Read Nyishi 1 SAMUYEL 15 Bible Online

1 SAMUYEL 15 - Nyishi bible

1 SAMUYEL 15

¹Hoo Samuyel Soulnvn benum, “At Sw ngam kanamnum nam mwwg Israelwg nyiilu aoho lvpw at gob swwm dvb; hoqgab sija At Swg gomcwr sam tagabto.

²‍Soq sib nyiit At Sw bedo, ‘Hwdlo Israelv Ijipt hoqgv lenglayil bulv lamta ho wdu yikho Amalek nyiv bulam ceekonam mam, ngo kaagab paku.

³‍Sija wgdvl hoo Amalek nyiam nyob pata hoo bulug doognam hog mwlwngam twryum ta. Bulam akkam apaq maabv, hvbmabde nyega ge, nyem ge, ko anyo ge, ko hoiyin ge, hvvb ge hoo sviya ge, svjin ge hoo svdam ge mwlwngam mingtwr ta.’”

⁴‍Hoqgab Soul nyiilungam Telaimho goqkumnv xikanum, lvpiab wnbo nyiv lwwg vnyi lwwyw nyi go, hoo Juda hoqgv lwwyw ak nyiingv nyinum.

⁵‍Hoo Soul Amalek bopam ho haanum hoo lywpa uraho tooiya yaal doonum.

⁶‍Ho Soul Kenait nyi tulungam benum, “Wn, Amalek nyi tulu pengko hoqgv wleqto, hvbmab nyiloqkam bulug lvgab ngo nulam twrtaq tai. Hoggab hwdlo Israel nyiilungv Ijipt hoqgv lenglayil wdu yikho bulam nulv anyanum.” Hoqgab Kenait nyi tulungv Amalek nyi tulug pengko hoqgv wleqnum.

⁷‍Hoo Soul Amalek nyi tulungam Ijipt gv duo-caga Habila hoqgv Sur namgub mviyanum.

⁸‍Hoo Amalek nyi tulug lvpw at Agagnvn tordwb bool wgnum hoo lyoqr orioq hoqgv nyiilu mwlwngam twryumnum.

⁹‍Hvbmabde Soul la nyiilungv Agagnvn la dengky bo sviyangam hoo hvvbam hoo jwwtw bo svv kongam hoo sviya yaanam, hoo albo mwlwngam pvvcumnum, hoo hoq tulu ham twryum maanum. Haqpaqnam hoo dooxa-daqya bo tulu ham twryumnum.

¹⁰‍At Swg gomcwrv Samuyelnvn haanum:

¹¹“Ngo Soulnvn lvpw at gob mvknam mam ngo mwwkur duku, hoggab mwv ngoqg lvgab wmin gvmab wkur paku hoo ngoqg gaml tulungam nyil wkma.” Hoo Samuyel hang lengnum, hoo ai yupw At Swn mwv xabnum.

¹²‍Hoo Soulnvn komcib kvvrwqtab Samuyel ar komc gorabnum. Hoo Samuyelnvn hoqhvb betamnum, “Soul Karmel ho haanum, hoo kaato, mwv atv mwwg guss ak mvl apnum hoo tobkur banv hoqb wpeqnum hoo Gilgalwb iknum.”

¹³‍Hoo Samuyel Soulwg dookub haanum, hoo Soul mwam benum, “At Sw nam lvqc cignvka. Ngo At Swg gamlam nyil wpa kun.”

¹⁴‍Hoo Samuyel benum, “Hoggv yu sviya sogoqnam hvb ngoqg nyuru so tapa dvn hoo hvvb liinam hvb ngoqg tapa gvdwn si?”

¹⁵‍Soul benum, “Bulv soq tulu sam Amalek nyi tulu hoqgv baqanum, hoggab nyiilungv noqg Pwnbo At Swn pwr jidwb hvl dengky bo sviyangam hoo hvvbam mengmab boa paku, hoo hoq lvvgam ngulv twryumnum.”

¹⁶‍Ho Samuyel Soulnvn benum, “Ody maab! Soi ai ngam At Sw hoggv benum ngo nam betayin.” Hoo mwv mwam benum, “Beto.”

¹⁷‍Hoo Samuyel benum, “Noqg atwg vnyiqho no atv anyo gob mwwdo, no Israel nyob hoolug nyigbo gob nyima dvn yv? At Sw nam Israelwg aoho lvpw at gob xuqlinum.

¹⁸‍Hoo At Sw nam hog nyis ak nyim dvb kanam tvl hoo benum, ‘Wgdvl nyic bo Amalek nyi tulungam twryum ta hoo bulam twryum maady deedib ceekol nyob pata.’

¹⁹‍Hvbnyiloqkam no hog nyitwl At Swg gomcwram tamanum? Hoggub no nyebia jaqb nyob pal naareqnam mam naap pakun hoo At Swg kaagaho hoggv al maadwn ham no nyipa kun?”

²⁰‍Hoo Soul Samuyelnvn benum, “Ngo At Swg gomcwram tvjwnum. At Swg hog nyis ak nyitak hvl kanamnam mam ngo wl nyipe kun. Ngo Amalek nyi tulug lvpw at Agagnvn tordwb boa pakun, hoo ngo Amalek nyi tulungam twryumnum.

²¹‍Hvbmabde nyiilungv nyob pal naareqnam mam sviyangam la hvvb dengky boam twryum maanum, hvbmabde Gilgal lo noqg Pwnbo At Swn pwr jidwb boanum.”

²²‍Hoo Samuyel benum, “At Swg yalam tvjw mabnyiloqkam, At Sw boyuqnam akiam la pwr jinam mam hemp mwwpa dvn yv? Kaato, tvjwnamv alyadwn pwr jinam mam, hoo tagabnamv alyadwn oxbo yaap tvmwram jinam mam.

²³Hoggab taleqnamv sootu tunam nyic hvb nyidwn, hoo mwwsamnamv nyixiaq bvla murty xumnam hvb nyidwn. Hoggab no At Swg gomcwram haqpaq paku, mwv kam nam lvpw atwb swwnam hoqgv haqpaq paku.”

²⁴‍Soul Samuyelnvn benum, “Ngo nyic nyipa ku, hoggab ngo At Swg gamlam la noqg gomcwram pvvb juqbo paku, hoggab ngo nyiilungam bosnum hoo bulug benam mam tanum.

²⁵‍Hoqgab sija, anya mwwpa gvdwl ngoqg nyicam apaq tukub hoo ngoqg lvgab wkur mingtvb ho ngo At Sw xumtayin.”

²⁶‍Hoo Samuyel Soulnvn benum, “Noqg lvgab ngo wkur nyoram. Hoggab no At Swg gomcwram haqpaq paku, hoo At Sw nam Israelwg aoho lvpw at gob swwnam mam haqpaq paku.”

²⁷‍Ho Samuyel tobkurl wleq taikam, Soul mwwg vj laqyapam nootunum, hoo vj laqyapam pujarnum.

²⁸‍Hoo Samuyel mwam benum, “At Sw soq aal soqgv Israelwg lvpw-hatiam mvpin supa ku hoo nam hiyv alyad bo noqg door-doopw ham jipa ku.

²⁹‍Hoo Israelwg yuunam mvkam dookram ho mwwkur kamram, hoggab mwv nyia ko ak ma, mwv mwwkur dvb.”

³⁰‍Ho mwv benum, “Ngo nyic nyipa ku; hvbsujaqkam ngoqg nyiixa nyiilug agaho hoo Israel agaho ngam modul xitwb, hoo ngoqg lvgab wkur ming tvb, ho noqg Pwnbo At Swg agaho ngo pvxwl xumtayin.”

³¹‍Ho Samuyel Soulwg kokwb wmin gvnum, hoo Soul At Swg agaho pvxwl xumnum.

³²‍Hoqgab Samuyel benum, “Amalek nyi tulug lvpw at Agagnvn ngoqg dookub boa to.” Hoo Agag mwwg dookub hwrcw mwlwl lengnum. Agag benum, “Jvqtw jaqb sigv wleq nukun.”

³³‍Hoo Samuyel benum, “Noqg lyoqr orioqkv naleqgo nyem mam ko doom kumanum, hoq hvbkalam noqg annv kam nyem pengko ho ko dooma nvka.” Hoo Gilgal ho Samuyel Agagnvn At Swg agaho patabl vmwq yumgub twqmwqnum.

³⁴‍Ho Samuyel Ramab wknum, hoo Soul mwwg nam Gibea caaknum.

³⁵‍Hoo Samuyel Soulnvn mwwg sinam aal xaqb kaak maanum, hvbmabde Samuyel Soulwg aoho mwwdwqnum. Hoo Soulnvn Israelwg aoho lvpw at gob mvknam mam At Sw mwwkur kv lwwywnum.