinglwq banv hoo mwwg lvpia vjam lwqko banv lwsinl karranum.

⁸‍Ai nywyw raho nyi ak hv taqcgonwb giqkub yukam, kaato, nyem ak mwwg lvpiaho lwsin tvl yubnum!

⁹‍Mwv benum, “No hiyv?” Hoo mwn birwqnum, “Ngo Rut, noqg paqn ak hv. Noqg paqnam noqg alapv lobyum tvb, hoggab no ngam pvlyw deen bo akv.”

¹⁰‍Hoo mwv benum, “Ngoqg nyem ko, At Sw nam lvqc cignvka. Noqg soq anya jaqb nyitwr-nyinya nyinam si otuqg nyinam tulu ham koi yaadwb nyipa ku, jwwgwbo jaqkam hoo nyet bo jaqkam, no yaapa tulu lvgab wmin gwj kuma.

¹¹‍Hoo ngoqg nyem ko, bos maabv. Noqg hog mwlw konam ham ngo noqgab nyitayin, hoggab ngoqg pamda tulug nyi mwlwngv no xinam nyem akv hvl cengdwn.

¹²‍Hoo soq si jvqtwngv ngo pvlyw deen bo akv. Hvbsujaqkam ngam lwrw yaanbo ak nyi ak doodwn.

¹³‍Soi gab so yubto, hoo aaram mam mwv nam pvlyw baloqkam alv; ho mwam ham nyim to. Hvbmabde mwv nam pvlyw ram hvbaloqkam, At Sw swwl doody deedib, ngo nam pvlyw tayin. Aaram namgub so yubto.”

¹⁴‍Hoqgab mwn mwam ar namgub lwsin tvl yumin gvnum, hvbmabde nyi apongam pwbwb kaadar maatab mwn gorab kunv wknum. Hoo mwv benum, “Jurpy mvxaqko ho nyem haan boam tulungam cengm mvmabv.”

¹⁵‍Hoo mwv benum, “Noqg vj bwanam ham taaborl hoo jeggam yaato.” Hoqgab mwn nootul jeggamnum hoo mwv tanyeqkam huc cix go tuqjnum hoo ham mwnwn joobaq jinum. Ho mwn bopam urab wknum.

¹⁶‍Hoo hwdlo mwnwg ai dookub mwn haaknum, mwn benum, “Ngoqg nyem ko, no hwdwg aldvb nyipe ba?” Ho mwn mwnwn nyi ak hoqg hog mwlw bek-nyiknam mam betamnv,

¹⁷‍begamv, “Soq tanyeq huc cix sam mwv ngam jinum, ho mwv ngam benum, ‘Noqg ai dookub no alaq asarb wkur kuiyo.’”

¹⁸‍Mwn birwqnum, “Ngoqg nyem ko, bvrwq toggoqkv hogloq taqc yaab wi bwdwq, ham cwql dooiya to, hoggab nyi ak hv roma ram hvbmabde soolo mwv bvrwqkam pvvb patayin.”