Read Nyishi 1 SAMUYEL 24 Bible Online

1 SAMUYEL 24 - Nyishi bible

1 SAMUYEL 24

¹Hwdlo Soul Palistan nyi tulungam ruqmin gvpe kul hookur yukho, mwam betamnum, “Kaato, Debid Engedig nyoro roodw lo doodo hvl tapanum.”

²‍Ho Soul Israel hoqgv nyi lwwyw oum go daalin layil hoo Debid nvla mwwg nyi tulungam meelin taab Sijiq Lwwtaq daiyab wnum.

³‍Hoo mwv sviya doqkum ko lamta bviywrb haanum, hoqho lwwpwq ak doonum hoo Soul mwv atv hoq uraho usum paqtab haanum. Hvbmabde Debid la mwwg nyi tulungv hoq lwwpwq ura jaqho doonum.

⁴‍Hoo Debidg nyi tulungv mwam benum, “Soq aal sam kunyi At Sw nam benum, ‘Kaato, noqg ceebiongam ngo noqg alaqho jilwq tayin, hoo no hognvkam al kaapa dvn ham no nyitayin.’” Ho Debid cooikab jingrab layil Soulwg kamt vj laqyapam peel wgnum.

⁵‍Hoo kokw so Debidg hangv vcjaqb duqnum, hoggab mwv Soulwg kamt vj laqyapam peel wgnum.

⁶‍Mwv mwwg nyi tulungam benum, “At Sw, ngam sam ngoqg bir atwg aoho nyim mvmabv, ho At Swg xuqlinam akam ngoqg alaqkv ceekol mengram, hoggab mwv At Swg xuqlinam akv.”

⁷‍Hoqgab Debid mwwg nyi tulungam soq gomcwr tulu sam goonv bulam binyubnum hoo bulam Soulnvn mengm mvmanum. Hoo Soul gorab kunv hoo lwwpwq hoqgv wknv hoo mwwg lamtab wknum.

⁸‍Kokw so Debid gorabnum hoo lwwpwq hoqgv lvvgwb lengnv, hoo Soulwg kokwb goqmin gvnum, “Ngoqg lvpw ata!” Hoo hwdlo Soul mwam kookur yin, Debid mwwg nyuqm mam ked ho pvxwl hoo mwam modul xumnum.

⁹‍Hoo Debid Soulnvn benum, “‘Kaato, Debid nam mengdwb meegaq do’ hvl, noqg nyi tulug gomcwr goonam mam hoggub no tvjw dvn?

¹⁰‍Kaato, soolo aal so noqg vnyiqkv kaag nukba hoggub At Sw lwwpwq uraho nam ngoqg alaq so jilwqnum. Hoo nyi tuugin nam mengtwk hvl ngam benum, hvbmabde ngo nam apaq jinum. Ngo benum, ‘Ngoqg bir at aoho ngoqg alaqkv idaqram, hoggab mwv At Swg xuqlinam akv.’

¹¹‍Kaaka to, ngoqg ab, kaaka to noqg kamt vj laqyapv ngoqg alaq si doodo. Hoggab ngo noqg kamt vj laqyapam peelinum hoo nam mengnw maanum, ho ngoqg alaq so hog nyimur ho nyipinam dooma dvn ham no cengdvl hoo kaato. No ngam mengdwb ruqgaq sujaqkam, ngo nam ceekol nyic nyimanum.

¹²‍At Sw ngunyig pengko lo nyegam akwb doodwn, noqg ngam ceekol nyinam mam At Sw nam ree daqg nvka, hvbmabde ngoqg alaqkv nam ceeko jiram.

¹³‍Hoqgab ab apag niitinv hvl tindwn, ‘Nyic-nyia hoqgv nyic-nyiangv lengdwn.’ Hvbmabde ngoqg alaqkv nam ceekol hog nyiram.

¹⁴‍Israelwg lvpw atv hiyvg kokwb wmin gvdwn? Hiyvg kokwb ruqmin gvdwn? Sinbo iky kokwb! Dooxa bo kokwb!

¹⁵‍Hoqgab At Sw nyegam gob nyito hoo ngunyig pengko so pvvb mvto, hoo ham kaaka to hoo ngoqg bvrwqkam bvt bv hoo noqg alaq hoqgv ngam naalin tvb.”

¹⁶‍Hwdlo Debid soq gomcwr tulu sam agam goonya kalam, twqda Soul benum, “Ngoqg ko Debid, soq si noqg agam yalv yv?” Hoo Soul mwv vcjaqb sogoqnv hoo xabnum.

¹⁷‍Mwv Debidnvn benum, “No ngam alyanbo nyi goknyi, hoggab no ngam alboam nyipa ku, hvbmabde ngo nam alman boam nyipa ku.

¹⁸‍Hoo soq aal so no ngoqg lvgab hoggv nyiknum ham no bibwq paku, hwdlo At Sw ngam noqg alaqho jilwq yukho no ngam mengji kuma.

¹⁹‍Hoggab mwwg ceebiongam nyi akv kaapa yin, mwam swrsob wwm dvn yv? Ho noqg ngam soq aal so hoggv nyij kunum ham, At Sw nam albo lvqc cam cignvka.

²⁰‍Hoo sija kaato, no hoggub nyijaqkam lvpw at gob swwtayin ham ngo cengdo, hoo Israelwg lvpw-hativ noqg alaq uraho swwl dooky tayin.

²¹‍Hoqgab no ngoqg ko hosiqkam, hoo no ngoqg eminam ngoq abwg imiq dvpar hoqgv twryum ram hvl, At Swg eminho no ngam dingr tvb.”

²²‍Hoo Debid soq sam Soulnvn dingr jinum. Ho Soul nammwb wknum, hvbmabde Debid la mwwg nyi tulungv cwwgw kob caaknum.