Read Nyishi RUT 4 Bible Online

RUT 4 - Nyishi bible

RUT 4

¹Sija Boaj pamdag toggoqb wnv hoqho doonum. Hoo kaato, Boaj Rutnvn agam goonum, mwnwn pvlyw deenbo nyi akv haanum. Ho Boaj benum, “Ajin, soqb haato; soq so dooto.” Hoo mwv haabnv hoqho doonum.

²‍Hoo mwv bopam hoqg nyi axa wyw go boanum, “Hoqho bulam doomnum.” Hoqgab bulv doonum.

³‍Ho mwv pvlyw deenbo akam benum, “Moab gvda hoqgv hookur kunbo, Naomi, ngulug imiq lwkw Elimelekwg gvda ked go puqta do.

⁴‍Hoqgab ngo mwwgamv ngo ham nam betam dvb mwwnum, ‘Ham soq doonbo kaaga so hoo ngoqg nyiilug axa tulug dook kaaga so rvtayin.’ No ham pvlyw baloqkam, ham pvlyw to. Hvbmabde no nyima baloqkam ngam bepa to, ho ngo cengtayin, hoggab noqg lvvg alo ham pvlyw deenbo dooma, hoo noqg kokwb ngo hvvxiq dvn.” Hoo mwv benum, “Ngo ham pvlyw tayin.”

⁵‍Ho Boaj benum, “Hwdlo aalam no rongongam Naomig alaq hoqgv rvtayin, sileq kunam xwwmy, Moab nyem Rut nvkam no pvlyw dvb nyitayin, hoggab gumn nvvsiqbo nyi akv sin bog emin hoqg imiq dvparam doosiq mvdwb nyij dvb nyidwn.”

⁶‍Ho pvlyw deenbov benum, “Ngo ham ngoqgab atv pvlyw nyod ma, hoggab ngoqg atwg hosiqkv ham gumn bwwnyi deema. Ngoqg pvlyw duam no atv naato, hoggab ngo ham pvlyw nyod ma.”

⁷‍Hoq moodho soq sib nyicw-mwcwngv Israelwg nyob uraho pvlyw deenam mam naako-naapeqnam mam nyil doonum: hoq hvkam pwbwb cengl nyidwb hvb nyiloqkam, nyi akv mwwg samtaqkam pisuql hoo ham asaqkam jinum, hoo hoqhvb nyil Israelwg nyob uraho lvqry-laqso mvl pvvb mvnum.

⁸‍Hoqgab hwdlo pvlyw deenbo ak hv Boajnvn benum, “Noqgab atv ham rvto,” mwv mwwg samtaqkam pisuqnum.

⁹‍Ho Boaj nyi axa tulungam la nyiilu mwlwngam benum, “Nulv soolo hvvky swwg nuk ba ngo Naomi alaq hoqgv Elimelekwg gumn-ranam hoo Kilion gvla Maxlonwg gumn-ranam rvpa kun.

¹⁰‍Maxlonwg xwwmy, Moab nyem Rut nvkam, ngoqg nywxw gob rvpa kun, hoggab gumn nvvsiqbo nyi akv sin bog emin hoqg imiq dvparam doosiq mvdwb nyij dvb nyidwn ho sin bog eminam mwwg vbw-bor tulug pengko hoqgv hoo mwwg atwg toggoq nyook hoqgv mvpaq mvma dvb nyidwb nyij dvn. Nulv soolo aal so hvvkib kaag nukba.”

¹¹‍Ho toggoqho doonbo nyiilungv la nyi axa tulungv benum, “Ngulv hvvky akwb tat kun. Noqg nam ho haata bo nyem akam Rakel la Liya hvb At Sw lvqc cignvka, hiyv Israelwg nombungam lvkin gob pwnum. No Iprata ho xinam akam nyig nvka hoo Betleham ho yuun ka,

¹²‍hoo noqg nammv Perej nam hvb nyin ka, hiyam Tamar Judanvn ko bwwjnum, At Sw nam soq nyem nyijwr soqgv ko hosiqkam jignvka.”

¹³‍Hoqgab Boaj Rutnvn naaknum, hoo mwn mwwg nywxwb nyiknum. Hoo mwv mwnwn doognum, hoo At Sw mwnwn ko gvmnum, hoo mwn nyega ko ak bwwnum.

¹⁴‍Ho nyem tulungv Naominvn benum, “At Sw xinam jaqgo, hiyv nam soolo godab pvlyw dooma bo dvb apaq ma, hoo mwwg eminam Israel ho yuupy mvm to!

¹⁵‍Mwv noqg swwgam swwdar mvg nuka hoo noqg xox yukam nam cin-hoonbo gob nyin ka, hoggab noqg nyeexw akv nam aby dvn, hoo nam tuup kvnv nyinam mam koi yaab nyij bo akv, mwam ko bwwpa ku.”

¹⁶‍Ho Naomi kongam naanum hoo mwam mwnwg xarpo ho joop tvl mwam anya jaqb sorabnum.

¹⁷‍Hoo door-doopw hoqg nyem tulungv mwam emin jil begamv, “Naominvn nyega ko bwwj paku.” Bulv mwam Obed hvl eminum. Mwv Jesseg abv, hoo Debidg abv.

¹⁸‍Soq tulu si Perejwg nwdv: Perej Hejronwg abv,

¹⁹‍Hejron Ramwg abv, Ram Amminadabg abv,

²⁰‍Amminadab Nasonwg abv, Nason Salmonwg abv,

²¹‍Salmon Boajwg abv, Boaj Obedwg abv,

²²‍Obed Jesseg abv, hoo Jesse Debidg abv.