Read Nyishi 1 SAMUYEL 26 Bible Online

1 SAMUYEL 26 - Nyishi bible

1 SAMUYEL 26

¹Ho Jip nyi tulungv Soulwg dookub Gibea ho caanv begamv, “Jesimonwg duo-caga daiyag Hakilag diisw nyook ho Debid ngulug pengko lo kvs sigwl doomas i?”

²‍Hoqgab Soul gorab layil Israel nyi tulu hoqgv lwwyw oum go nyi daalin layil Debidnvn Jip nyoro roodw ho meegaq taab Jip nyoro daiyab innum.

³‍Hoo Soul Jesimonwg dou-caga daiya lamta bviywr Hakila diisw ho svmcw mvl doonum. Hvbmabde Debid nyoro roodw ho doonum. Hwdlo Soul mwwg kokw nyoro roodw urab haanam mam mwv kaapanum,

⁴‍Debid mvqky-maqlam mvnboam kanam tvl hoo Soulwg haanam mam cengknum.

⁵‍Ho Debid gorab layil hoo Soulwg svmcw mvl dookho haanum. Hoo Soul mwwg sipai saab Nerwg ko tuup Abner lvgab gel karkam Debid kaanum. Soul svmcw uraho yubnum, hoo sipai tulungv mwam hwwiyum tvl doognum.

⁶‍Ho Debid Hittait nyi Ahimeleknvn la Joabg vbw-bor Jeruiyag ko tuup Abisainvn benum, “Soulwg svmcwb hiyv ngoqg lvgab imin gvtayin?” Hoo Abisai benum, “Ngo noqg lvgab imin gvtayin.”

⁷‍Hoqgab Debid la Abisai bunyiv ai sipai dookub wnum. Hoo Soul svmcw ura jaqho mwwg nwwxongam mwwg dumpo lwkw kedho xudaq tvl yubdul doonum, hoo Abner la sipai tulungv mwam hwwiyum tvl yubnum.

⁸‍Ho Abisai Debidnvn benum, “Pwnbov soq aal so noqg ceebiongam noqg alaqhv jilwq paku. Kvl jijaq bol ngo mwam nwwxo lvgab ukin ciqnyi ho kedho xutinl nwqxtayin, hoo ngo unyi gokam mwam nwqram.”

⁹‍Hvbmabde Debid Abisainvn benum, “Mwam mengmabv, hoggab hiyv At Swg xuqlinam ham mwwg alaqkv ceekol idaq yin hoo nyic nyima hvla tayin?”

¹⁰‍Hoo Debid benum, “At Sw swwl doody deedib, At Sw mwam mengtayin, ho maalo mwwg sid aalv haatayin, ho maalo mwv nyob patab wtayin hoo yuupaq tai.

¹¹‍At Sw vrka, ngoqg alaqkv At Swg xuqlinam mam idaq dvb. Hvbmabde mwwg dumpo lwkw ho nwwxo ham la iss pvtaq ham naalayil, hoo ngulv wn kuj.”

¹²‍Hoqgab Debid nwwxongam la iss pvtaqkam Soulwg dumpo lwkw hoqgv naanum hoo bulv wleq kunum. Nyi akkam ham kaapa, ho ham cengkam maanum, ho nyi akkam huurab kamanum, hoggab bul mwlwngv yubl doonum, hoggab At Sw bulam vc loodab yubngaq mvdwb mvnum.

¹³‍Ho Debid taqcgonwb wknum hoo diisw nyookwg puutu aob caanum, bulug pengkongv vigo aado mins kunum.

¹⁴‍Hoo Debid sipai saab Nerwg ko tuup Abnernvn goqnum hoo begamv, “Abner, no ngam birwq ram yv? Ho Abner birwqnum, “No hiyv lvpw atam goqdwn?”

¹⁵‍Hoo Debid Abnernvn benum, “No nyega maai yv? Noq hvb nyinbo Israel ho hiyv doodwn? Hoggub noqg nyiit at lvpw atam no rvkil kaol doog maadwn? Hoggab nyiilu nyi ak noqg nyiit at lvpw atam twrtab haanum.

¹⁶‍Soq sib noqg nyinam si alma. At Sw swwl doody deedib, no sidwb jaq nyipa ku, hoggab At Swg xuqlinam mam no hingkib rvkil kaol doogma. Hoo kaaka to hogloq ho doodo lvpw atwg dumpo lwkw ho nwwxongam la iss pvtaqkam apnamv.”

¹⁷‍Soul Debidg agam yalam tacin tvl hoo benum, “Ngoqg ko tuup Debid, soq sib noqg agam yalv yv? Hoo Debid benum, “Ngoqg nyiit at, lvpw ata, vv ngoqg yalv.”

¹⁸‍Hoo mwv benum, “Hog gab ngoqg nyiit atv mwwg nyera kokwb ruqmin gvdwn? Hoggv ngo nyipa ku? Hoggv ngoqg alaq so almanv doodo?

¹⁹‍Hoqgab sija ngoqg nyiit at lvpw atv mwwg nyera gomcwr goonam sam tato. Soq si At Sw nam nwqduq tvl ngam ceeko mvd nyiloqkam, mwv akiam loorwq yin pv, hvbmabde soq si nyia ko nwqduq ko-gab nyid nyiloqkam, hoq aky jinam tuluhv At Swg agaho beenam gob nyiyi nvpv, hoggab bulv ngam soq aal namgub ruqpaq paku, ho ngam At Sw hoqgv otu naady sanam mam begamv, ‘Wn, asaq pwnbo tulungam xumta.’

²⁰‍Hoqgab sija, At Swg agaho hoqgv aado yukam ngoqg uiyam kedho digkam dip mvmabv, hoggab Israelwg lvpw atv dooxa bo nyi akin kokwb meegaql haamin gvdo, hiyv puutu lo pvta meegaql ab gaqnam hvb nyido.”

²¹‍Ho Soul benum, “Ngo nyic nyipa ku. Ngoqg ko tuup Debid hookur tuku, hoggab ngo nam hog nyij kuram, hoggab soolo ngoqg swwgv noqg vnyiq kaagaho xinam gob nyipa ku. Kaato, ngo paca looda nyinam hvb nyit kuba, hoo koijaqb nyixiaq tukba.”

²²‍Hoo Debid birwql hoo benum, “Lvpw ata, soq si noqg nwwxongv! Noqg yaapa lo ak soqb caag dvl hoo nwwxo sam naam tuku.

²³‍At Sw nyiicwr-cwrxiam mwwg jvqtw bvla dengkil haagabl nyin boam lvqc dvn, hoggab At Sw soolo ngoqg alaq so nam jinum, hoo hvbmabde At Swg xuqlinam mam ngoqg alaqkv ceekol idaq maanum.

²⁴‍Kaato, soolo noqg swwgv ngoqg kaagaho xinam gob nyinum, hoq hvbkalam At Swg kaagaho ngoqg swwgv xinam gob nyidwn, hoo mwv ngam soq vs-axaq mwlw soqgv ywwlin tayin.”

²⁵‍Ho Soul Debidnvn benum, “Ngoqg ko tuup Debid, no xinam jaqkv! No naleqgo nyis pagoqkam nyitayin hoo hoq mwlwho niqtuq lengtayin.” Ho Debid mwwg lamtab wknum, hoo Soul mwwg nyookub wkur kunum.