Read Nyishi 1 SAMUYEL 14 Bible Online

1 SAMUYEL 14 - Nyishi bible

1 SAMUYEL 14

¹Soulwg ko tuup Jonatan aal golo mwwg nwwxo-svtam mam baqya bo yaapa akam benum, “Haato, kuj ngulv Palistan sipai tulug taqcgonwb caanuj.” Hvbmabde mwwg abam mwv bepa maanum.

²‍Soul Gibea lvvgwg Migronwg annar lwwpwqho doodunum. Mwwg lvgab nyiilungv lwwx gob doobanum,

³‍hoqho Ahitubwg ko tuup Ahija kam doonum, ho Ili ko hog ko siqda Pinehaswg ko vbw Ikabod, Silo ho nyub vjam kootwl At Swg nyubwb nyinbov kam doonum. Hoo Jonatanwg wnam mam nyiilungv cengmanum.

⁴‍Toggoqho doonbo Palistan sipai tulungam Jonatanwg wbo tanam toggoqho, taqg-taqsab wlw bwdw dwraqnum. Taqgwn hoqg eminv Bojej, hoo akwn hoqg eminv Sene.

⁵‍Bwdw akwn hv Mikmaswg nyoodum ho, hoo akwn hv Gebag nyooko ho doonum.

⁶‍Jonatan mwwg nwwxo-svtam mam baqn bo yaapa akam benum, “Haato, kuj ngulv soq pepaql-mux mvmanum sipai tulu dook yaab wnuj. At Sw ngul gab bonam nyikam yin pv, hoggab anyo-koi jaqkam At Swg ngulam ywwlin deenam mam hiyvkam mvtur nyoram.”

⁷‍Hoo mwwg nwwxo-svtam baqya bov mwam benum, “Noqg hang mwwnam mam nyito. Noqg mwwlwq koob nyito. Kaato, noqg lvgab ngo bumpwngv dooba dvn.”

⁸‍Ho Jonatan benum, “Kaato, ngulv nyi tulug dook yaab wbo nuj, hoo bulam ngulv kaapa kutuj.

⁹‍Bulv ngulam hvl bebnyiloqkam, ‘Nulug dookho ngulv hvvc namgub daqya to,’ ho ngulv ngulug daqk ho daqya tuj, hoo ngulv bulug dookub caama buj.

¹⁰‍Hvbmabde bulv ngulam hvl bebnyiloqkam, ‘Ngulug dookub haato,’ ho ngulv caatuj, hoggab At Sw bulam ngulug alaqlo jilwq paku. Hoo soq si ngulam kaacin dvb nyitayin.”

¹¹‍Hoqgab vnyiv atv Palistan sipai tulungam kaapa dvb wnum. Hoo Palistan sipai tulungv benum, “Kaato, Hibru tulungv bulv atv ungho kvsil doope kul lenglayil hoodu do.”

¹²‍Hoo sipai tulungv Jonatan nvla mwwg nwwxo-svtam mam baqn boam goql hoo benum, “Ngulug dookub caato, hoo ngulv nulam hog ak kaakin tayin.” Hoo Jonatan mwwg nwwxo-svtam baqn boam benum, “Ngoqg kokwb caato, hoggab At Sw bulam Israelwg alaqho jilwq paku.”

¹³‍Ho Jonatan mwwg all-alaq lvgab ngamcanum, hoo mwwg nwwxo-svtam mam baqya bov mwwg kokwb caamin gvnum. Hoo Jonatan bulam patabnum, hoo mwwg nwwxo-svtam mam baqya bov mwwg kokwb bulam mengnum.

¹⁴‍Hoo rongo rvbnyi aado gob otuqcob Jonatan la mwwg nwwxo-svtam baqya bo nyi mengnamv nyiv camnyi gob nyinum.

¹⁵‍Hoo hvb nyiyikam svmcw ho, rongo rwqtaqho, hoo nyiilu mwlwg pengko ho vc loodab bosnum. Sipai tulungv hoo nyob pady bo tulu ngvkam tvmdwrnum, nyioby hwqnum, hoo hoqhv vc loodab bos dvb nyinum.

¹⁶‍Hoo Benjaminwg Gibea ho Soulwg rvky bo nyi tulungv kaanamv, nyiitw mvqlwngv toloq-boloqb cwrsaq-twqb kenam mam kaapanum.

¹⁷‍Ho Soul mwwg lvgab dooba bo nyiilungam benum, “Xikal hoo kaaka to, hiyv ngulug pengko soqgv wnba.” Hoo hwdlo bulv xika yukun, kaato, Jonatan la mwwg nwwxo-svtam mam baqya bov dook maanum.

¹⁸‍Hoqgab Soul Ahijanvn benum, “Pwnbog pvvb uddum mam soqb baqa to.” Hoggab hoq moodho Pwnbog pvvb uddumv Israel nyiilu lvgab wbanum.

¹⁹‍Hwdlo Soul nyubam agam goodul dooyikho Palistan nyi tulug svmcw lo vi-vi yaiya go hur-marab durabnum. Hoqgab Soul nyubam benum, “Noqg alaqkv ikur tuku.”

²⁰‍Ho Soul la mwwg lvgab nyiilu doonbo mwlwngv nyob patab daayob soolinum. Hoo kaato, Palistan nyi tulu nyiicwr-cwrxiv mwwg atwg nyi tulungam pamin sul doonum, hoo hoqho vc loodab hendar-kaapar maab nyil doonum.

²¹‍Hibru tuugin otuq mood hoqgv jaq Palistan nyi tulu lvgab nyinum hoo bulug lvgab bulv svmcw uraho doobanum, Soul la Jonatan lvgab Israel nyi tulug lvgab yvba hoq nyi tulu hvvkam bulug daiyab nyemaq doqkub kunum.

²²‍Hoq hvbkalam hwdlo Iprayim diisw gvdaho Israel nyi tulungv atv kvsil doonyia bov Palistan nyi tulug kenam mam tapa tvl, bulv kam bulam vc loodab bulug kokwb nyob pamin gvnum.

²³‍Hoqgab At Sw Israelam hoq aalho ywwlinum. Hoo Bet-aben namgub nyobam panum.

²⁴‍Hoo hoq aalho Israel nyi tulungv vcjaqb hentwrnum, hoqgab Soul dingl nyiilungam begamv, “Ariyum maatab hiyv nyiv dvs dvn boam beegywn hoo ngoqg ceebio tulungam ngo ree daqtayin.” Hoqgab nyiilungv akkam dvs dvka jimanum.

²⁵‍Hwdlo nyiilungv nyorob haaikukho, kaato, deela ho tongngv doonum.

²⁶‍Hoo hwdlo nyiilungv nyorob haaikukho, kaato, tong ngolangv biqdul doonum, hvbmabde nyi akkam mwwg alaqkam la mwwg agamv ham dvka maanum, hoggab nyiilungv dingnam mam bosnum.

²⁷‍Hvbmabde Jonatan mwwg abwg nyiilu lvgab dingrnam mam tapa maanum, hoqgab mwwg alaq bwwnam beqnyia niqtuqkv ngolangam nwqbam tvl hoo mwwg alaqkv ham naanv agamb vlwql dvnum, hoo mwv ator kunum.

²⁸‍Ho nyiilu hoqg nyi ak benum, “Noqg ab nyiilungam cabcab jaqb dingnv begamv, ‘Hiyv soq aal so dvs dvn boam beelwql apnum.’” Hoqgab nyiilungv ngurs-ngurp do.

²⁹‍Ho Jonatan benum, “Ngoqg ab gvdangam vs-axaq dvb mvpa ku. Kaato, ngo tong ngola vcwr go dvka kalam ngo ator paku.

³⁰‍Soolo nyiilungv bulug mviyanam ceebio tulug dvs-twwsam danyib jaq dvnyiloqkam hwdgo alyin pa. Hoggab Palistan nyi tulungam mviyanam si koi ma.”

³¹‍Hoq aalho bulv Palistan nyi tulungam Mikmas hoqgv Aijalon namgub mengnum. Hoo nyiilungv ngurs-ngurp kunum.

³²‍Nyiilungv rwdwq paqb juqrab kunv nyob pal naareqnam sviyangam hoo hvvbam hoo sibin-svv ko tulungam naanv deela ho patabnum. Hoo nyiilungv vdinam uiyv lvgab dvb dvnum.

³³‍Ho bulv Soulnvn betamnum, “Kaato, uiyam dvtaql dvnv nyiilungv At Swn ceekol nyic nyipa ku.” Hoo mwv benum, “Nulv nyic loodab nyipa ku; ngam so pwtbo wlw loq pwg ngurlin tvbv.”

³⁴‍Hoo Soul benum, “Nyiilug pengko lo nulv atv wpin-wra gvdwl hoo bulam beta, ‘Nyiicwr-cwrxiv mwwg hvvbam ho mwwg sviyangam soq so boa layil patabl dvto, hoo uiyam dvtaql At Swn ceekol nyic nyimab.’” Ho nyiicwr-cwrxiv hoq aiho mwwg hvvb boanam mam bulv hoqho boa layil patabnum.

³⁵‍Hoo Soul At Sw gab yugw ak mvnum; hoqhv At Sw gab mwv yugw mut-mulul mvnum.

³⁶‍Ho Soul benum, “Kuj ngulv soi Palistan nyi tulu kokwb ruqmin gvnuj hoo aaram ar namgub bulam naareq taaj; kuj nyi akkam doom mvma buj.” Hoo bulv benum, “Hoggv xeq noqgab al yindwn ham nyito.” Hvbmabde nyubv benum, “Kuj ngulv soq so Pwnbog ogum hvvnwq tuj.”

³⁷‍Hoo Soul Pwnbon toxnum, “Ngo Palistan nyi tulungam ruqmin gviyin dvi yv? Bulam no Israelwg alaqho jilwq jiyin dvi yv? Hvbmabde hoq aalho mwv mwam hog birwq maanum.

³⁸‍Hoo Soul benum, “Nyiilungam nyigbo mwlwngv, soqb haato, hoo hoggub soolo soq nyic si nyirab pakun ham cengdvl kaaka tuj.

³⁹‍At Sw swwl doody deedib Israelam ywwlin bov, ngoqg ko tuup Jonatan sukjaqkam, mwv hoggub nyijaqkam sidwb nyitayin.” Hvbmabde nyiilu pengko hoqgv nyi akkam mwam birwq maanum.

⁴⁰‍Ho mwv Israel mwlwngam benum, “Nulv taqcgon ho dootayin, hoo ngo la ngoqg ko tuup Jonatan taqcgon ho dootayin.” Hoo nyiilungv Soulnvn benum, “Hoggv noqgab al yindwn ham nyito.”

⁴¹‍Hoqgab Soul benum, “Israelwg Pwnbo At Swa, soq aal so noqg nyerangam no hog nyitwl birwq maadwn? Soq nyimur sam ngo ma lo ngoqg ko tuup Jonatan nyip nyiloqkam, Israelwg Pwnbo, At Swa, Urim mam jito. Hvbmabde soq nyimur sam Israel nyiilungv nyip nyiloqkam, Tummim mam jito.” Hoo Jonatan nvla Soulnvn tuugabnum, hvbmabde nyiilungv keleqnum.

⁴²‍Ho Soul benum, “Ngam la ngoqg ko tuup Jonatanwg pengko so tak cingka to.” Hoo Jonatannvn tuugabnum.

⁴³‍Ho Soul Jonatannvn benum, “Betam to hoggv no nyiknum.” Hoo Jonatan mwam betamnum, “Ngoqg alaq beqnyia niqtuqho ngola anyo go ngo nwqbam tvl lyaqkanum. Ngo si doodwn; ngo sitayin.”

⁴⁴‍Hoo Soul benum, “Pwnbo ngam noqg mwwlwqb nyito; Jonatan, no jvqtw jaqb sidwb nyiky tayin.”

⁴⁵‍Ho nyiilungv Soulnvn benum, “Jonatannvn sim ram, hiyv koi jaqb bonam nyigwl Israelam ywwlinam? Ham aado mvto. At Sw swwl doody deedib, mwwg dumpo dum soog nvkam kedho yoql mvram, hoggab soq aal so mwv Pwnbo lvgab bonam nyipa kun.” Ho nyiilungv Jonatannvn pvlywnum, hoqgab mwv sik maanum.

⁴⁶‍Ho Soul Palistan nyi tulungam ruqmin gvnum, hoo Palistan nyi tulungv bulug at nyookub wknum.

⁴⁷‍Hwdlo Soul Israelwg lvpw at gob swwda kalam, mwwg ceebio taqg-loosaq mwlwngam mwv ceekol nyob panum, Moabam ceekonum, Ammon nyi tulungam ceekonum, Idom mam ceekonum, Jobag lvpw at tulungam ceekonum, hoo Palistan nyi tulungam ceekonum. Mwv hogloq xeq mwv wnum bulam mviyanum.

⁴⁸‍Hoo mwv haakam jaqb nyinv Amalek nyi tulungam mengnum hoo Israelam naareqbo alaq hoqgam bulam naalin kunum.

⁴⁹‍Soulwg ko tuupv Jonatan, Isbi, hoo Malki-sua. Hoo soq tulu si mwwg nyem ko vnyig eminv: any ak hoqg eminv Merab, hoo bwrm ak hoqg eminv Mikal.

⁵⁰‍Hoo Soulwg nywxw eminv Ahimaajwg nyem ko Ahinoam. Hoo mwwg sipai saab hoqg eminv Nerwg ko tuup Abner, Soulwg vkv.

⁵¹‍Kis Soulwg abv, hoo Abnerwg ab Ner Abiel ko tuupv.

⁵²‍Soulwg swwca aal mwlw ho Palistan nyi tulungam vcjaqb nyob pakynum. Hoo hwdlo Soul nyi atorbo, ho haakam bo nyi kaapa yin, bulam mwv mwwg lvgab yvg keenum.