Read Nyishi 1 SAMUYEL 23 Bible Online

1 SAMUYEL 23 - Nyishi bible

1 SAMUYEL 23

¹Ho “Kaato, Palistan nyi tulungv Keila gvdangam ceekol nyob pal hoo vly-axeqkam naareq do hvl, bulv Debidnvn betamnum.”

²‍Hoqgab Debid At Swn takanum, “Ngo wgdvl Palistan nyi tulu sam nyob paiyin dvi yv?” Hoo At Sw Debidnvn benum, “Wn hoo Palistan nyi tulungam nyob pagdvl hoo Keilangam ywwlin ta.”

³‍Hvbmabde Debidg nyi tulungv mwam benum, “Kaato, ngulv Juda uraso bosdo; hvnyi loqkam hwdlo ngulv Keila ho wl Palistan sipai tulungam ceekol nyob pvrwq taab wb nyiloqkam hog hwdgo ngulv bos yin do?”

⁴‍Ho Debid lokta At Swn toxnum. Hoo At Sw mwam birwqnum, “Gorabto, Keilab in, hoggab Palistan nyi tulungam noqg alaqho ngo jilwqtayin.”

⁵‍Hoo Debid la mwwg nyi tulungv Keilab wnum hoo Palistan nyi tulu lvgab nyob panum hoo bulug tuun-meengam naareql wgnum hoo bulam vc loodab mengnum. Hoqhvb Keila ho doonbo nyi tulungam Debid ywwlinum.

⁶‍Hwdlo Ahimelek gv ko tuup Abiyatar Debid lvgab Keilab kenum, mwwg alaqho nyub lolup vj rumg bwwl ignum.

⁷‍Soulnvn Debid Keila ho haanam mam betamnum. Hoo Soul benum, “Pwnbov mwam ngoqg alaq si jilwq paku, hoggab aljaqb yoqdwr lvgab gurum nwqtumnam pamda uraho toggoq tuluho mwv atv atam mutum ap supa ku.”

⁸‍Hoo Debid nvla mwwg nyi tulungam hwwiyuml Keila ho il nyob pam dvb, Soul nyiilungam goqkumnum.

⁹‍Soulwg hang baql mwam mengta tanam mam Debid cengnum. Hoo mwv nyub Abiyatarnvn benum, “Nyub lolup vj soqb bwa to.”

¹⁰‍Ho Debid benum, “Israelwg Pwnbo, At Swa, noqg nyerangv tapa do Soul Keila so haal bopam mam ngoqg pagoq gab twryum tado.

¹¹‍Mwwg alaqho ngam Keilag nyi tulungv jilwq laiyin dvi yv? Noqg nyerangv tapanam hvb Soul bopam so haata yin yv? Israelwg Pwnbo, At Swa, anya mwwpa gvdwl noqg nyerangam betam tvb.” Hoo At Sw benum, “Mwv haata yv.”

¹²‍Ho Debid benum, “Keilag nyi tulungv ngam la ngoqg nyi tulungam Soulwg alaqho jilwq tan yv?” Hoo At Sw benum, “Bulv nulam jilwq tai.”

¹³‍Ho Debid la lwwx gob mwwg nyiv gorab kunv hoo bulv Keila hoqgv at-at mwwlwqkob wleqnum. Hwdlo Debid Keila hoqgv kelin nukbak hvl tapa yin Soul, mwwg nyob patab wtanam mam apaq kunum.

¹⁴‍Hoo Debid diisw gvdag, Jipwg Nyoro roodw ho, mwv kvsil doogwl doonum. Hoo Soul aal looxiam mwam meegaqnum, hvbmabde Pwnbov mwam mwwg alaqho jilwq maanum.

¹⁵‍Soul mwwg swwgam meelin dvb meegaqnam mam Debid kaapanum. Debid Jipwg Nyoro roodw Hores ho doonum.

¹⁶‍Hoo Soulwg ko tuup, Jonatan gorab layil Debid dook Hores ho wnv, hoo mwam Pwnbov ator jitayin hvl haak bepanum.

¹⁷‍Hoo mwv mwam benum, “Bos maabv, hoggab ngoqg ab Soulwg alaqkv nam nootu nyoram. No Israelwg lvpw atwb nyitayin, hoo noqg bviywrho ngo dootayin. Ngoqg ab Soul kam sam cengl doodo.”

¹⁸‍Hoo vnyiv At Swg agaho pvvb birnam mam mvba sunum. Debid Hores ho doonum, hoo Jonatan nammwb wkurnum.

¹⁹‍Ho Jip nyi tulungv Soulwg dookub Gibea ho caanv begamv, “Jesimonwg nyooko daiyag Hakilag diisw nyook Hores ho Debid ngulug pengko lo kvs sigwl doomas i?

²⁰‍Sija ito lvpw ata, noqg hang mwwlwq koob ito, hoo ngulv mwam lvpw atwg alaqho jitayin.”

²¹‍Hoo Soul benum, “Nulam At Sw lvqc cignvka, hoggab nulv ngam anya mwwpa paku.

²²‍Wn, lokta hingky jaqb mwnwqta. Hogloq nyook hooxeq mwv wi-wca dvn, hoo hiyv mwam kaanum ham cengdvl hoo kaata, hoggab mwv vc loodab surdo hvl ngo tapa do.

²³‍Hoqgab kaata hoo cengta hogloq nyook hooxeq tooiya yaal hoo mwv kvsil doodwn, hoo ngam hookur gvdwl pwbw jaqb puiyam bekin to. Ho ngo nulug lvgab wtayin. Hoo mwv gvdaho dood nyiloqkam, ngo mwam lwwyw-lwwywg Judag nyi pengko hoqgv meelin tayin.”

²⁴‍Hoo bulv gorabnv hoo Soulwg otuqb Jipwb wnum. Debid la mwwg nyi tulungv Maon nyoro roodwg, Jesimonwg nyooko daiyag Araba gvdaho doonum.

²⁵‍Hoo Soul la mwwg nyi tulungv mwam meegaqtab wnum. Hoo Debidnvn betam yin, ho mwv ako daiya wlw bwdw urab innum hoo Maonwg deexa-raraho doonum. Hoo hwdlo Soul ham tapa yin, mwv Debidnvn Maonwg deexa-raraho ruqmin gvnum.

²⁶‍Ho Soul puutu taqgwn gob wnum, hoo Debid la mwwg nyi tulungv puutu taqgwn gob wknum. Hoo Debid nyebia jaqb Soulwg hoqgv keleqdvb kenum. Soul la mwwg nyi tulungv Debid nvla mwwg nyi tulungam ruqtinl nootu dvb nyinum,

²⁷‍hoq moodho pui baqn bo ak Soulnvn haal begamv, “Nyebiab haato, hoggab Palistan nyi tulungv gvdangam nyob paal naata gvdku.”

²⁸‍Hoqgab Soul Debidnvn ruqngo peekul wkur kunum hoo Palistan nyi tulungam nyob pvrwqtab wknum. Hoqgab hoq nyookam Keleqko Wlwngv hvl eminum.

²⁹‍Hoo Debid hoqgv caaknv Engedi hingwnam cwwgwko ho doonum.