Read Nyishi 1 SAMUYEL 2 Bible Online

1 SAMUYEL 2 - Nyishi bible

1 SAMUYEL 2

¹Hoo Hanna swgwl hoo benum, “Ngoqg hangv At Swn hemp dvn; ngoqg atorv At Swn paqdwn. Ngoqg agamv ngoqg ceebiongam benyi-beya dvn, hoggab noqg ywwlinam ho ngo hwnyir-hvmar dvn.

²“At Sw hvb dvrwqbo akkam dooma; noqg lvvg alo akkam dooma; ngulug Pwnbo hvb lwwn akkam dooma.

³Larnam agam mam gook maabv, noqg agam hoqgv kwcwr-kvparnam mam lengm kumabv; hoggab Pwnbo At Sw cengbov, hoo mwv bon nyil vgwngam jaaka dvn.

⁴Atorbo illy tulungam twrtu paku, hvbmabde nyinyiaq boam ator dvb mvpa ku.

⁵Hiyv naleqgo doonbo tulungv sija dvs gab bulv atv rwqjo joogaqnum, hvbmabde hiyv kano nool doon bov kano noongin paku. Twrngum bov kvn go dwrbuq paku, hvbmabde mwn hiyv naleqgo ko doon bov hemp kuma do.

⁶At Sw mengd bvkam hoo swwm dvb kam jidwn; mwv Sux-ywlw ho bool dvn hoo lokta booca dvn.

⁷At Sw jwwgw dvb kam hoo nyet dvb kam mvdwn; mwv akob mvl dvn hoo yuum dvb kam mvca dvn.

⁸Mwv jwwgw boam diimwr hoqgv swwrab mvdwn; ho mwv pwwma-cwma boam mub olum hoqgv joorab layil ho bulam lvpw atwg tuup tulu lvgab doom dvn hoo xinam dootam mam otub naam dvn. Hoggab swcw soqg swwrw gwwlv At Sw su, hoo hoq aoho mwv gvda gvtam pvvl ap pakun.

⁹“Mwwg dengky bo akwg lvpiangam mwv rvky tayin, hvbmabde nyic-nyia boam kan twdwq ura lo pvlwq tayin, hoggab nyia kog ator hoqgv mviya nyoram.

¹⁰At Swg ceebio tulungam vmwq yumgub mvtayin; ao tolo bulam ceekol mwv doogum gumtayin. At Sw swcw nvg ywwtwr namgub pw-hwwtayin; mwwg lvpw atam mwv ator jitayin hoo mwwg xuqnam akam yuunam huqlwngam jitayin.”

¹¹‍Ho Elkana Rama nammwb wknum. Hoo nyub Ilig agaho nyega ko akv At Swn bon nyijnum.

¹²‍Sija Ilig ko tuup tulungv dooxa-xaaram bo nyi gob nyinum. Bulv At Swn cengmanum.

¹³‍Nyiilu lvgab nyub tulu nyicw ak doonum hwdlo nyiingv pwr aky jiyikam, nyubwg nyerangv haadwn, ho hwdlo vdinv xudul dooikam mwwg alaqho vdinam xwqgab nan ceexoqnam swwxo soog bwwtayin,

¹⁴‍hoo mwv hoq lvgab vdin pwcwb xulwq tayin. Ho hog hwdgo xugabl seelin tayin, ham nyubv naatayin. Soq sam Silo ho haanbo Israel nyi tulungv nyil doonum

¹⁵‍Hoq lvgab, oxam wm parma taab, nyub tulug nyerangv haadwn hoo pwr jidu bo nyi akwn bedwn, “Nyub gab vdin rams loq jito, hoggab xwwnunam vdinam mwv noqg hoqgv loorwq ram hvbmabde leelaq arongam loorwq tayin.”

¹⁶‍Hoo nyi akv mwam bebnyiloqkam, “Otuqcob oxam parco mvto, hoo no hog hwdwg nvvnw dvn naato,” ho mwv bedwn, “Ma, no sija da jito, hoo jima baloqkam, ngo naalil ham naatayin.”

¹⁷‍Soq sib yaapa tulu hoqg nyicv At Swg kaagaho koi loodanam, hoggab nyi tuluhv At Swn aky jinam mam nyinyi-nyiyanum.

¹⁸‍Nyega ko Samuyel lolup vjam kootwl At Swg agaho bon nyidul doonum.

¹⁹‍Hoo mwwg annv mwwg gab anyo-anyo bo vjam mvlayil hoo vnyw nywxiam hwdlo mwn mwnwg nyol lvgab vnyw-vnywngam pwr jitab caaikam mwwg gab vjam baqca jinum.

²⁰‍Ho Ili Elkana nvla mwwg nywxwngam lvqcnum, hoo begamv, “Mwn At Swn hoggub kopa kun hvb At Sw soq nyem soqgv nam kongam jignvka.” Ho bulug nammwb bulv wkur dukun.

²¹‍Jvqtw jaqb At Sw Hannanvn lvqcnum, hoo mwn ko gvknv nyega ko oum gola nyem ko vnyi go ko bwwknum.

²²‍Ili vigo axa kunum, hoo Israel nyi mwlwngam mwwg ko tuup tulug nyinam mam tal doodunum, hoo hoggub bulv kvvrwq mins ko tombu haagaho bon nyinbo nyem tulug lvgab yubg-karg gvdwk hvl tapanum.

²³‍Hoo mwv bulam benum, “Hog gab nulv soq tulu sam nyidwn? Hog gab nulug almab nyinam mam ngo nyiilu hoqgv tapa do.

²⁴‍Ma, ngoqg ko tulu, hv alma; ho ngo tapa do At Swg nyiilungv puiyam dumw do.

²⁵‍Hiyv akgon nyi akam ceekol nyic baloqkam, Pwnbov mwwgab hvvky swwtayin, hvbmabde hiyv akgon At Swn ceekol nyic baloqkam mwwg gab hvvky swwdy bo si yv?” Hvbmabde bulv bulug ab benam mam tamanum, hoggab bulam mengpaq dukub soq si At Swg mwwlwq kunamv.

²⁶‍Sija yaapa Samuyel gv vdin nvkam hoo At Swg mwwsw dvb kam hoo nyi tulug lvg bvkam kvvlwq dvb swwdul doonum.

²⁷‍Hoo Pwnbog nyi ak Ili dookub haanum hoo mwam benum, “Soq sib At Sw bepa ku, ‘Ngo jvqtw jaqb noqg abwg dvparam hwdlo bulv Ijipt ho Parog nyerab swwl dooyikho ngo atv kaakin maan mvi yv?

²⁸‍Israelwg nyob hoolu hoqgv ngoqg nyubwb swwm dvb, ngoqg yugwb haam dvb, sulum mwwm dvb, dvrwqbo lolup vjam ngoqg agaho koom dvb, ngo mwam xuqlin maan mvi yv? Israel nyiilug aky jinam mam noqg ab tulug nombungam ngo jinum.

²⁹‍Hvnyiloqkam nulv hog nyitwl ngoqg gaml jinam pwr la akiam nyinyi-nyiya dvn, hoo ngoqg Israel nyiilug aljaqb aky jinam mam, ngam koi yaadwb noqg ko tuup tulungam no atv jwwtw dvb hoon gvdwn?’

³⁰‍Hoqgab Israelwg Pwnbo At Sw bibwqdo: ‘Noqg nombungam la noqg ab tulug nombungam ngoqg agaho nwrba gob haagwi hoo lengwi nyim dvb ngo dingrnum,’ hvbmabde sija At Sw bibwqdo: ‘Ngoqg soqgv hoqhv aado tuku, hoggab hiyv ngam xidwn ham ngo xitayin, hoo hiyv ngam haqpaq dvn ham ngo anyo xitayin.

³¹‍Kaato, aal tulungv hoodu do hwdlo ngo noqg atoram hoo noqg abwg nombug atoram mvpaq tayin, ho noqg nombu ho nyi akam bo dookram.

³²‍Israelwg aoho swwm-geem dvb lvqcnam mam noqg hentwr lvgab vnyiqkv kaaby tayin, hoo noqg nombu ho nwrba xaqb nyi akam bo dookram.

³³‍Akin go noqg hoqgv ngoqg yugwngam mwwg xabnam vnyiq hoo mwwdwqnam hang hoqgv kaapa mvdwb mvpaqram, hoo noqg hosiqg nombu mwlwngam nyi tulug lyoqr orioq niqtuqb sitayin.

³⁴‍Hoo soq si kaacin dvb noqg ko tuup vnyig Hopni la Pinehaswg aoho haatayin: bunyiv aal lookinam sitayin.

³⁵‍Hoo ngo atv dengky bo nyubam ngo swwrab mvtayin, hiyv ngoqg hang hengkwb bvla dumpo mwwkwb nyin boam. Hoo mwwgab ngo hoggub nyijaqkam nam namg mwjtayin, hoo mwv nwrba xaqb ngoqg xuqlinum agaho haagwi lengwi bon nyil dootayin.

³⁶‍Hoo noqg nombu ho apaq kunam nyi akv mwwg dookub haal rup anyo gola wtw cwwnunam mam kol hoo betayin, “Ngam anya mwwpa gvdwl nyub akwg dookho aptvb ka, ngam wtw duduq-dvngaram dvm dvb.’ ”