Read Nyishi 1 SAMUYEL 1 Bible Online

1 SAMUYEL 1 - Nyishi bible

1 SAMUYEL 1

¹Iprayim diisw gvdaho Ramataim-Jopim mvk hvnam nyi ak doonum mwwg eminv Elkana, mwv Iprayimg nyook hoqg Jup gv ko hosiq Tohu, ho Tohug ko hosiq Jerohamwg ko tuupv.

²‍Mwv nywxw vnyi go doonum. Akwn hoqg eminv Hanna, hoo akwn hoqg eminv Peninna. Hoo Peninna kongv doonum, hvbmabde Hanna ko doomanum.

³‍Hoglo ho Eli ko tuup Hopni la Pinehas, vnyiv At Swg nyubwb swwl doodu ko ho, soq nyi ak si vnyw-vnywngam mwwg bopam hoqgv At Swn pwr jil xumtab Silob caanum.

⁴‍Pwr jid aalam Elkana jibwq sanam meegwn mwwg nywxw Peninnanvn hoo meegwn mwnwg nyem-nyega ko tulungam jinum.

⁵‍Hvbmabde mwv Hannanvn mvqlw yaagwn jinum, At Sw mwnwg twrngum dvb mvsjaqkam, hoggab mwv mwnwn abynum.

⁶‍Hoo mwnwg ceebiongv mwnwn toluq-talaql hang lengdwb biluqnum, hoggab At Sw mwnwn twrngum dvb mvnum.

⁷‍Hoqgab hvb vnyw-vnywngam nyil wnum. Hog hwdgo At Swg nammwb caatayin, hwdgo Peninna mwnwn hang biluqnum. Hoqgab Hanna vc loodab xabnum hoo hog akkam dvkam twwkam maanum.

⁸‍Hoo mwnwg nyol Elkana mwnwn benum, “Hanna, no hog gab xabdwn? Hoo no hog gob dvma-twwma dvn? Hoo noqg hangv hog gob mwwdwq dvn? Ko tuup wywngam koi yaab ngo noqgab xinam gob nyima dvn yv?”

⁹‍Bulv Silo ho dvxo-twwxo kokw so Hanna gorabnum. Ili At Swg dvrwq namlog rwwda bviywrho tuul doonum.

¹⁰‍Mwn vc loodab mwwdwqnv hoo henc-henyal xabnv At Swn swgwl xumnum.

¹¹‍Hoo mwn dingrnam ak dingnv hoo benum, “Nyiit At Swa, noqg paqn akwg hvvdwqnam sam no jvqtw jaqb kaapa dvnyiloqkam hoo ngam mwwpa dvloqkam hoo noqg paqnam mwwpa maab nyima nyiloqkam, noqg paqn akam nyega ko ak jitayin, ho ngo mwam At Swn mwwg swwnam bumpwngam jitayin, hoo mwwg dum mam yoqciq akkam tvdaqram.”

¹²‍Mwn hvb At Swg agaho swgw gwwdul doodunam mam Ili mwnwg agam mam kaal dooiyanum.

¹³‍Hannag hang urangv agam goodul dootwl mwnwg naborv biil dootwqnum, hoo yal tapa maanum. Hoqgab Ili nyem akam twwxum paku mwwnum.

¹⁴‍Hoo Ili mwnwn benum, “Hog hwdgo no twwxum xuml doota yukun? Noqg opongam no apaq tuku.”

¹⁵‍Hvbmabde Hanna birwqnum, ngo twwxum ma, ngoqg ata, ngo hvvdwq dwql doonbo nyem akv. Ngo twwxum kama, ho opo gokam twwma, hvbmabde ngoqg swwca lo mwwdwqnam mam At Swg agaho ngo betam tomdu dvn.

¹⁶‍Noqg paqn akam ximanam nyem akwb mwwmabv, hoggab ngoqg vc loodab hvvdwqnam mam la vs-axaqnam mam ngo agam goodu dvn.”

¹⁷‍Ho Ili birwqnum, “Swrsob wnku, hoo Israelwg Pwnboam no mwam hoggv kopa kun ngoqg konam mam jignvka.”

¹⁸‍Hoo mwn benum, “Noqg vnyiq kaagaho noqg paqnam mwwswnam mam kaapa labka.” Ho nyem ak hv mwnwg lamtab wknum hoo dvk-twwknum, hoo mwnwg nyuqm ho mwwdwqkv dook maanum.

¹⁹‍Bulv arkomc gorab layil At Swg agaho xumnum; ho bulug nam dook Ramab bulv wkur kunum. Hoo Elkana mwwg nywxw Hannanvn doognum, hoo At Sw mwnwn mwwpa kunum.

²⁰‍Hoo moodv haaikun Hanna ko gvknum hoo nyega ko ak bwwnum, hoo mwn mwam Samuyel hvl emin kunum, hoggab mwn benum, “At Sw hoqgv ngo mwam kopa kun.”

²¹‍Elkana la mwwg imiq dvpar mwlwngv vnywngam mwwg dingrnam mam At Swn pwr akiam jitab caanum.

²²‍Hvbmabde Hanna caamin gvmanum, hoggab mwn mwnwg nyolam benum, “Ko si dvs dvrab kalam, ngo mwam baqca tayin, ho mwv At Swg agaho daqtayin hoo tolo mwv nwrba gob dootayin.”

²³‍Elkana mwnwg nyolv mwnwn benum, “Hoggv noqgab aldvn ham nyito; mwwg dvs dvrab namgub no kaayal doola; At Swn mwwg gomcwr rooxongam nyil wwm to.” Hoqgab nyem ak hv doonyu nv hoo mwnwg nyega koam cil-hool mwam dvs hoobeq namgub mwn doognum.

²⁴‍Hoo hwdlo mwn mwam dvs hoobeq kunum, mwn mwam baqlayil, hoq lvgab vnyw nywum bo hvvb dorg, wtw ipa ak hoo roo ala yooxaq xaqg baqlayil At Swg nam Silo ho caanum. Hoo kongv vjw xiqnum.

²⁵‍Ho bulv hvvbam patabnum, hoo bulv kongam Ilinvn baqal jinum.

²⁶‍Hoo mwn benum, “Oa, ngoqg at! No swwl doody deedib, ngoqg ata, ngo lak noqg agaho daqtwl At Swn swgw bo nyem ak hv.

²⁷‍Hoggab soq ko ak gab ngo swgwl konum, hoo mwam ngoqg konam mam At Sw mwv ngam jipa ku.

²⁸‍Hoqgab ngo mwam At Swn cwwrwq gviyin. Mwv swwl doody deedib mwam At Swn gvqlwq gviyin.” Hoo At Swn mwv hoqho xumnum.