Read Nyishi 1 SAMUYEL 21 Bible Online

1 SAMUYEL 21 - Nyishi bible

1 SAMUYEL 21

¹Ho Debid Nobwg nyub Ahimelek dookho haanum. Hoo Ahimelek tvmdwr hwqjonv Debidnvn kvvrwqtab haanum hoo mwam benum, “Hog gab no vp-cwkwb haaiyin, hoo noqg lvgab nyi akam haama yv?”

²‍Hoo Debid nyub Ahimeleknvn benum, “Lvpw atv ngam hog ak bilwqnv hoo ngam benum, ‘Nam ngo hog ak nyim dvb kanamnam pagoq ham nyi akkam cengm mvmabv. Ngo yaapa tulungam nyook golo kvvrwq mins dvb mood xip pakun.

³‍Ho sija, hoggv noqg alaqho doodo? Ngam wtw taqang go jito, ho maalo soq so hoggv doodo.”

⁴‍Hoo nyubv Debidnvn birwqnum, “Ngoqg alaq so danyi wtw dooma, hvbmabde darxaq wtwngv doodo—yaapa tuluhv bulv atv nyem bwwka nyiloqkam no sam naala yi.”

⁵‍Hoo Debid nyubam birwqnum, “Jvqtw jaqb nyemv ngul galoqkv aado dvn hwdlo ngo soq sib nyiody boorab yin. Yaapa tulug dupum-dvrab pv dvrwqdvn hwdlo bulv wsam-wiyaml nyiody wsjaqkam. Hvnyiloqkam soolo hog hwdgo bulug dupum-dvrab pv dvrwq sud yv?”

⁶‍Hoqgab nyubv mwam darxaq wtwngam jinum, hoggab hoqho wtw doomanum hvbmabde Dooky bo wtwngv doonum, hogloq ham At Swg aga hoqgv naapaq kunum, hoq aalho hoqham naapaq tvl ogbo wtwngam kwlib apnum.

⁷‍Sija At Swg agaho parl apnum Soulwg nyera tulu hoqg nyega ak gon hoq aalho hoqho doonum. Mwwg eminv Doeg, mwv Idom nyiingv, mwv Soulwg sibin-sviyangam rvkybo peelo akv.

⁸‍Ho Debid Ahimeleknvn benum, “Noqg alaqho sija nwwxo maalo lyoqr orioq daag dooma yv? Hoggab ngoqg lyoqr orioqkam ho ngoqg nwwxo-svtam mam bwwk ma, hoggab lvpw atwg bon nyis si nyebia jaqb nyidwb nyinum.”

⁹‍Hoo nyubv benum, “Hiyam no Ela lywpa ho mengnam, Palistan Goliatwg lyoqr orioqkv doodo, kaato, kamt lvvg vv hoqham vjv hwwbum tvl ap pan. No ham naabnyiloqkam, ham naalayi, hoggab so daasaq dooma hvbmab vvtwq.” Hoo Debid benum, “Hoqhvb nyinbo dooma nyiloqkam; ngam ham jitbv.”

¹⁰‍Hoo Debid gorabnum hoo Soulwg hoqgv hoq aalho keleqnum hoo Gatwg lvpw at Akis dookub wnum.

¹¹‍Hoo Akiswg nyera tulungv mwam benum, “Soq si gvda soqg lvpw at Debid maai yv? Bulv mwwgab bemin bel noso sooma nam yv, ‘Soul mwv lwwyw go mengnum, hoo Debid mwv camg lwwyw mengnum’?”

¹²‍Hoo soq gomcwr tulu sam Debidg hangho tagabnum hoo Gatwg lvpw at Akisnvn vigo bosnum.

¹³‍Hoqgab mwwg nyij-mujam mwv bulug agaho luusaqb nyinum hoo bulug agaho dumpo almanbo hvb nyinum hoo toggoq viyap tulungam tiboq-tisoql mvgaqnum hoo mwwg coqyum ho tacorv yorlnum.

¹⁴‍Ho Akis mwwg nyera tulungam benum, “Kaato, nulug kaanam nyi si ruqgaq bo go. Hog gab nulv mwam ngoqg dook so boanum?

¹⁵‍Ngoqg dook so rugaq bo nyi dook maad nvi yv, ho nulv so nyi sam ngoqg agaho so boa tvl rugaq gaqm gvdwn? Svkwg nyiingv ngoqg nam uraso haaiyin dvn yv?”