Read Nyishi 1 SAMUYEL 20 Bible Online

1 SAMUYEL 20 - Nyishi bible

1 SAMUYEL 20

¹Ho Debid Rama gvdag Naiot hoqgv kelayil hoo Jonatan dookho haanum hoo Jonatanwg agaho benum, “Hoggv ngo nyipa kun? Hoggv ngo nyimurv? Hoo mwv ngoqg swwgam meegaq dvb, noqg abwg agaho ngo hoggv nyic nyipa kun?”

²‍Hoo mwv mwam benum, “Hv hog nyiram! No siram. Kaato, ngoqg ab hog anyo jaqkam ho koi jaqkam ngam bepa maab hog nyima dvn. Hoo hoggub ngoqg abv ngam soq sam kvs tayin? Hoqhvb nyiram.”

³‍Hvbmabde Debid lokta pvxwnv begamv, “Ngo noqg vnyiq kvvlwql mwwswnam ak hvl noqg abv anya jaqb cengdwn, hoo mwv mwwdo, ‘Soq sam Jonatannvn cengm mvmabv, hvbaloqkam mwv mwwdwq tai.’ Hvbmabde jvqtw jaqb, At Sw doody deedib hoo noqg yvjv swwl doody deedib, ngoqg gvla sig pengkongv korkin go dootwq do.”

⁴‍Ho Jonatan Debidnvn benum, “Hoggv xeq no betayin, ngo noqgab nyitayin.”

⁵‍Debid Jonatannvn benum, “Kaato, Aaram mam nit poolv ku, hoo ngo hoggub nyijaqkam lvpw atwg tebol ho kvxaqmab doomin gvdwb nyidwn. Hvbmabde ngam wwm tvb, ho atv atam nyoro uraho aal loumg ariyum namgub kvsil doota deen.

⁶‍Noqg ab ngoqg doomanam mam kaapa baloqkam, ho beto, ‘Debid mwwg Betleham bopam ho bul mwlwg nyob dvparv vnyw-vnywngam pwr jidy moodv haagam gab mwv ngam wde nvk hvl xaateqnum.’

⁷‍Mwv ‘Alpa hvl’ bebnyiloqkam, hoqhv noqg nyera gab altayin, hvbmabde mwv hang lengb nyiloqkam, ho cengto mwv almanam nyidwb mwwbwq pakun.

⁸‍Hoqgab noqg nyerangam anya mwwpa gvdwl mwwsw labv, hoggab noqg nyerangam no At Swg lvgab pvvb birnam mam mwr pakun. Hvbmabde ngo nyimur paloqkam, no ngam atv mengto, hoggab noqg abwg dookub no ngam boa tadwn i?”

⁹‍Hoo Jonatan benum, “Hoqham noqg hoqgv aado mvto! Ngoqg abv nam almab nyitanam mam ngo cengb nyiloqkam, ngo nam betam maab nyikin dvi yv?”

¹⁰‍Ho Debid Jonatannvn benum, “Noqg abv nam hang lengl benam mam ngam hiyv betam tayin?”

¹¹‍Hoo Jonatan Debidnvn benum, “Haato, kuj ngulv rongob wnuj.” Ho bunyi vnyiv rongo urab wnum.

¹²‍Hoo Jonatan Debidnvn benum, “Israelwg Pwnbo At Swn, hvvkib nyimto! Aaram mam soq mood so ma lo loum deen aalam ngoqg abam ngo tox tayin, ho kaato, mwv Debid daiyab mwwxam baloqkam, ngo hoqham noqg dookub kanaml hoo ngo betam ram yv?

¹³‍Hvbmabde ngoqg abv nam almab nyidwb mwwb nyiloqkam, At Sw Jonatannvn mengto hoo hoq lvvgho ngo nam hog mwlwngam betam maab hoo nam cumciqbo nyookub kanam maab mvvs baloqkam ngam vi yaiya go laqm-baqm to. Noqg abam doobanam hvb, At Sw noqg lvgab dooba nvka.

¹⁴‍Ngo swwl doob nyiloqkam, ngam At Swg tumab abynam mam kaakin laka, hoo ngo siram;

¹⁵‍hoo hwdlo At Sw Debidg ceebio tulungam swcw soqgv twryum yukun, noqg tumab abynam mam ngoqg imiq dvparam kuiyum namgub apaq mabka.”

¹⁶‍Hoo Jonatan pvvb birnam ak Debidg imiq dvpar lvgab mvnv begamv, “At Sw Debidg ceebiongam ree daqg nvka.”

¹⁷‍Hoo Jonatan pvvb birnam sam Debid lvgab lokta dingrnum mwv mwam aby ko-gab, hoggab mwwg atwg yvjam mwv abynam hvb mwam abynum.

¹⁸‍Ho Jonatan mwam benum, “Aaram mam nit poolv ku, hoo noqg doomanam mam kaapa tayi, hoggab noqg dootamv asar tvl dootayi.

¹⁹‍Aal loum deenam hwdlo bvrwqkv hvvnwq yukun noqg kvsil dook nyookub nyebia jaqb wto, hoo wlw lwwpum ura lo kvsil dooto.

²⁰‍Hoo ngo uppuq lo soum go hoq daiyab abtayin, swwga abdwn hvb abtayin.

²¹‍Hoo kaato, ngo yaapa loq ak kanaml betayin, ‘Wgdvl uppuqkam meepa ta.’ Ngo yaapa akam betayin, ‘Kaagabto, uppuqkv soq daiyab wnwn, uppuq tulu ham naata,’ ho hoq moodam no lengta, hoggab At Sw doody deedib, ho nam hog akam hog nyiram hoo noqgab sig-dorg dooram.

²²‍Hvbmabde ngo yaapa akam betayin, “Uppuqkam noqg taqcgon yaab meeta hvbnyiloqkam,’ ho no keto, hoggab At Sw nam kanam nampaq paku.

²³‍Hoo ngunyig pvvb birnam bvrwqkam mwwpa laka, kaato, At Sw ngunyig pengko si nwrba xaqb doodwn.”

²⁴‍Hoqgab Debid mwv atv rongo ho kvsnum. Hoo hwdlo nit poolv haaikun, lvpw atv dvtab doanum.

²⁵‍Otuq moodho doocw hvb cwqc daiya ho lvpw atv mwwg dook ho doonum. Jonatan taqcgon ho doonum, hoo Abner Soulwg bviywrho doonum, hvbmabde Debidg dookv asarnum.

²⁶‍Hvbsujaqkam hoq aalho Soul hog bemanum, hoggab mwv mwwgamv, “Mwam hog ak nyip de mwwnum. Mwv dvrwq maap de; jvqtw jaqb mwv dvrwq maap de.”

²⁷‍Hvbmabde nit pool aal loonyi deen so, Debidg dookv asarnum. Hoo Soul mwwg ko tuup Jonatannvn benum, “Hoggub Jesse ko tuupv moiyo kam ho soolo kam dvs dvk so haama pan?”

²⁸‍Jonatan Soulnvn birwqnum, “Debid ngam Betlehamg wde nvk xaateql belayil wnwn.

²⁹‍Mwv benum, “Ngam wwm tvb, hoggab bopam ho ngulug nyob dvparv pwr jid moodv, hoo ngoqg vbwngv ngam haat jaqk hvl gaml jilwq pa. Hoqgab sija ngo noqg vnyiq kaagaho kvvlwq dvb mwwsw paloqkam, ngam wwm tvb hoo ngoqg vbw-boram ngo kaatayin.’ Hoggab mwv lvpw atwg tebol so haanyi kuma.”

³⁰‍Ho Soul Jonatanwg aoho vc loodab hang lengnum, hoo mwv mwam benum, “Dooxa-xaaram bo hoo taleqbo nyem akwg ko tuup is, no Jesse ko tuupam mwwsw ko-gab no atv hvnyw sutayin, hoo noqg annwg talonam kam hvnyw tayin, ngo cengma dvn yv?

³¹‍Jesse ko tuup swcw nvg aoso doody deedib no la ho noqg lvpw-hativ doonyiram. Hoqgab nyi kanam to hoo mwam ngoqg dookub boato, hoggab hoggub nyijaqkam mwam simtayin.”

³²‍Ho Jonatan mwwg ab Soulnvn birwqnum, “Hog gab mwam sim tayin? Hoggv mwv nyipa kun?”

³³‍Hvbmabde Soul mwwg nwwxo lvgab mwam cilwql mengl mengpaq dvb mwwnum. Ho mwwg abv Debidnvn mengpaq dvb mwwr kunam mam Jonatan cengknum.

³⁴‍Hoo Jonatan vc loodab hang lingtwrnv tebol hoqgv gorab kunum hoo poolwg aal loonyi deen so dvs dvk maanum, hoggab mwv Debid gab mwwdwqnum, hoggab mwwg abv mwam haqpaq paku.

³⁵‍Ar Jonatan Debidnvn rongo ho kvvrwqtab wnum, hoo mwwg lvgab nyega ko ak wgnum.

³⁶‍Hoo mwv mwwg nyega koam benum, “Xarg dvl ngoqg uppuq abnam tulu ham meepa ta.” Nyega ko akv xardu yukho, mwv mwam uppuq soog toobonum.

³⁷‍Hoo hwdlo nyega ko akv Jonatanwg uppuq abk ho hvvc yin, Jonatan nyega ko akam goqmin gvnv benum, “Uppuqkv noqg otuq ya ho dooma yv?”

³⁸‍Hoo Jonatan nyega ko akam goqmin gvnum, “Ari bv! Nyebia jaqb! Doodu maabv!” Jonatanwg nyega ko akv uppuqkam dorkum layil hoo mwwg nyiit atwg dookub haanum.

³⁹‍Hvbmabde nyega ko akv ham cengmanum. Jonatan la Debid aro bvrwqkam cengtwqnum.

⁴⁰‍Hoo Jonatan mwwg illy-uppuqkam nyega ko akam jitwl hoo mwam benum, “Sam baqlayil bopamb wiya to.”

⁴¹‍Hoo ko akv wleq kalam Debid wlw lwwpum hoqgv lengnum hoo mwwg nyuqm mam kedhv patin tvl loum go xumnum. Hoo akwn-akwn moopup minsnum hoo xabnum, Debid vcjaqb xabin yaanum.

⁴²‍Ho Jonatan Debidnvn benum, “Swrsob wnka, hoggab At Swg eminho ngunyiv dingrwl betkun, ‘At Sw nwrba xaqb ngunyig pengko so dootayin, hoo ngunyig ko hosiq pengko ho dootayin’” Hoo mwv gorab kunv hoo wleqnum, hoo Jonatan bopamb wknum.