Read Nyishi 1 SAMUYEL 16 Bible Online

1 SAMUYEL 16 - Nyishi bible

1 SAMUYEL 16

¹At Sw Samuyelnvn benum, “Hog hwdgo no Soulwg aoho mwwdwq dwqtayin, hoggab Israelwg aoho lvpw at gob swwnam mam ngo mwam haqpaq pakun? Noqg soorw ho kuty loq duug dvb toolwq layil, hoo wto. Ngo nam Betleham nyi Jesseg dookub kanam tayin, hoggab mwwg ko tuup tulug pengko hoqgv ngo atv lvpw at ak xuqlin pakun.”

²‍Hoo Samuyel benum, “Hoggub ngo wla tan? Soul ham tapa baloqkam, mwv ngam mengta yi.” Hoo At Sw benum, “Svv ko loq dorg noqg lvgab bootwl hoo hvl beto, ‘At Swn pwr jitab ngo haaiyin.’

³‍Hoo pwr jikho Jessenvn goqa to, hoo no hoggv nyitayin ham ngo kaakin tayin. Hoo hiyam ngo bibwq tayin ham no ngoqgab kuty hoqgv piaqto.”

⁴‍Samuyel At Sw hoggv gaml jinum hvb mwv nyinv hoo Betleham ho haanum. Bopamg nyiixa nyi tulungv mwam tvmdwr hwqjol kvvrwqtab haanum hoo benum, “No so swrso gab haai nvi yv?”

⁵‍Hoo mwv benum, “Swrso gab; ngo At Swn pwr jitab haaiyin. Nulv atv garxaqto, hoo ngoqg lvgab pwr jikwb haato.” Hoo mwv Jesse nvla mwwg ko tuup tulungam garxaqtvl hoo bulam pwr jikho goqanum.

⁶‍Hwdlo bulv haai yikho, mwv Eliyabnvn kaatwl hoo mwwnum, “Jvqtw jaqb At Swg xuqnamv mwwg aga si haado.”

⁷‍Hvbmabde At Sw Samuyelnvn benum, “Mwwg gv tojam ho mwwg aonam mam kaamabv, hoggab ngo mwam haqpaq pakun. Hoggab At Sw nyi kaanam hvb kaama dvn: nyiingv gv ao tojam kaadwn, hvbmabde At Sw hangam kaadwn.”

⁸‍Ho Jesse Abinadabnvn goqnum hoo mwam Samuyelg agaho daqmnum, Hoo mwv benum, “Soq sam kam At Sw xuqma.”

⁹‍Ho Jesse Sammanvn wpeq mvnum. Hoo mwv benum, “Soq sam kam At Sw xuqma.”

¹⁰‍Hoo Jesse kvn deen mwwg ko tuupam Samuyel agaho wpeq mvnum. Hoo Samuyel Jessenvn benum, “At Sw soq tulu sam xuqlin ma.”

¹¹‍Ho Samuyel Jessenvn benum, “Noqg ko tuup mwlwngv so dood yv?” Hoo mwv benum, “Mwlwg bor honyia ak doodwn, hvbmabde kaato, mwv sija sviya rvkil yvdwn.” Hoo Samuyel Jessenvn benum, “Nyi kanam tvl mwam goqa to, hoggab mwv so haama deedib ngulv soq so doal doola ram.”

¹²‍Hoo mwv nyi kanam tvl hoo mwam urab boanum. Mwv nyiilw mwwcnum hoo vnyiqkv hwrda kvlanum hoo koojub-kaagabl kaap jaqnum. Hoo At Sw benum, “Gorabto, mwam darxaqto, hoggab soq si mwv.”

¹³‍Ho Samuyel kuty soorwngam naanv hoo mwwg vbw atag pengko ho mwam darxaq kunum. Hoo hoq aal jaq hoqgv At Swg Yalv Debidg aoho haanum. Hoo Samuyel gorab kun hoo Ramab wknum.

¹⁴‍At Swg Huqlwngv Soulwg hoqgv wleq kunum, hoo At Swg alman yalv mwam hentwr mvnum.

¹⁵‍Hoo Soulwg nyerangv mwam benum, “Kaato sija, At Swg alman yalv nam hentwr hindu mvdo.

¹⁶‍Ngulug atv, noqg agaho doonbo, noqg nyera tulungam gaml jito, piul tablaq bo nyiam meelin mvdwb, hoo hwdlo Pwnbog alman yalv noqg aoho haaikam, mwv piul tabtayin, hoo no al tayin.”

¹⁷‍Hoqgab Soul mwwg nyerangam benum, “Piul aljaqb tablaq bo nyiam ngam jito hoo mwam ngoqg dookub boa to.”

¹⁸‍Yaapa ak birwqnum, “Kaato, Betleham ho doonbo Jesse ko tuup ak piul aljaqb tablaqnam mam ngo kaatwn, mwv haakam bo nyiib nyide, mwv nyob paky bo nyiib nyide, agam goolaq jaqde, hoo mwv mwwlaqbo nyiib nyide, hoo mwam At Sw dooba dvn.”

¹⁹‍Hoqgab Soul Jesse dookub pui baqnbo atag kanaml hoo benum, “Sviya lvgab yvnbo, noqg ko tuup Debidnvn ngoqg dookub kanam tvbv.”

²⁰‍Hoo Jesse svdam ho dvsam la roo ala yooxaq xaqg rublwq tvl hoo sibin bindo dorg bool wg mvdwb Debidnvn gvqlwqtvl Soulwg dookub kanamnum.

²¹‍Hoo Debid Soulwg uraho bon nyidkub haanum. Hoo Soul mwam vcjaqb abynum, hoo mwv mwwg nwwxo-svtam mam baqya jin bob nyiknum.

²²‍Hoo Soul Jessenvn pui bilwql begamv, “Debidnvn ngoqg bon nyim dvb doom to, hoggab ngoqg mwwswl kvvlwq dvb mwv bon nyido.”

²³‍Hoo Pwnbog alman yalv hwdlo jaqkam Soulwg aoho haaikam, Debid piulam naarab banv mwwg alaq lvgab piulam tabnum. Ho Soul nyedar kunv hoo al dukun, hoo alman yalv mwwg hoqgv wleq dukun.